2025 മാർച്ചിൽ ധനകാര്യ മന്ത്രാലയത്തിൻ്റെ ഒരു റിപ്പോർട്ട് പ്രകാരം, പ്രതിസന്ധികൾക്കിടയിലും രാജ്യം 6.5% സാമ്പത്തിക വളർച്ച നേടുമെന്ന് പറഞ്ഞിരുന്നു. കാർഷിക, സേവന മേഖലകളുടെ വളർച്ചയും ഉപഭോഗത്തിലെ വർദ്ധനയുമാണ് കഴിഞ്ഞ പാദത്തിലെ GDP യുടെ വളർച്ചക്ക് നിദാനമെന്ന് മന്ത്രാലത്തിൻ്റെ മാസിക റിപ്പോർട്ടിൽ പറയുന്നുണ്ട്. ജനുവരി-മാർച്ച് കാലയളവിലെ സാമ്പത്തിക വളർച്ച നിരക്കും ഇന്ന് പ്രസിദ്ധീകരിച്ചു. ഈ പാദത്തിൽ ഇന്ത്യയുടെ GDP 7.4% വളർച്ച നേടിയതായി റിപ്പോർട്ടിൽ പറയുന്നു. അടുത്ത 30 വർഷം ലോകത്തിലെ ഏറ്റവും വേഗത്തിൽ വളരുന്ന സാമ്പത്തിക ശക്തിയായി മാറാനുള്ള തയ്യാറെടുപ്പിലാണ് ഇന്ത്യയെന്ന് കേന്ദ്ര വ്യവസായ-വാണിജ്യ വകുപ്പ് മന്ത്രി പീയുഷ് ഗോയൽ പറഞ്ഞു. കഴിഞ്ഞ ചില വർഷങ്ങളായി 6 മുതൽ 7% വരെ സ്ഥിരമായ വളർച്ച കാണിക്കുന്ന സാമ്പത്തികത്തെ 8 ശതമാനത്തിൽ എത്തിക്കാനുള്ള ശ്രമത്തിലാണെന്നും മന്ത്രി പറഞ്ഞു. 2047 ൽ വികസിത ഭാരതം എന്ന ലക്ഷ്യത്തിലെത്താൻ അടുത്ത 22 വർഷം 7.8% നിരക്കിൽ സാമ്പത്തിക വളർച്ച ഉറപ്പാക്കേണ്ടി വരുമെന്ന് 2025 ഫെബ്രുവരിയിൽ ലോക ബാങ്ക് പറഞ്ഞിരുന്നു.2024-25 വർഷത്തെ സാമ്പത്തിക സർവ്വേ റിപ്പോർട്ടിലും 8% വളർച്ചാ നിരക്ക് നേടേണ്ടതിൻ്റെ ആവശ്യകത ഊന്നി പറഞ്ഞിരുന്നു.