സിപിഎം നോമിനികളായി എത്തിയ ദേവസ്വം മുൻ അധ്യക്ഷന്മാരെല്ലാം  കൂട്ടായി പാടി. 'വലയിൽ വീണ കിളികളാണു നാം!' ആർത്തി മൂത്ത ആ ഭക്തഷഡ്പദങ്ങളുടെ ആദ്ധ്യാത്മിക സന്നിതിയാണോ  കൽത്തുറുങ്കുകൾ.? 

ജയിലിൽ സിക്സ് കോഴ്സ് അത്താഴവും മുത്താഴവും  ഏർപ്പെടുത്തിയ ദീർഘദർശനത്തിന്റെ പൊരുൾ ഇപ്പോഴാണ് തിരിയുന്നത്.  കമ്മിറ്റികളിൽ നിന്നും ജയിലറകളിലേക്ക് ഇനി ഒരു ലോങ്ങ് മാർച്ചിനു സ്കോപ്പുണ്ട്. 

'തൊഴിൽ അല്ലെങ്കിൽ ജയിൽ';  നമ്മുടെ നാടൻ ചെഗുവേരമാരുടെ പണ്ടത്തെ മുദ്രാവാക്യം. വിയർക്കാതെ പണിത്  പണക്കൂനകൾ തീർത്തവർക്ക്  ജയിലാണ് ശരണം.  ക്രമമനുസരണം ചരിക്കാം.  അക്രമം കൂടാതെ വിക്രമരാകാം...അതോടെ എല്ലാവർക്കും ജോർജ്ജ് ഫെർണാണ്ടസായി ജയിലിൽ പാർത്ത് മത്സരിക്കാം.  അടിച്ചു മാറ്റലിന്റെ പേരിലുള്ള പാർപ്പാണിത് എന്നതു മാത്രമാണ് മൗലിക വ്യത്യാസം .അത് നമ്മുടെ പത്രം കൊണ്ട് മറയ്ക്കാം. അപ്പോൾ വിപ്ലവം  കോരപ്പുഴ കടക്കും;ജാത്യാചാരം വെടിഞ്ഞ്.


കാഴ്ച മങ്ങിയ, ചിന്ത ഊർന്നു പോയ, ആയിരം പൂർണ ചന്ദ്രനെ കണ്ട ഒരു വയോധികനെ മുൻ നിർത്തിയാണ് ഇപ്പോഴും പടപ്പുറപ്പാട്. ഒരു പൊടിക്കാറ്റിൽ തോൽക്കുന്ന യുദ്ധം . ഒരു ചാറ്റൽ മഴയിൽ തകരുന്ന  വിപ്ലവം. ഇതാണ്  എഴുത്തുകാരനായ നബക്കോവിന്റെ നിരീക്ഷണം.   ഇവിടെ മൂപ്പിലാൻമാർക്കു മൂലക്കുരുവുമുണ്ട്. അതു വിപ്ലവത്തിനു  തടസ്സമാണ്.. 

വാവടുക്കുമ്പോൾ  പ്രാന്ത് കൂടും.. വിശാല  കന്നിമാസ പൊതുക്കൂട്ടം അടുക്കും തോറും ശൗരിമാർ  അനുവാദമില്ലാതെ കരഞ്ഞു പോകും. ആർത്തി പൂണ്ട അനന്തരവൻമാരുടെ കർക്കിടക വിപ്ലവം അണിയറയിൽ കൊഴുത്തുരുണ്ട് വരികയാണ്..

പറന്നു പോകുന്ന ഏടാകൂടങ്ങളെയെല്ലാം  മുസ്ലിം ലീഗിന്റെ തെരഞ്ഞെടുപ്പ് ചിഹ്നമായ കോണി വച്ചു പിടിക്കുന്ന ഇത്തരം ക്രേയ്സി ബോയ്സാണ് യുഡിഎഫിനു ഐശ്വര്യം  നിറക്കുന്നത്. വൈറ്റ് മാറ്റർ കുറഞ്ഞവരിൽ നിന്നും റൈറ്റായ മാറ്ററുകൾ കിട്ടില്ലെന്നുറപ്പ്.  


