

 തൊണ്ണൂറുകളിലെ തമിഴ് ഗ്രാമീണ പശ്ചാത്തലത്തിലെ രണ്ടു സുഹൃത്തുക്കളുടെ കഥയാണ് ഡോറോത്തി പറയുന്നത്. വളരെ റസ്റ്റിക് ആയ ഒരു ഗ്രാമീണജീവിതത്തില്‍ നിന്നും ആരംഭിക്കുന്ന സിനിമ സാര്‍വലൗകികമായ ഒരു തലത്തിലേക്ക് ഉയര്‍ത്തപ്പെടുകയാണ്. 



ഷോക്ക്, കണ്‍ഫ്രണ്ടേഷന്‍, അക്‌സെപ്റ്റന്‍സ് എന്നിങ്ങനെ വിവിധ തലങ്ങളിലൂടെ വികസിക്കുന്ന ഒരു സീനിന്റെ ഇമോഷണല്‍ കണ്ടിന്യൂയിറ്റി ടോപോഗ്രഫിയുടെ വിവിധ തലങ്ങളില്‍ ; നിരത്തില്‍, പടികളില്‍, മലമുകളില്‍ എന്നിങ്ങനെ പ്രസന്റ് ചെയ്യുന്നതു പോലുള്ള രസകരമായ സീക്വന്‍സുകള്‍  ഡോറോത്തിയില്‍ കാണാം.

 



ആക്ഷന്‍ സീനുകള്‍ ചിത്രീകരിച്ചിരിക്കുന്നത് അപൂര്‍വമായൊരു രീതിയിലാണ്. അത്രമേല്‍ റിയലിസ്റ്റിക്കും നാടകീയവുമാണത്.

സിനിമയുടെ ക്ലൈമാക്‌സിനോടടുത്തൊരു രംഗമുണ്ട്,  രണ്ടു കഥാപാത്രങ്ങള്‍ കൂറ്റന്‍ പാറക്കെട്ടുകള്‍ക്കു മുന്നില്‍ സംസാരിക്കുന്ന ഒരു ഫ്രെയിം. സമൂഹം എന്തു വിചാരിക്കുമെന്നതാണ് വിഷയം. ഈ വലിയ ലോകത്തില്‍ ഒരു പാട്രിയാര്‍ക്കിയല്‍ സമൂഹത്തിന്റെ കണ്‍സേണ്‍ എന്നത് അത്ര വലിയ കാര്യമൊന്നുമല്ലെന്ന് പറയാതെ പറയുന്നതാണ് ആ ഫ്രെയിം. Sublime എന്ന തച്ചുശാസ്ത്ര സിദ്ധാന്തമാണത്. വലിയ ക്ഷേത്രഗോപുരങ്ങളും അകത്തളങ്ങളും സാധാരണ മനുഷ്യനോട് നീ നിസ്സാരനാണെന്ന് പറയുന്ന പോലെ. കാര്‍ത്തിക് അതെടുത്ത് തിരിച്ച് പ്രയോഗിക്കുകയാണിവിടെ.  



ഡൊറോത്തി

അപാരമായ സംഘടനാപാടവം കൊണ്ട് ആയിരങ്ങളുടെ ജീവിതസന്ധ്യകളിൽ കലയുടെ വിവിധ ഭാവങ്ങൾ വിതറി സമ്പന്നമാക്കിയ സൂര്യ കൃഷ്ണമൂർത്തി അക്കരെയെത്തുമ്പോൾ, നിറപുഞ്ചിരിയോടെ ഒരു കൈസഹായവുമായി ഒരാൾ കാത്തുനിൽക്കുന്നുണ്ടാകും; സൂര്യയുടെ അവതരണങ്ങൾക്ക് വയലിൻ തന്ത്രികളിൽ സംഗീതമഴ തീർത്ത നമ്മുടെ സ്വന്തം ബാലഭാസ്കർ. ഒന്നാലോചിച്ചാൽ, കലാസ്നേഹികൾക്ക് ബാലഭാസ്കറും സൂര്യ കൃഷ്ണമൂർത്തിയും ഒരേ അനുഭൂതിയുടെ രണ്ടു മുഖങ്ങളാണ്. സ്വർഗ്ഗവും നരകവും ഉണ്ടോ ഇല്ലയോ എന്ന തർക്കങ്ങളൊക്കെ അവിടെ നിൽക്കട്ടെ, കൗതുകത്തിന് ഉണ്ടെന്നുതന്നെ കരുതുക. എങ്കിൽ ഹാ... എത്ര മനോഹരമായിരിക്കും ഇനിയുള്ള സ്വർഗ്ഗീയ ദിനങ്ങൾ! ഇരുവരും ഒന്നിക്കുമ്പോൾ സംഗീതവും നൃത്തവും നാടകവും സിനിമയും കഥാപ്രസംഗവും പ്രഭാഷണങ്ങളും ലൈറ്റ് ആൻഡ് സൗണ്ട് ഷോകളുമൊക്കെയായി സ്വർഗ്ഗം വാസ്തവത്തിൽ ഇനിയാണ് കൂടുതൽ 'സ്വർഗ്ഗീയ'മാകാൻ പോകുന്നത്

