കേരളത്തിലെ സകലമാന തട്ടിപ്പിലും വെട്ടിപ്പിലും അഴിമതിയിലും അഴിഞ്ഞാട്ടത്തിലും ഒരു ഭാഗത്ത് സിപിഎമ്മിനെ അടയാളപ്പെടുത്താൻ നിർബ്ബന്ധിതമാകുന്ന കാലമാണിത്.

ഇതൊക്കെ ചോദ്യം ചെയ്താൽ തീർന്നു. അവനെയും കുടുംബത്തെയും അവർ പുകയ്ക്കും. കഴിഞ്ഞ പത്തു വർഷം നാട്ടുകാർക്ക് പണി കൊടുത്ത പലരെയും തിരഞ്ഞെടുത്ത പ്രബുദ്ധ പൗരാവലിയെ സമ്മതിക്കണം.1977ലെ പൊതു തെരഞ്ഞെടുപ്പിൽ ബീഹാറികൾ പുലർത്തിയ പൊതു ബോധം പോലും നമുക്കില്ലാതെ പോയി..ഇന്നും ചിലേടങ്ങളിൽ അത് ആവർത്തിച്ചു.

കള്ളത്തരങ്ങളുടെയും വെട്ടിപ്പുകളുടെയും പരമ്പര തഴച്ചത് സിസ്റ്റത്തെ മുതലെടുത്തായിരുന്നു. കിംഗ് പിന്നുകൾ സേഫായി. പെട്ടു പോയത് ഗുമസ്തനും കണ്ടു നിന്നവരും മാത്രം. .

ആലപ്പുഴയിൽ ഫാക്ടറി തുടങ്ങിയ സായിപ്പുമാരും ഒന്നും രണ്ടും പറ നെല്ലു പത്തായത്തിൽ സൂക്ഷിച്ച ഒരുപിടി മാന്യന്മാരും സംയുക്തമായി വിളയിച്ചതാണ് യഥാർത്ഥത്തിൽ കേരളത്തിലെ തൊഴിലാളി പ്രസ്ഥാനം. റഷ്യൻ നാടോടി കഥകളുടെ വിവർത്തനം വായിച്ചു മയങ്ങി നാട്ടുവഴികളിൽ നാം കലാപം അഴിച്ചുവിട്ടു. സ്വാതന്ത്യം എന്ന സ്വർഗ സങ്കല്പം പൂത്തുലഞ്ഞ നാളുകൾ! അന്നത്തെ ഇന്ത്യയിലെ എണ്ണം പറഞ്ഞ വികസനത്തിന്റെ രാജശില്പികളിലൊരാളായ സർ സിപിയെ നമ്മുടെ വില്ലനാക്കിയത് അടിസ്ഥാനമില്ലാത്ത ഭാവനകളായിരുന്നു.