വെള്ളത്തിലാകുന്ന   എസ്ഐപി നിക്ഷേപങ്ങളെ ഓർത്താണ്  ചേട്ടായിമാരുടെ വിലാപം. കഞ്ഞികുടി തന്നെ മുട്ടുന്ന  വിശേഷങ്ങളാണ് ഓരോ നാളും. കേൾക്കുന്നത്. . ചാനലും പത്രവും പലവുരു കണ്ടൂം വായിച്ചുമാണ് അണികൾ  കൈപ്പത്തിയിലും കോണിയിലും  ആഞ്ഞു കുത്തിയത്. ആ അപകടവും കാണണം.

 ജനിച്ച നാട്ടിൽ, സ്വന്തം ബൂത്തു പോലും ചവിട്ടി എറിഞ്ഞ ചില അഴകിയ രാവണന്മാരാണ് ഇന്നത്തെ പ്രഘോഷകർ.  അങ്ങാടിയിൽ ചിലവാകാത്ത ചവറുകൾ..

 മഴ മേഘങ്ങൾ പേടിച്ചോടാം. കൊട്ടി പ്പെയ്യാം.  കടലിനെ അറിയുന്നവർ മുന്നറിയിപ്പുകൾ  വക വെയ്ക്കില്ല. പെരേലുള്ളവരും അന്നു  വള്ളമിറക്കും. അനിഷ്ടമുണ്ടായാൽ ബിരുദ ഭാഷയിൽ   മുഖ്യമന്ത്രിയെ അസഭ്യം പറയാൻ അത് അവസരമൊരുക്കും. പണ്ട് പാദരക്ഷയും  തള്ളി ജീവനും കൊണ്ട് കണ്ട  വണ്ടിയിൽ എസ്കേപ്പായ പഴയ മുഖ്യനെ നിറചിരിയോടെ സ്വീകരിക്കാം.  കടലിൽ മാഞ്ഞവരെ കടലിനു മീതെ നടന്നവൻ കാക്കും

CPM seeks help of Satheesan to attack pinarayi

കൊമ്പനെ തല്ലി 
ചെമ്പന് കൊള്ളിക്കുമ്പോൾ...

നിയമസഭാ തെരഞ്ഞെടുപ്പിൽ എട്ടു നിലയിൽ പൊട്ടിയ ഇടതുമുന്നണിയും അതിനെ നയിച്ച സിപിഎമ്മും നിയമസഭയ്ക്ക് അകത്തും പുറത്തും നിർദ്ദയമായ ആക്രമണങ്ങൾക്ക് വിധേയരാവുകയും 'എല്ലോപ്പി' എന്ന ലുട്ടാപ്പി എന്തോ കളഞ്ഞ എന്തിനെയോ പോലെ കുന്തം വിഴുങ്ങിയിരിക്കും ചെയ്യുന്ന പതിതോവസ്ഥ.പണ്ട് പുലിപോലിരുന്നയാൾ ഇപ്പോൾ ആരെങ്കിലുമൊക്ക ചിറിയിൽ കുത്തി' എണീര് എല്ലോപ്പീ' എന്നു പറയുമ്പോൾ മാത്രം പിടഞ്ഞെണീക്കുകയും തൽക്ഷണം വാക്ക് ഔട്ട് അടിക്കുകകയും ചെയ്യുന്ന കാലം.

കോൺഗ്രസ്സ് തെരഞ്ഞെടുപ്പിൽ മൃഗീയമായി വിജയിച്ചത് ഉമ്മൻ ചാണ്ടിയുടെ ഓർമ്മകളുടെ കൂടി അടിസ്ഥാനത്തിലാണെന്ന് ഇടത് ഗവേഷകർ കണ്ടെത്തിയിരുന്നു. അതല്ലാതെ പാർട്ടിക്കെന്താ കുഴപ്പം. തുടർ ഭരണം ഉറപ്പിച്ചിരുന്നതല്ലേ . ഉമ്മൻ ചാണ്ടി ചാമ്പി. എല്ലാം വിധി.

