ഇന്ത്യയിലെ രാഷ്ട്രീയ പാർട്ടികളിൽ നിലപാട് കൊണ്ട് വേറിട്ട് നിന്നിരുന്ന പ്രസ്ഥാനമായിരുന്നു സി പി എം. ഓരോ വിഷയങ്ങളിലും സ്വീകരിക്കുന്ന,പ്രത്യയശാസ്ത്രത്തിൽ ഊന്നിയ നിലപാടുകളായിരുന്നു സി പി എമ്മിൻ്റെ ശക്തിയും സൗന്ദര്യവും. മത-ജാതി ചേരികളിൽ നിന്നും മാറി നടന്നിരുന്ന പാർട്ടി ഇപ്പോൾ അധികാരത്തിന് വേണ്ടി നിലപാടുകളില്ലാതെ ‘കോൺഗ്രസ്’ ആയി ചുരുങ്ങുന്ന കാഴ്ചയാണ് ബംഗാൾ സംഭവത്തിൽ കാണാൻ കഴിയുന്നത്. ബംഗാളിലെ സഖാക്കൾ പ്രാണഭയം കൊണ്ടും കേരളത്തിലെ സഖാക്കൾ ‘വോട്ട് ഭയം’ കൊണ്ടുമാണ് പ്രതികരിക്കാത്തത് എന്ന് കരുതാം. ഇക്കഴിഞ്ഞ സി പി എം സംസ്ഥാന സമ്മേളനത്തിലും, മധുരയിലെ പാർട്ടി കോൺഗ്രസിലും ഏറ്റവും കൂടുതൽ സമയം സഖാക്കൾ ചെലവിട്ടത് കേരളത്തിലെ ഹിന്ദു വോട്ടുകൾ ബി ജെ പി യിലേക്ക് ഒഴുകുന്ന പ്രവണത ചർച്ച ചെയ്യാനായിരുന്നു. ചർച്ചക്കൊടുവിൽ എന്ത് തീരുമാനത്തിലെത്തി എന്നറിയില്ല. പക്ഷേ, ഒരു കാര്യം ഉറപ്പായി. കൂടുതൽ ശക്തിയോടെ പാർട്ടി മുസ്ലിം പ്രീണനം തുടരും. വഖഫ് ഭേദഗതി ബില്ലിനെതിരെ നിയമസഭയിൽ പ്രമേയം പാസാക്കിയവരുടെ ലക്ഷ്യം മുസ്ലിം വോട്ട് ബാങ്ക് സംരക്ഷിക്കൽ മാത്രമാണ്. രാഷ്ട്രീയം നോക്കി വോട്ട് ചെയ്യാൻ ശീലിച്ച കേരളത്തെ മതം നോക്കി വോട്ട് ചെയ്യാൻ പ്രേരിപ്പിക്കുന്ന സി പി എമ്മിൻ്റെ ‘ആധുനിക നിലപാട്’ കേരളത്തെ ത്രിപുരയുടെ വഴിയേ നടക്കാൻ പ്രചോദിപ്പിക്കുമെന്ന സത്യം ഇവർ എന്നാണാവോ തിരിച്ചറിയുക..!