ഇന്ത്യയിലുടനീളവും വിദേശരാജ്യങ്ങളിലുമായി പതിനായിരക്കണക്കിന് അംഗങ്ങളുള്ള ‘സൂര്യ’ കലയെ ജനകീയമാക്കുന്നതിൽ വഹിച്ച പങ്കിന്റെ ചരിത്ര പശ്ചാത്തലം ഏറെ വേറിട്ടതാണ് .

അണയാത്ത സൂര്യശോഭ

എന്തിനാണ് ശുനകൻമാർക്ക് എന്നോട് ഇത്ര ചതുർത്ഥിയെന്ന് ഞാൻ തലപുകഞ്ഞ് ആലോചിക്കാറുണ്ട്. അവരുടെ കാഴ്ചയിൽ എനിക്ക്  അവരുടെയത്ര പൊക്കമേയുള്ളൂ.അതിനാൽ ഞാനൊരു കുട്ടിയാണെന്നു കരുതുന്നതുകൊണ്ടാവുമോ? സാധ്യതയില്ല.കുട്ടികളോട് നായകൾക്ക് വലിയ ഇഷ്ടമാണെന്നാണ് കേൾവി.

എന്റെ വീട്ടിലുമുണ്ടായിരുന്നു ഒരു നായ് ജന്മം. ലോകത്തുള്ള ആരെ കണ്ടാലും അവന് കരുണ നിറഞ്ഞ ഭാവം. എന്നാൽ എൻ്റെ നിഴൽ കണ്ടാൽ മതി ,അവന്റെ ഭാവം രൗദ്രത്തിലേക്ക് മാറി  കുരയായ് പ്രവഹിക്കാൻ . 

രാത്രി മാത്രമാണ് ഈ കശ്മലനെ  തുറന്നു വിടുന്നത്. സ്റ്റേജ് പ്രോഗ്രാം കഴിഞ്ഞ് രാത്രിയുടെ അന്ത്യയാമത്തിലാണ് പലപ്പോഴും എന്റെ വരവ്. എന്നെ കണ്ടാലുടൻ തുടങ്ങുന്ന ഇവൻ്റെ അസഹനീയമായ കുരയാണ് വീട്ടുകാരെ വിളിച്ചുണർത്തുന്ന കോളിംഗ് ബെൽ .  ചിലപ്പോൾ ഇവൻ കാണാതെ പതുക്കെ ഞാൻ ഇരുട്ടിൽ നിന്നുകൊണ്ട് വീടിന്റെ മറുവശത്തേക്ക് ഒരു കല്ലോ കമ്പോ എറിയും . ശബ്ദം കേട്ട് അവൻ അങ്ങോട്ടേക്ക് ഓടുമ്പോൾ ഞാൻ മതിൽ ചാടി ഓടി അകത്തു കയറും. നമ്മളോടാ അവന്റെ കളി!