'കണ്ണേ കരളേ വി എസേ 'എന്ന വാചകം ചുവപ്പിച്ച പോസ്റ്ററുകൾ സംസ്ഥാനത്താകമാനം നിറഞ്ഞു. പാർട്ടി പത്രവും ശത്രുതയെല്ലാം മാറ്റി അവസരത്തിനൊത്തുയർന്നു. അങ്ങിനെ 19 ഞായറാഴ്ചയിലെ വാരാന്ത്യപ്പതിപ്പിൽ
'മുഴങ്ങുന്നിപ്പോഴും ആ കടലിരമ്പം' എന്ന പേരില്‍ മുൻപേജ് ലേഖനം തയ്യാറാക്കി നന്നായലങ്കരിച്ച് അച്ചടിച്ചു. വിഎസിന്റെ പ്രസ് സെക്രട്ടറിയായിരുന്ന കെവി സുധാകനായിരുന്നു ആ കവര്‍‌സ്റ്റോറി എഴുതിയത്. വി.എസ് അച്യുതാനന്ദനെപ്പറ്റി പണ്ട് പറയരുതാത്തത് പറഞ്ഞ എം സ്വരാജാണ് നിലവിൽ ദേശാഭിമാനിയുടെ റസിഡന്റ് എഡിറ്ററെന്നത് ചരിത്രത്തിന്റെ മനോഹരമായ ഒരു കറുത്തട്രോളായി. 

സംഭവം വൻ കോമഡിയായതോടെ പതിപ്പ് ഒഴിവാക്കിയിട്ടില്ലെന്നും സാങ്കേതിക തടസ്സങ്ങൾ പരിഹരിച്ച് വരും ദിവസങ്ങളിൽ പത്രത്തോടൊപ്പം വിതരണം ചെയ്യുമെന്നും സ്വരാജ് വ്യക്തമാക്കി

'കള്ളൻ വിജയ'ന്റെ മുന്നിൽ ഇരമ്പാത്ത വി എസ് എന്ന ഓർമ്മക്കടൽ

അദ്ദേഹത്തെ കാണാനും മന്നംസമാധിയിൽ പൂക്കൾ സമർപ്പിക്കാനും അപ്പോയിന്റ്മെന്റ് കിട്ടണമെങ്കിൽ ഇത്തിരി വിയർക്കേണ്ടിവരും. യു.എൻ സെക്യൂരിറ്റി കൗൺസിലിന്റെ അനുമതിയുമായി വന്നാൽ സന്ദർശനം എളുപ്പമാവും.. ഇല്ലേൽ ഇച്ചിരി പുളിക്കും...

ഈ ഗേറ്റ് ഇതുവരെ അടഞ്ഞവരുടെ ആകെയുള്ള പട്ടിക നോക്കിയാൽ ആകെമൊത്തം കൺഫ്യൂഷനാവും.
സുരേഷ് ഗോപി വന്നു. ഗേറ്റ് അടഞ്ഞു. അദ്ദേഹം' ഷിറ്റ്' എന്ന് സൗമ്യമായി പ്രതികരിച്ച് ദില്ലിക്ക് വണ്ടി വിട്ടു. 'ഇന്ത്യ ഇന്ത്യയുടേതെന്നും സുകുമാരൻ നായർ സുകുമാരൻ നായരുടേതെന്നും' അവകാശപ്പെടുന്ന  മന്നത്തിന്റെ സ്മാരകം  ദിവസങ്ങൾക്കുള്ളിൽ ദില്ലിയിലുയർന്നു. 'ഓർമ്മയുണ്ടോ ഈ മുഖം' എന്ന് ആരോടെക്കെയോ ആംഗ്യഭാഷയിൽ ചോദിച്ച് മന്നംപ്രതിമയ്ക്കു മുന്നിൽ സുരേഷ് ഗോപി പൂക്കളർപ്പിച്ച് പ്രാർത്ഥിച്ചു.  അതായത്, പെരുന്നയിൽ ചെന്നുകയറി മന്നത്തിനെ കാണാനായില്ലെങ്കിൽ മന്നത്തെ ഡൽഹിയിലേക്ക് വരുത്തി കാണാൻ മടിക്കില്ല എന്ന ഒരു പുതിയ ബി ജെ പി ലൈൻ വിപ്ലവം..

