ഭാരതത്തിന്റെ പ്രധാന സേവകനും രാജ്യസുരക്ഷയിൽ ഏർപ്പെട്ടിരിക്കുന്ന നമ്മുടെ വീര ജവാന്മാരും തമ്മിലുള്ള ഈ സവിശേഷ ബന്ധം കേവലം യാദൃശ്ചികതയല്ല; മറിച്ച്, രാജ്യസുരക്ഷയ്ക്കായി കുടുംബവും സുഖസൗകര്യങ്ങളും മാറ്റിവെച്ച് അതിർത്തികളിൽ ഉറക്കമിളയ്ക്കുന്ന ജവാന്മാരുടെ ത്യാഗത്തിന് നൽകുന്ന ആദരവാണ്. മുൻകാല പ്രധാനമന്ത്രിമാർക്ക് ആർക്കും ഇല്ലാതിരുന്ന ശീലം. ജനങ്ങളുടെ സേവകൻ മാത്രമാണ് താനെന്ന ബോധ്യത്തിൽ നിന്നാണ് ഉടലെടുക്കുന്നതിൻ്റെ പരിണത ഫലം കൂടിയാണ് സൈനികരും ഒത്തുള്ള ദീപാവലി ദിനം പങ്കിടൽ. തിന്മയുടെയും അജ്ഞതയുടെയും അഹങ്കാരത്തിന്റെയും അന്ധകാരത്തിനെതിരെ പൊരുതാനുള്ള പ്രതിജ്ഞാബദ്ധത വിളിച്ചോതുന്ന ദീപാവലി രാവുകളിൽ ഭാരതത്തിലെ കോടിക്കണക്കിന് ജനങ്ങളും അതിർത്തി കാക്കുന്ന സൈനികരുമാണ് തന്റെ കുടുംബമെന്ന് പ്രവൃത്തിയിലൂടെ കാട്ടിക്കൊടുക്കുകയാണ് നരേന്ദ്ര മോദി.