ഓപറേഷൻ സിന്ദൂർ, പാകിസ്താനുമായുള്ള വെടി നിറുത്തൽ, മധ്യസ്ഥതയിൽ അമറിക്കയുടെ പങ്ക് ഇവയെല്ലാം ചർച്ച ചെയ്യാൻ പാർലമെന്റിന്റെ പ്രത്യേക സമ്മേളനം വിളിച്ചു ചേർക്കണമെന്ന ആവശ്യത്തിൽ പ്രതിപക്ഷ സഖ്യത്തിൽ തന്നെ വിള്ളൽ വന്നിരിക്കുന്നു. രാജ്യസുരക്ഷയെയും പ്രതിരോധത്തെയും ബാധിക്കാവുന്ന ഈ വിഷയം പാർലമെന്റിൽ ചർച്ച ചെയ്യുന്നതിനോട് യോജിക്കുന്നില്ലെന്ന് ഇന്ത്യാ സഖ്യത്തിലെ പ്രമുഖ കക്ഷികളിലൊന്നായ എൻസിപി യുടെ നേതാവ് ശരത് പവാറാണ് അഭിപ്രായപ്പെട്ടത്. വിഷയം ചർച്ച ചെയ്യാൻ ഒരു സർവ്വ കക്ഷി സമ്മേളനമാണ് വിളിക്കേണ്ടതെന്നും ശരത് പവാർ പറഞ്ഞു. തീവ്രവാദത്തിനെതിരേ രാജ്യം പൊരുതുകയും ലോകത്തിനു മുന്നിൽ വിലയിരുത്തപ്പെടുകയും ചെയ്യുമ്പോൾ പ്രതിപക്ഷ രാഷ്ട്രീയ കക്ഷികൾ എന്തു നിലപാടാണ് എടുക്കേണ്ടത്? ശരത് പവാർ അതിലേക്കാണ് എത്തിയിരിക്കുന്നത്. തുടക്കം മുതൽ ഇത് മനസ്സിലാക്കി നീങ്ങിയ മറ്റൊരാൾ; ഒരു പക്ഷേ പ്രതിപക്ഷത്തെ ഒരേയൊരാൾ, ഡോ ശശി തരൂരാണ്.

അതിർത്തി കടന്നുള്ള ഭീകരതയ്ക്ക് ഉചിതമായ മറുപടി നൽകാൻ ഓപ്പറേഷൻ സിന്ദൂറിന്റെ അനിവാര്യതയെ തരൂർ എടുത്തു കാട്ടി.സിവിലിയൻ നാശനഷ്ടങ്ങളും അനാവശ്യമായ സംഘർഷവും ഒഴിവാക്കാൻ ഇന്ത്യ ജാഗ്രത കാട്ടിയതായും ശശി തരൂർ പറഞ്ഞു.

ചുരുക്കത്തിൽ, ഇന്ത്യയ്ക്കുവേണ്ടി കക്ഷിരാഷ്ട്രീയ വ്യത്യാസം ബാധിക്കാതെ സംസാരിച്ച് ശശി തരൂർ തന്റെ പാർട്ടിക്കുള്ളിൽ ദേശീയതയുടെയും അനിവാര്യമായ നയതന്ത്രജ്‌ഞതയുടെയും പ്രതീകമായി ഉയർന്നു നില്ക്കുന്നു.