തിണ്ണയിൽ നിരങ്ങാൻ തയാറല്ലെന്ന  വി.ഡി.സതീശന്റെ തെരഞ്ഞെടുപ്പു കാല പ്രസ്താവന കേട്ടപ്പോൾ സുകുമാരൻ നായർ സൗകുമാര ഭാവം വിട്ട് രൗദ്രത്തിൽ പിടിച്ചു. നായരല്ലാത്ത പിണറായി യോഗ്യനാണെന്ന് എൻ എസ് എസ് സീലുവച്ച് സർട്ടിഫിക്കറ്റും കൊടുത്തു.പക്ഷേ ജനറൽ സെക്രട്ടറിയുടെ മാനം ലച്ചിക്കേണ്ട നായൻമാർ ചെവിയിലെ പൂട മറച്ച് തെരഞ്ഞെടുപ്പിൽ മറിച്ചു കുത്തി.

കാലം കറങ്ങി. ഭരണം മാറി. ഇതുവരെ ഗേറ്റ് അടച്ച് അകത്തിരുന്ന മാഷിന് ഇപ്പോൾ ഗേറ്റിൽ  മുട്ടേണ്ട ഗതികേട് വന്നു.

മുഖ്യമന്ത്രി വി.ഡി സതീശനെ കാണാൻ സുകുമാരൻ നായർ ആഗ്രഹം പ്രകടിപ്പിച്ചു. സതീശൻ സത്യപ്രതിജ്ഞാ ദിനത്തിൽ ഉറക്കെ നയം പ്രഖ്യാപിച്ചു, ഞാൻ മേനോനാണ് നായരല്ല! 
കാണാൻ തത്കാലം സമയം തരാൻ സൗകര്യമില്ല. സംഗതി പുറത്തറിഞ്ഞത് സതീശൻ മേനോൻ പറഞ്ഞിട്ടല്ല; നായരുടെ നാവിൽ നിന്നു തന്നെയാണ്. നമ്മളങ്ങനെ പറയുമോ എന്നു പറഞ്ഞ് സതീശൻ പൂക്കിച്ചിരി ഒരിക്കൽ കൂടി പുറത്തെടുത്തു.
എന്നാലും എന്റെ മേൻ...നേ 

നായൻമാർക്കു മുന്നിൽ നായൻ 
മാർ തന്നെ വാതിലടയ്ക്കുന്ന നായൻമാരുടെ സ്ഥാപനമായി പെരുന്ന മാറിക്കഴിഞ്ഞ സ്ഥിതിക്ക് ഇനി എന്തു ചെയ്യും മല്ലയ്യാ? നായന്മാർക്ക് ഒരു പുതിയ സംഘടനയും ആസ്ഥാനവുമായാലോ? വേണം എന്ന് പറയുന്നവരോട്  മൂക്കില്ലാ രാജ്യം സിനിമയിൽ തിലകൻ പറയും പോലെ 'നൂറ് ശതമാനവും'യോജിക്കാനേ പറ്റൂ.



പുതിയ സംഘടനയ്ക്ക് .'പെരുന്നയിൽ പ്രവേശനം കിട്ടാത്ത നായേഴ്സ് സമാന്തര സൊസൈറ്റി' എന്നാക്കാവുന്നതാണ്. ചുരുക്കപ്പേര് PPK- NSS എന്നു കിട്ടുകയും ചെയ്യും. സംഘടനയിൽ അംഗത്വം കിട്ടാൻ ഒരു യോഗ്യതയേ വേണ്ടൂ.  പെരുന്നയുടെ ഗേറ്റിൽ മുട്ടിപ്പായി പ്രാർത്ഥിച്ച് നിരാശരായി മടങ്ങി വന്നവരായിരിണം.

സംഘടനയുടെ ആദ്യ യോഗത്തിൽ തന്നെ വി.ഡി സതീശൻമേനോൻ,സുരേഷ് ഗോപി, ഗണേശ് കുമാർ, ശശി തരൂർ തുടങ്ങിയവരെല്ലാരും ഒരേ സ്റ്റേജിൽ ഇരിക്കും. കേരള രാഷ്ട്രീയത്തിൽ ഇതുവരെ ഒരു സംഘടനയ്ക്കും കൊണ്ടുവരാൻ പറ്റാത്ത ഐക്യം അങ്ങനെ സുകുമാരൻ നായർ  ഗേറ്റ് ബ്ലോക് ഇന്ത്യാ പ്രസ്ഥാനത്തിലൂടെ  നേടിത്തന്നിരിക്കുന്നു.