പിന്നെ എല്ലാം പെട്ടെന്നായിരുന്നു.അവൻ മുന്നും പിന്നും നോക്കിയില്ല. എന്റെ നേർക്ക് ചാടി വീണ അവൻ തടയാനുയർത്തിയ എന്റെ രണ്ടു കൈകളും ചന്നം പിന്നം കടിച്ചു കീറി.എന്റെ കൈകളുടെ രുചി അവൻ ആസ്വദിച്ചു. പച്ച മാംസം കടിച്ചു പറിക്കുന്നതു സംബന്ധിച്ച് ഈയിടെ ആരോ ആലങ്കരികമായി പറയുന്നത് കേട്ടു. പക്ഷേ അന്ന് ഞാനത് നേരിട്ട് അനുഭവിച്ചു.  രക്തം വാർന്നൊഴുകി. വേദന കൊണ്ട് ഞാൻ പുളഞ്ഞു. കെട്ട് വിട്ട് സ്വബോധത്തിലേക്ക് വന്ന ഞാൻ ഓടി ഒരു മൂലയിലേക്ക് മാറി ഒറ്റയ്ക്കിരുന്ന്  മോങ്ങി. അവൻ എന്നെ തിന്നു തീർക്കാത്തത് ഭാഗ്യം എന്നു മാത്രമേ ഇപ്പോൾ ആലോചിക്കുമ്പോൾ എനിക്ക് തോന്നുന്നുള്ളൂ.

കൈയ്യിലെ വേദന കുത്തിവയ്പായ് പള്ളയിലേക്കും ശരീരത്തിന്റെ മറ്റു ഭാഗങ്ങളിലേക്കും പടർന്നു. ഒന്നരമാസം ഞാൻ ഇതും  കൊണ്ട് കിടന്നു. പക്ഷേ ആ സംഭവത്തോടെ അവനിൽ കാര്യമായ മാറ്റം വന്നു. പിന്നെ മരിക്കും വരെ  അവൻ എന്നെ നോക്കി കുരച്ചിട്ടില്ല. (എന്നെ കണ്ടാലല്ലേ  കുരയ്ക്കേണ്ടതുള്ളൂ.ഞാനവന്റെ ഏഴയലത്ത് പോയിട്ടു വേണ്ടേ !)



സംവിധായകനായ അലൻസിയർ തിരുവനന്തപുരത്തെ തീരദേശ ഗ്രാമമായ പുത്തൻ തോപ്പിൽ നിന്ന് പുലർച്ചെ നാലുമണിക്ക് കടലിനോട് മല്ലടിച്ച് ജീവിക്കുകയും നാടകത്തെ
ജീവനുതുല്യം സ്നേഹിക്കുകയും ചെയ്യുന്ന കുറെ ചങ്ങാതിമാരെ  ഒരു കാറിൽ കുത്തിനിറച്ച് അമ്പലമുക്കിലുള്ള എന്റെ  വീട്ടിൽ വരും. അവിടെ നിന്ന്  എന്നെ ഉണർ ത്തിയെടുത്ത്  അടുത്തുള്ള സ്കൂൾ ഗ്രൗണ്ടിലത്തി റിഹേഴ്സൽ തുടങ്ങും. ഞാനാണ് പരിശീലന കേന്ദ്രത്തിലെ ട്രയിനർ. കഥാപാത്രമായി മാറുന്ന ഞാൻ കുരയ്ക്കാനും ഓലിയിടാനും പഠിപ്പിക്കുന്നു, മറ്റുള്ളവർ കോറസ്സായി ഉറക്കെ കുരയ്ക്കുകയും ഓലിയിടുകയും ചെയ്യുന്നു...നേരം പരപരാ വെളുക്കുന്നതിനുമുമ്പാണ് ഈ പ്രഹസനം എന്നോർക്കുക.  കുറെയേറെ തെരുവ് നായ്ക്കൾ സ്വസ്ഥമായി ഉറങ്ങിയിരുന്നത് ഈ ഗ്രൗണ്ടിലാണ്. ഞങ്ങളുടെ കുര കേൾക്കുമ്പോൾ തന്നെ ഇവറ്റകൾ ഉറക്കം പോയി ചാടിയെഴുന്നേല്ക്കും. പിന്നെ നിസ്സഹായരായി ഒരു നിൽപ്പാണ്. 
ശല്യം!ഇവനൊക്കെ വേറേ ഒരു പണിയുമില്ലേ.... നാടകമാണു പോലും നാടകം ! നമ്മുടെ ഉറക്കം കളയാനായിട്ട്.... 

