ആസൂത്രിതമായ കൊള്ളയും കവർച്ചയും മോഷണവും തിരിമറികളും നിത്യാഭ്യാസമാക്കിയ ഒരു അധോലോക സംഘമാണ് ഇന്നു നവകേരളം സൃഷ്ടിക്കാൻ വേഷ്ടിയും മുറുക്കി നമ്മുടെ മുന്നിൽ മൂന്നാം കിട കിടിതാപ്പുകളുമായി നാണവും ഉളുപ്പുമില്ലാതെ ഒളിസേവ നടത്തുന്നത്.

ജനക്ഷേമവും തൊഴിലാളി ക്ഷേമവും വിപ്ലവവും കയറ്റിറക്കാനും ജനനവും ജീവിതവും ഉഴിഞ്ഞും പിഴിഞ്ഞും വച്ചു എന്നു വായ്ക്കുരവയിടുന്ന മുതലുകളാണ് ഈ കളവുകേസിലെ മുഖ്യ മുഖങ്ങൾ. നാം ഇതുവരെ കണ്ട കളവുകൾ കടുകുമണികൾ മാത്രമാണെന്ന അറിവും വിനയപൂർവ്വം സ്വീകരിക്കുക.

നിയമപരമായി ഈ കേസ് മുന്നോട്ടു പോയാൽ, 501 തവണ കിളിത്തട്ടു കളി മാറ്റാതിരുന്നാൽ വിപ്ലവം പ്രതിപ്പട്ടികയിലെ ഏതെങ്കിലും ഒരു സന്തതിയെ ടാർജറ്റ് ചെയ്യാതിരുന്നാൽ പ്രമാദമായ ഈ പകൽ ക്കൊള്ളയിൽ പ്രതിയായ പാർട്ടിയുടെ അംഗീകാരം പിൻവലിക്കുന്ന നടപടി തെരഞ്ഞെടുപ്പ് കമ്മീഷനു സ്വീകരിക്കാം. പാർട്ടി ഓഫീസുകളായി പ്രവർത്തിക്കുന്ന ബഹു നിലകൾ പിടിച്ചെടുക്കാം. സ്നേഹാധിക്യത്താൽ പ്രിയതമയ്ക്കു പണിഞ്ഞു നൽകിയ മിഞ്ചിയും അരപ്പട്ടയും ഒഡ്യാണവും ദേശീയ പാതയിലെ കടമുറികളും കട്ടമുതലായി മുതൽകൂട്ടാം.

സഞ്ചിതമായ വിഴുപ്പുകളുടെ മാറാപ്പുകൾ മാത്രം ബാക്കിയാകുമ്പോൾ അരക്കില്ലം കത്തിച്ച് സ്കിപ്പാകാൻ തക്കം പാർക്കുകയാണ് സ്തുതി പാഠകർ .വെളുക്കും മുമ്പ് കോഴികൾ ഊഴം വച്ചു കൂകിത്തുടിക്കും. അത് അലംഘനീയമായ വിധി വിഹിതം. അതുവരെ മാത്രമാകും അശാന്തവും അസ്വസ്ഥജനകവുമായ ഈ നിശബ്ദത.