അതാണ് അദ്ദേഹത്തിന്റെ മഹത്വം. അദ്ദേഹം വിചാരിച്ചാലും ഇല്ലെങ്കിലും, നായന്മാരെ അദ്ദേഹം ഒന്നിപ്പിക്കും.ഒന്നിപ്പിച്ചേ അടങ്ങൂ. അതിപ്പം ഗേറ്റിന്റെ പുറത്തുനിർത്തിയിട്ടാണെങ്കിലും.



നായര് പിടിച്ച 'പൂക്കി'വാൽ

സഹകരണ സംഘങ്ങൾ പിടിക്കണമെന്ന സിക്രട്ടറിയുടെ ദീനരോദനം അനിവാര്യമായ തകർച്ചയുടെ ആയുസ് നീട്ടിക്കിട്ടാനുള്ള  അഭിലാഷമാണ്. തകർച്ചയുടെ അവസാന ചടങ്ങുകൾക്ക് പരികർമികളാവാനാണ്  പലർക്കും ചരിത്ര നിയോഗം. പുര
കത്തുമ്പോൾ കഴുക്കോൽ ഊരുന്നതും വാഴ വെട്ടുന്നതും ചിതമല്ല. 

പ്രതീകാത്മാകമായി മാറുന്ന ഈ   അവതരണങ്ങൾ ദയനീയമായ കാഴ്ചയും കാഴ്ച്ചപ്പാടുമാണ് രൂപപ്പെടുത്തുന്നത്.
 അന്തസ്സാര ശുന്യമായ  വാചോടാപങ്ങൾ സഭയിൽ സമയം തള്ളി നീക്കാനുള്ള തന്ത്രമായി തീരുകയാണോ? 

ഹോട്ടൽ സമുദ്രയും പി എം ശ്രീയും  തത്കാലം പരണത്തു വച്ച് വിഴിഞ്ഞത്തിലാണ് പുതിയ പരീക്ഷണം. കതിന  എങ്കിലും പൊട്ടിക്കണം. അതിനുള്ള അന്വേഷണമാണ് ആരായുന്നത്.അന്തംവിട്ട പ്രതി എന്തും ചെയ്യും ചെയ്യണം..

സഭയിൽ ഉപനേതാവാകാനുള്ള അവകാശ വാദം ഉപേക്ഷിച്ചിട്ടില്ലെന്ന് രാജൻ മേശിരി പറയുന്നു.ഒരു ഓട്ടോറിക്ഷക്ക് എന്തിനാണ് രണ്ടു ഡ്രൈവർ എന്നാണ് നാട്ടുകാരുടെ ചോദ്യം. ഒരു ഉപമരവാഴ കൂടി വന്നിട്ട് എന്താണ് നേട്ടമെന്നും അവർ ചോദിക്കുന്നു. ഒരു പക്ഷെ വിഡി സതീശനു മുന്നിൽ ആവലാതി ബോധിപ്പിച്ചാൽ പരിഹാരം കണ്ടേക്കാം.

ഒരു കുത്തക മൊയലാളിക്കാണ്. വിഴിഞ്ഞത്തിന്റെ പെട്ടിയും പ്രമാണവും കുടികിടയും സ്കെച്ചു പ്ളാനും സകല ഏടാകൂടങ്ങളും, ഉ ഉമ്മൻ ചാണ്ടിയും പിന്നീട് വിജയനും സംഘവും കൈമാറിയത്. അദാനി സോഷ്യലിസ്റ്റുമൊന്നുമല്ലല്ലോ ? കുത്തകപ്പാട്ടം പതിച്ച് നൽകിയിട്ട് കുത്തകവത്കരണം ചെറുക്കും എന്നു പേശാൻ സിപിഎമ്മിന് എന്തു ധാർമികതയാണുള്ളത്?  ഈ ഇടപാടിനെ സത്യ സന്ധമായി വിലയിരുത്താനും പോംവഴി നിർദ്ദേശിക്കുന്നതിനും പകരം ദുരൂഹതയും അന്തർ നാടകവും ആരോപിക്കുന്നതു  ഗതിയില്ലാത്തവന്റെ കാപട്യമാണ്. പൊതുയോഗം കൂടി തള്ളിയാൽ തീരുന്നതല്ല ഈ വിഷയം. 