അതെ അതു തന്നെയാണ്  കാരണം.എന്നെക്കൊണ്ട് ഇത് ചെയ്യിച്ച അലൻസിയർ ഉൾപ്പെടെയുള്ളവർ സ്കൂട്ടായി മാന്യൻമാരായി നിർഭയം നടക്കുന്നു.  
നായ്ക്കൾ അന്നുമുതൽ ഇന്നോളം പ്രതികാര ചിന്തയുമായി എന്റെ പിന്നാലെ വരുന്നു.. ഞാൻ ഓടിത്തള്ളിക്കൊണ്ടേയിരിക്കുന്നു. 
"ബൗ...ഭൗ..."
ഓടിക്കോ.... പിന്നാലെ പട്ടിയുണ്ടേ.....

പട്ടിയുണ്ട്.. സൂക്ഷിക്കുക.

സംവിധായകൻ, തിരക്കഥാകൃത്ത്, ഡോക്യുമെന്ററി ചലച്ചിത്രകാരൻ, ഗവേഷകൻ, സാംസ്കാരിക പ്രവർത്തകൻ—ഇങ്ങനെ പല തലങ്ങളിലായി പടർന്നുനിന്നതായിരുന്നു അദ്ദേഹത്തിന്റെ സർഗജീവിതം. ഒൻപത് അന്താരാഷ്ട്ര പുരസ്കാരങ്ങൾ, ഒരു ദേശീയ പുരസ്കാരം, നാല് കേരള സംസ്ഥാന ചലച്ചിത്ര പുരസ്കാരങ്ങൾ എന്നിവ അദ്ദേഹത്തിന്റെ ചലച്ചിത്രജീവിതത്തിന് ലഭിച്ച അംഗീകാരങ്ങളുടെ ഔദ്യോഗിക കണക്കുകളാണ്. എന്നാൽ ആ കണക്കുകൾക്കപ്പുറം, കലയും സമൂഹവും ചരിത്രവും മനുഷ്യനും തമ്മിലുള്ള ബന്ധം അന്വേഷിച്ച ഒരു സൃഷ്ടിമനസ്സിന്റെ യാത്രയായിരുന്നു ശരത്തിന്റേത്.

തുടർന്നുവന്ന ‘സ്ഥിതി’ ഒരു മധ്യവർഗ ദമ്പതികളുടെ ജീവിതത്തിലേക്ക് ഭാഗ്യത്തിന്റെ അപ്രതീക്ഷിത പ്രഹരങ്ങൾ കടന്നുവരുമ്പോഴുണ്ടാകുന്ന സംഘർഷങ്ങളുടെ കഥയായിരുന്നു. 2003-ലെ ബാങ്കോക്ക് അന്താരാഷ്ട്ര ചലച്ചിത്രോത്സവത്തിൽ പ്രദർശിപ്പിക്കപ്പെട്ട ചിത്രം നിരവധി അന്താരാഷ്ട്ര വേദികളിൽ ശ്രദ്ധിക്കപ്പെട്ടു.

‘ശീലാബതി’യിലൂടെ ശരത് മറ്റൊരു സാമൂഹിക യാഥാർഥ്യത്തിലേക്ക് കടന്നു. ഗ്രാമീണ കേരളത്തിന്റെ പശ്ചാത്തലത്തിൽ സമൂഹത്തിന്റെ ഇരുണ്ട വശങ്ങളെ തുറന്നുകാട്ടിയ ചിത്രം, ഗ്രാമത്തിന് പുറത്തുനിന്നെത്തുന്ന രണ്ടു യുവാക്കളുടെ അനുഭവങ്ങളിലൂടെയാണ് കഥ പറഞ്ഞത്. പ്രേക്ഷകസ്വീകാര്യത നേടിയ ഈ ചിത്രം തായ്‌വാനിലെ ഏഷ്യ-പസഫിക് ചലച്ചിത്രോത്സവത്തിലും പ്രദർശിപ്പിക്കപ്പെട്ടു.