.നാട്ടുകാരുടെ ജീവിതോപാധികൾ മുച്ചൂടും തകർന്നതതിലല്ല  തങ്ങളുടെ താര തുല്യമായ ജീവിതം  തകരുന്നതിലാണ് പാർട്ടി നേതാക്കൾക്കു മുട്ടിടിയും മൂത്രശങ്കയും.
തോറ്റിട്ടില്ല തോറ്റിട്ടില്ല
തോറ്റ ചരിത്രം കേട്ടിട്ടില്ല

സഖാക്കളേ,നമുക്ക് സഹകരണ സംഘങ്ങൾ കൈയ്യേറാം

അങ്ങനെ എല്ലാം ഒരു വഴിയായി. കഠാര,കുന്തം, മലപ്പുറം കത്തി ഒലക്കേടെ മൂട്.

എന്തൊരു  മൾട്ടി മീഡിയ തള്ളായിരുന്നു.
ഇതാ വികസനത്തിന്റെ സൈറൺ..ഇനി വച്ചടി വച്ചടി  കയറ്റമാണ്. ആളോഹരി ആനന്ദം,വളർച്ച.. വികസനം

കിടപ്പാടവും തൊഴിലും ജീവിതവും പോയവർക്ക്  കടത്തിണ്ണയിലിരുന്ന് തന്തയ്ക്കും തള്ളയ്ക്കും തെറി വിളിക്കാം; തിരോന്തരം സ്ലാങ്ങിൽ.... അതു മാത്രമേ ബാക്കിയുള്ളൂ.

വിഴിഞ്ഞം കടലും കടപ്പുറവും ഇന്ന് കോടികളുടെ പണയ ഉരുപ്പടികളായി  നമുക്കു മുന്നിൽ മാറി മറിയുന്നു.  ഊരും പേരും തിരിയാത്ത അദാനി മൊയലാളി  നമ്മുടെ സ്ഥാവരവും ജംഗമവും   ശതകോടികൾക്ക് ആധികാരികമായി വിൽക്കുന്ന അതിശയക്കാഴ്ച കാണാൻ  
അണ്ണാ.. അടിച്ചു കേറി ബാ..


കേരളത്തിൽ വികസനത്തിന്റെ കടലിരമ്പം, കപ്പലിറക്കം ,ആന ,ചേന എന്നൊക്കെ തള്ളി തിമിർത്ത കാരണ ഭൂത നാളുകൾ.എന്റെ തല,എന്റെ ഫിഗർ  എന്നാർത്ത്  കണ്ടവന്റെ ചെലവിൽ, ആളു കളിച്ച  അനുചരൻമാർ ഇപ്പോൾ  അവതരിപ്പിക്കുന്നത് പുതിയ ഗെയിം.

2024ൽ ഇടതു സർക്കാർ  ഒപ്പിട്ട കരാറിൽ തന്നെയാണ് അദാനിയുടെ കളി.   25 ശതമാനത്തിൽ അധികം ഓഹരികൾ വിൽക്കുന്നതിന് സംസ്ഥാന സർക്കാരിന്റെ മുൻകൂർ അനുമതി വേണമെന്ന് കരാർ നിർദ്ദേശിക്കുന്നു. ഈ വ്യവസ്ഥ മറികടന്ന് ഓഹരിക്കൈമാറ്റ നടപടികൾ ആരംഭിച്ച സാഹചര്യത്തിലാണ് അതൃപ്തി പ്രകടമാക്കി മുഖ്യമന്ത്രി കത്തു നൽകിയത്. 

ഉഡായിപ്പുകൾ ,പൂച്ചുകൾ പുറത്താകുന്നത് ഇപ്പോഴാണ്.തുറമുഖം കമ്പനി നടത്തും. അല്ലറ ചില്ലറ ലോജിസ്റ്റിക്സും മറ്റു അറ റ കുറ റ പണികളും മാത്രമാകും പുറത്തുള്ള കലാപരിപാടിയെന്ന് പഴകിയ ധനമന്ത്രി
തോമസ് ഐസക് പറയുന്നു. 
ദുഷ്ടൻ.

13200 കോടി രൂഫായുടെ നിക്ഷേപം വന്നത് കാരണഭൂതന്റെ ദീർഘ വീക്ഷണത്തിന്റെ തെളിവാണെന്നു നീട്ടീയടിച്ച ദേശാഭിമാനി അടുത്ത നാൾ മാറ്റിയടിച്ചു. ധിം തരികിട തോം. നമ്മൾ ഇതിൽ ഏത് വിശ്വസിക്കണം.

കല്ലിട്ടു കല്ലിട്ടു കടലിൽ കര തീർത്തപ്പോൾ മറ്റിടങ്ങളിലെ കരകളെയാകെ വിഴുങ്ങി പക തീർത്ത കടലിൽ മത്സ്യ ബന്ധനം നിലച്ചുപോയി.പകരം  ഉരുവംകൊണ്ടത് മനുഷ്യ ബന്ധനം.തൊഴിൽ ബന്ധനം.ജീവിത ബന്ധനം. 
ഇങ്ങനെ
വഴിയാധാരങ്ങളായി മാറിയ നാട്ടുകാരുടെ ജീവനവും ജീവനോപാധികളും ആരുടെയും കൺസേണാവുന്നില്ല.വികസന ഗീർവാണങ്ങളിൽ മാത്രം അവർ ശോഭിതരായി.. 
എന്റെ മാതാവേ!


രാഷ്ട്രീയം മാത്രമാണ് വിഴിഞ്ഞത്തിന്റെ ഇന്നത്തെ ലക്ഷ്യവും മാർഗവും.ഏതു കുത്തകയാണ് പണം വാരേണ്ടത് എന്ന കാര്യത്തിൽ മാത്രമേ തർക്കമുള്ളൂ.

സോഡാ നാരങ്ങാ വെള്ളം പിഴിഞ്ഞും,പാനീപുരി വിറ്റും
ധാബകൾ ഒരുക്കിയും, ലോറി ഡ്രൈവർമാർക്കു അന്തിയുറങ്ങാനും അന്തിക്കൂട്ടിനും സൗകര്യം  ഒരുക്കിയും  ഇവിടെ ഒരു സമൂഹം ഒടുങ്ങാം..  

ആയിയെ ഭായി ആയിയേ.
ഹം തും ഏക് കമരേ മേം  ബന്ത് ഹോ!

കപ്പലു കമിഴ്ന്ന് താടിക്ക് കൈയ്യും കൊടുത്ത് വിഴിഞ്ഞം

സംസ്ഥാനത്തെ മാധ്യമപ്രവർത്തകരുടെ പ്രബല സംഘടനയായ കേരളാ യൂണിയൻ ഓഫ് വർക്കിംഗ് ജേണലിസ്റ്റിന്റെ
(കെ യു ഡബ്ല്യു ജെ )യുടെ ആസ്ഥാനം തിരുവനന്തപുരത്താണ്. തലസ്ഥാനത്തെത്തുന്ന ആർക്കും, റോഡുവികസനം വന്നപ്പോൾ പോലും ഒരടി പിന്നോട്ടുമാറാതെ തലയുയർത്തിത്തന്നെ നില്ക്കുന്ന ആസ്ഥാനമന്ദിരം കാണാം. മാധ്യമ കുലപതിയെന്ന് വിശേഷിപ്പിക്കപ്പെടുന്ന കേസരിയുടെ പേരിലാണ് കെട്ടിടം അറിയപ്പെടുന്നത്; കേസരി സ്മാരക മന്ദിരം.