‘പറുദീസ’യിൽ ശരത് മതത്തിന്റെ യാഥാസ്ഥിതികവും നവീനവുമായ വഴികൾ തമ്മിലുള്ള സംഘർഷത്തിലേക്ക് തിരിഞ്ഞു. വിശ്വാസവും ചിന്തയും തമ്മിലുള്ള നിരന്തരമായ വാദപ്രതിവാദങ്ങൾ ചിത്രം പരിശോധിച്ചു. മെക്സിക്കൻ, ആംസ്റ്റർഡാം അന്താരാഷ്ട്ര ചലച്ചിത്രോത്സവങ്ങളിൽ പുരസ്കാരങ്ങൾ നേടിയ ചിത്രം ഇന്നും അന്താരാഷ്ട്ര  വേദികളിൽ പ്രദർശിപ്പിക്കപ്പെടുന്ന സിനിമകളിലൊന്നാണ്.
ചാർലി ചാപ്ലിന്റെ കലാജീവിതത്തോടുള്ള ശരത്തിന്റെ ആദരവായിരുന്നു ‘ബുദ്ധൻ ചിരിക്കുന്നു’. ചാപ്ലിനെ ആരാധിക്കുന്ന ഒരു ഇന്ത്യൻ ഹാസ്യകലാകാരന്റെ ജീവിതത്തിലൂടെ മഹാനായ കലാകാരനെ ഓർക്കുന്ന ചിത്രം, അനുകരണത്തിനപ്പുറം സ്വന്തം കലാഭാഷ കണ്ടെത്തേണ്ടതിന്റെ ആവശ്യകതയും മുന്നോട്ടുവച്ചു.
 ഒടുവിൽ പുറത്തിറങ്ങിയ ‘സ്വയം’ ഓട്ടിസവുമായി ബന്ധപ്പെട്ട സാമൂഹികമായ മുൻവിധികളിലേക്കും അകറ്റിനിർത്തലുകളിലേക്കുമാണ് ശ്രദ്ധ തിരിച്ചത്.

‘പുരാണിധുൻ’, ‘ദി പെയിന്റഡ് എപിക്സ്’, ‘ഡിവൈൻ ലവ്’, ‘ലാസ്യാംഗന’ തുടങ്ങിയ ഡോക്യുമെന്ററികളിലൂടെ കലയും ദൃശ്യസൗന്ദര്യവും ചരിത്രവും സംയോജിപ്പിച്ച വ്യത്യസ്തമായ ചലച്ചിത്രഭാഷ അദ്ദേഹം സൃഷ്ടിച്ചു.
ഒ. എൻ. വി. കുറുപ്പിന്റെ പ്രശസ്ത കവിതയെ ആസ്പദമാക്കി ഒരുക്കിയ ‘ഭൂമിക്കൊരു ചരമഗീതം’ പരിസ്ഥിതി ബോധവും ഫെമിനിസ്റ്റ് സൗന്ദര്യശാസ്ത്രവും കൂട്ടിയിണക്കിയ ഡോക്യു-ഫിക്ഷനായിരുന്നു. 
പത്ത് ഡോക്യുമെന്ററികളും അഞ്ച് ഹ്രസ്വചിത്രങ്ങളും ശരത്തിന്റെ സർഗപൈതൃകത്തിന്റെ ഭാഗമാണ്.

ഇന്ത്യയിലെ ആദ്യകാല ശ്രദ്ധേയ മൾട്ടിമീഡിയ സംരംഭങ്ങളിലൊന്നായ ‘ഗീതഗോവിന്ദ’യിൽ വിഷ്വൽ ഡയറക്ടറായും അദ്ദേഹം പ്രവർത്തിച്ചു. ഇന്ദിരാഗാന്ധി നാഷണൽ സെന്റർ ഫോർ ദ ആർട്സും അമേരിക്കയിലെ സിറോക്സ് PARC-ഉം സഹകരിച്ച ഈ സംരംഭത്തിന് ഡോ. കപില വാത്സ്യായനാണ് തിരക്കഥ ഒരുക്കിയത്.

2007-ൽ ലണ്ടനിൽ നടന്ന IUKFF-ന്റെ ഫെസ്റ്റിവൽ ഡയറക്ടറായി പ്രവർത്തിച്ച അദ്ദേഹം 2011-ലെ ദേശീയ ചലച്ചിത്ര പുരസ്കാര ജൂറി അംഗമായും 2012-ലെ കേരള സംസ്ഥാന ടെലിവിഷൻ പുരസ്കാര ജൂറി ചെയർമാനായും ചുമതല വഹിച്ചു.

ആർ. ശരത്തിന്റെ വിയോഗം ഒരു സംവിധായകന്റെ മാത്രം വിടവാങ്ങലല്ല. സിനിമയെ ഒരു വിനോദമാധ്യമത്തിനപ്പുറം ചരിത്രത്തെയും സംസ്കാരത്തെയും മനുഷ്യാവസ്ഥയെയും അന്വേഷിക്കുന്ന ദൃശ്യഭാഷയായി കണ്ട ഒരു കലാകാരന്റെ അഭാവം കൂടിയാണ്.

തിരശ്ശീലയിൽ ഒരു ചിത്രം അവസാനിക്കുമ്പോൾ വെളിച്ചം അണയുന്നു. എന്നാൽ ചില ദൃശ്യങ്ങൾ മനസ്സിൽ തുടരുന്നു.
ആർ. ശരത്തിന്റെ ചലച്ചിത്രജീവിതവും അത്തരമൊരു ദൃശ്യമാണ്—തിരശ്ശീലയ്ക്കപ്പുറവും ഏറെക്കാലം തെളിഞ്ഞുനിൽക്കുന്ന ഒരു ദൃശ്യം.


ആർ.ശരത്: തിരശ്ശീലയ്ക്കപ്പുറം അവശേഷിക്കുന്ന ദൃശ്യങ്ങൾ

ഒരു കാലത്ത് കേരളത്തിൽ വീടുകളിലും പൊതു ഇടങ്ങളിലും റേഡിയോയിലൂടെ ശബ്ദ തരംഗങ്ങളായി ഒഴുകി നിറഞ്ഞശബ്ദങ്ങൾ...
ഗംഭീരവും അത്യാകർഷകവുമായ ആ ശബ്ദങ്ങൾ കേട്ടവർ അതിനു പിന്നിലെ സുന്ദരരൂപങ്ങൾ അവരവരുടെ ഭാവനകൾക്കനുസരിച്ച് സങ്കല്പിച്ചുണ്ടാക്കി,അവരുമായി ഇഷ്ടത്തിലാവുകയും അവരെ ഹൃദയത്തിൽ വച്ച് ആരാധിക്കുകയും ചെയ്തു. 

പ്രധാന പരിപാടികൾക്കിടയിലെ പരസ്യങ്ങളിൽ ശബ്ദമായി വന്ന് രൂപമായുയർന്നവർ  വർഷങ്ങൾക്കിപ്പുറത്ത് അക്ഷരരൂപം പൂണ്ട് നമ്മുടെ മുന്നിൽ നില്ക്കുകയാണിപ്പോൾ.


സ്പോട്ട് സുരേഷ് അറിയപ്പെടുന്നത് വെറുമൊരു ശബ്ദ കലാകാരനായല്ല. മലയാള ചലച്ചിത്ര ഗാനങ്ങളെക്കുറിച്ച് ആഴത്തിൽ പഠനങ്ങൾ നടത്തിയിട്ടുള്ള ഭാഷാശുദ്ധിയുള്ള ഒരാൾ... നല്ല പാട്ടുകൾക്കും പാട്ടിനു പിന്നിലും മുന്നിലും പ്രവർത്തിച്ചവർക്കുമൊപ്പം എത്രയോ സാർത്ഥക സഞ്ചാരങ്ങൾ നടത്തിയ ഗാനാരാധകൻ. അവതാരകൻ... എന്നാൽ ശബ്ദം തന്നെയായിരുന്നു എക്കാലത്തും സുരേഷിനെ മുന്നോട്ടു നയിച്ചത്.

ശബ്ദത്തിന്റെ സാധ്യതകളോട് പ്രത്യേകമായൊരു ആഭിമുഖ്യത്തോടെയാണ് സുരേഷ് തന്റെ യാത്ര ആരംഭിച്ചത്. ആ ആഭിമുഖ്യം പിന്നീട് അദ്ദേഹത്തെ പരസ്യലോകത്തേക്ക് എത്തിച്ചു. വർഷങ്ങളോളം റേഡിയോ പരസ്യങ്ങൾക്ക് ശബ്ദം നൽകുകയും ആ രംഗത്തിന്റെ അകത്തും പുറത്തുമുള്ള മാറ്റങ്ങൾക്ക് സാക്ഷിയാകുകയും ചെയ്തു.അത്തരം ഒരാളുടെ അനുഭവസമ്പത്താണ് ഈ പുസ്തകത്തിന്റെ പ്രധാന കരുത്ത്.
ഇത് കേവലം റേഡിയോ പരസ്യങ്ങളുടെ മാത്രമല്ല അതിന്റെ ഭാഗമായ മനുഷ്യരുടെയും ചരിത്രമാണ്... 