41 വർഷം കേസരിയുടെ എല്ലാമെല്ലാമായിരുന്ന പ്രദീപ് കുമാർ ഹൃദ്രോഗ ബാധിതനായി ആശുപത്രിയിലായി. തന്റെ അവസ്ഥ വിശദീകരിച്ചും അവധി ആവശ്യപ്പെട്ടും പ്രദീപ് ജില്ലാ പ്രസിഡന്റിനും സെക്രട്ടറിക്കും കത്തു നൽകി.എന്നാൽ പിന്നീട് സംഭവിച്ചത് മാധ്യമ ഭാഷയിൽ പറഞ്ഞാൽ നഗ്നമായ നെറികേടിന്റെ വേറിട്ട ഒരു 'ഹ്യൂമൺ ഇന്ററസ്റ്റ് സ്റ്റോറി'

2025 ജൂൺ 23നാണ് 
തിരുവനന്തപുരം ശ്രീചിത്രയിൽ പ്രദീപ് ഹൃദ്രോഗചികിത്സയ്ക്ക് അഡ്‌മിറ്റായത്.ജോലിയുമായി ബന്ധപ്പെട്ട് പ്രദീപിന്റെ കൈവശം ഉണ്ടായിരുന്ന എല്ലാ ഓഫീസ് രേഖകളും ഓഫീസിൻ്റെ താക്കോൽകൂട്ടം, മെയിൽ പാസ് വേർഡ് തുടങ്ങിയവയും  ബന്ധപ്പെട്ടവർക്ക് കൈമാറിയിട്ടാണ് പ്രദീപ് ആശുപത്രിയിലേക്ക് പോയത്. ജൂൺ 24ന് ഓപ്പൺഹാർട്ട് ശസ്ത്രക്രിയയ്ക്ക് വിധേയനായ പ്രദീപ്
തുടർന്ന് മെഡിക്കൽ വിശ്രമത്തിലായി.  ജൂൺ 23 മുതൽ സെപ്റ്റംബർ 23വരേയ്ക്കുള്ള മെഡിക്കൽ അവധിക്കത്ത് സംഘടനയുടെ ജില്ലാ പ്രസിഡൻറിനും സെക്രട്ടറിക്കും ജൂലൈ 5 ശനിയാഴ്ച ഇ മെയിൽ മുഖാന്തിരം അയച്ചു.

ഇതനുസരിച്ച് മൂന്നുമാസം കൂടി മെഡിക്കൽ ലീവ് നീട്ടാനുള്ള അപേക്ഷ ബന്ധപ്പെട്ടവർക്ക് സെപ്‌തംബർ 24ന് ഇമെയിൽ ചെയ്തു. വിശ്രമത്തിനു ശേഷമുള്ള പരിശോധനയിൽ  ആരോഗ്യവാനെന്നും ജോലി ചെയ്യുന്നതിന് തടസ്സമില്ലെന്നും ഡോക്ടർ അറിയിച്ചു. 
ഇക്കാര്യം ചൂണ്ടിക്കാട്ടി, ജനുവരി 1 മുതൽ ജോലിക്കെത്താൻ തയ്യാറാണെന്ന് കാണിച്ച് ഡിസംബർ 29ന് പ്രദീപ് കത്തു നൽകി.

എന്നാൽ ജനുവരി ഒന്നിന്  ഓഫീസിലെത്തിയ പ്രദീപിനെ ഞെട്ടിച്ചു കൊണ്ട് പകരം വേറെറൊരാളെ നിയമിച്ചുവെന്നും ഇനി വരേണ്ടതില്ലെന്നുമുള്ള പ പ്രതികരണമാണ് പ്രസിഡന്റിൽ നിന്നുണ്ടായത്. എന്നാൽ ഗ്രാറ്റുവിറ്റി ആനുകൂല്യങ്ങൾ ഒരു മാസത്തിന കം നൽകാമെന്നും അദ്ദേഹം വാക്കാൽ ഉറപ്പുനൽകി. 
.

ഗുണപാഠം: മാധ്യമങ്ങളിൽ വരുന്ന  മനുഷ്യാവകാശലംഘനങ്ങളെയും കണ്ണിൽ ചോരയില്ലാത്ത പ്രവൃത്തികളെയും കുറിച്ചുള്ള വാർത്തകളെല്ലാം മാധ്യമ ലോകത്തിന് പുറത്ത് സംഭവിക്കുന്നവയാണ്. ഇവിടെ നടക്കുന്നവ റിപ്പോർട്ട് ചെയ്യാൻ ഞങ്ങൾക്ക് മനസ്സില്ല!

 


Human rights violations among journalist fraternity

Recent in Analysis