റേഡിയോ പരസ്യരംഗത്തെ പ്രമുഖനായ പി. എൻ. നാണപ്പൻ ഉൾപ്പെടെയുള്ള പ്രതിഭകളെക്കുറിച്ചുള്ള വിവരങ്ങൾ ശേഖരിക്കുമ്പോൾ നേരിട്ട വെല്ലുവിളികൾ പുസ്തകം തുറന്നുപറയുന്നു. 

അങ്ങിനെ വീണ്ടെടുത്ത
28 പ്രതിഭകൾ… 

നിശ്ശബ്ദതയിലേക്ക് മറയാൻ തുടങ്ങിയ വിസ്തൃതമായ ഒരു  ശബ്ദലോകം അനിഷേധ്യമായ മുഴക്കത്തോടെ ഒടുവിൽ നമ്മുടെ മുന്നിൽ...


പരസ്യങ്ങളുടെ പിന്നിൽ  ഇമ്പമാർന്നു നിന്ന ശബ്ദങ്ങളെ വീണ്ടും കേൾക്കുക മാത്രമല്ല, അവയ്ക്ക് പിന്നിലെ മനുഷ്യരെ തിരിച്ചറിയുക കൂടിയാണ് ‘നാദം ഇന്ദ്രജാലം’ ചെയ്യുന്നത്..

New book - നാദം ഇന്ദ്രജാലം

നാദം..ഇന്ദ്രജാലം.. 
On the SPOT

ചവിട്ടുവണ്ടി എന്ന ചെറുകഥയിൽ  കല്യാണിയച്ചിയിൽ  ശവരതി നടത്തുന്ന നാട്ടുകാരുടെ കാഴ്ചകളും രൂപകങ്ങളും വർണിക്കുകയാണ് ഒ.വി വിജയൻ.

മരിച്ച പെണ്ണുടലുകളെ കാമിക്കുന്ന ശവരതി അഥവ നെക്രോ ഫീലിയ(Necro phillia) മനസിന്റ കുറ്റമാണ്. ശവശരീരവുമായി ലൈംഗിക വേഴ്ചയിൽ ഏർപ്പെടുന്ന സംഭവങ്ങളിൽ അതു ബീഭൽസ രൂപം കൈവരിക്കുന്നു.

നഗ്നമായ പെണ്ണുടലുകളെ  ഭോഗിക്കുന്നതും  അതു നിത്യദാന കർമമാക്കുന്നതും ഉദ്ധാരണ ക്കുറവിന്റെ ഉത്കണ്ഠകളും കണവനെ സാക്ഷിയാക്കിയുള്ള അരാജക ലൈംഗികതയും  ധർമപുരാണത്തിൽ നിറഞ്ഞു നിൽക്കുന്നതു കാണാം.  അധികാരം ധർമപുരിയിലെ സദാചാരത്തെയും അന്തസ്സിനെയും എങ്ങനെ  മാനവിക വിരുദ്ധമാക്കി മാറ്റുന്നു എന്നു ഈ നോവൽ നമുക്ക് കാണിച്ചു തരുന്നു. 

ചാവിനു സമ്മതം മൂളുന്നതും  വെപ്പാട്ടിയാകുന്നതും ദേശാഭിമാനവും എതിർക്കുന്നത് ദേശദ്രോഹവുമാകുന്ന ഭൂമികയാണ് ഈ പുരാണം.
ശവശരീര കയറ്റുമതി രാജ്യത്തു വിദേശനാണ്യം കുന്നുകൂട്ടും. രാജ്യം വികസനത്തിൽ  കുതിക്കും. അതാണ്  തിരുവചനം. അപ്പോൾ
മരിച്ചു കൊടുക്കുക എന്നത്  പൗരധർമവും..

മാർക്കേസ് ഏകാധിപതികളെ മലീമസമായ  പ്രഭാവം(shitty grandour) എന്നു വിളിച്ചു. വിജയന് അത് തീട്ടത്തിന്റെ അരചനായി.
തീട്ടം എന്ന അറപ്പും വെറുപ്പും ഉളവാക്കുന്ന വാക്ക്  ശുദ്ധവും സരളവും അബോധപൂർവ്വം ശിശുക്കൾ നടത്തുന്ന പ്രതിഷേധവുമാണ്. 

പുരോഗമനം ആവി പറത്തിയ നാളുകളിൽ അഭിജാത സമൂഹത്തിനു നേരെ മലം വാരി വാരി എറിഞ്ഞത് തകഴിയാണ്. അസമത്വവും ചൂഷണവും നിറഞ്ഞ കഥ പറഞ്ഞത് തോട്ടിയുടെ മകനിലുടെ. വലിയവന്റെ തീട്ടം തിന്നു ജീവിക്കരുതെന്ന സാധാരണക്കാരുടെ വായ്മൊഴി വഴക്കവും ഒവി വിജയന്റെ തീട്ട വിചാരണയെ മറ്റൊരു തലത്തിൽ എത്തിക്കുന്നു.

അസംബന്ധങ്ങളായ ഭരണകൂടങ്ങളും ചരിത്രത്തിന്റെ പാപങ്ങളും മനുഷ്യാവസ്ഥയുടെ നിസഹായതകളും  നിറഞ്ഞതാണ് ആധുനിക രാഷ്ട്രതന്ത്രം എന്നു ധർമപുരാണം അടിവരയിടുന്നു.കൊടിയും  പ്രത്യയ ശാസ്ത്രവും  തൊലിപ്പുറത്തു  മാത്രമാക്കുന്ന ഭരണകൂടങ്ങൾ ക്രൗര്യത്തിന്റെയും സ്നേഹശൂന്യതയുടെയും ഇടമായി  മാറുന്നു

അഴുക്കിൽ ചാലിച്ച ഗീതാദു:ഖമായാണ് ധർമപുരാണത്തെ ഡോ.വി.രാജാ കൃഷ്ണൻ അടയാളപ്പെടുത്തുന്നത്.കെപി അപ്പന് ഇത് ചരിത്രത്തിന്റെ കാരുണ്യം നിറഞ്ഞ വസ്ത്രാക്ഷേപമാകുന്നു. ഈ പുരാണം ഒരു വെളിപാടും എവിടെയും വഞ്ചിക്കപ്പടുന്ന  വിപ്ലവങ്ങളുടെ ബാക്കിപത്രവുമായും ചുരുങ്ങുന്നു

പടനായകാ, ജനങ്ങൾ യുദ്ധം ആവശ്യപ്പെടുന്നു. സ്ത്രീകൾ വൈധവ്യം ആവശ്യപ്പെടുന്നു. കുഞ്ഞുങ്ങൾ അനാഥത്വവും. പടനായക, ഞങ്ങൾ എന്തു ചെയ്യണമെന്നു അരുളിയാലും.

ശവങ്ങളെയും വിധവകളെയും അനാഥ ശിശുക്കളെയും കാട്ടി  ഭരണകൂടം ജനങ്ങളെ ദേശാഭിമാനം പഠിപ്പിച്ചു.പട്ടാളക്കാരുടെ ജഡങ്ങളെ നോക്കി ആളുകൾ മുദ്രാവാക്യം മുഴക്കി.

ധർമ്മ പുരാണം കുറിച്ച വ്യാസൻ ഇന്നില്ല. ബുദ്ധിപരമായി ഒരു ജനായത്ത വാദിയും വൈകാരികമായി ഒരു അരാജകവാദിയുമായ വിജയന്റെ ഉൾക്കാഴ്ചകളും പ്രവചനങ്ങളും ഞെട്ടിക്കുന്ന വെളിപാടുകളും പങ്കിടുന്ന  ഈ പുരാണം പലവുരു വായിക്കപ്പെട്ടു. ആണ്ടുകളായി. പലരും സെലക്ടിവായി അവശ്യം വേണ്ടതു മാത്രം ഉദ്ധരിച്ച് മിടുക്കരായി.  എല്ലാറ്റിനെയും അതിലംഘിക്കുന്ന   നോവലിലെ സനാതന വിവക്ഷകളും  മാനവ സമൂഹത്തിനു മേലുള്ള ധ്വംസനങ്ങളും ഒരു ഒഴിയാബാധപോലെ   എന്നും മാനവികതയെ വേട്ടയാടുമെന്നതിൽ സംശയമില്ല.

Recent in Culture