അങ്ങനെ ഒടുവിൽ ജനം രക്ഷാപ്രവർത്തനം സ്വയം ഏറ്റെടുത്തു . ജനാധിപത്യത്തിന്റെ ഏറ്റവും മൂർച്ചയേറിയ വോട്ടെന്ന ആയുധം കരുവാക്കി ഞങ്ങളല്ലാതെ മറ്റാരുണ്ട് എന്ന ഇടതുപക്ഷ ചോദ്യത്തിനുള്ള മറുപടിയാണ് യുഡിഎഫ് നേടിയ ചരിത്ര വിജയം. ജനത്തിന് താൽക്കാലിക ആശ്വാസം. വരാനിരിക്കുന്നത് ഇതിലും വലുതാകുമോ ആവോ. കണ്ടറിയണം.

മുഖ്യമന്ത്രി പദത്തിൽ സ്വയം മറന്ന അല്ലയോ സഖാവേ, ഉത്തമരായ സഖാക്കളെയല്ല താങ്കൾ സൃഷ്ടിച്ചു കൊണ്ടിരുന്നത്. അടിമകളെയാണ് . ആ അടിമകളാണ് താങ്കളെ ഭയന്ന് താങ്കൾക്ക് വേണ്ടി കീർത്തനങ്ങൾ എഴുതിക്കൊണ്ടിരുന്നത്. അതിൽ താങ്കൾ മയങ്ങി . അരുത് സഖാവേ എന്നു പറയാൻ അടിമകൾക്ക് ധൈര്യമുണ്ടായിരുന്നില്ല.

പ്രസ്ഥാനത്തിലും ഉപരിയായി വ്യക്തികളാണ് ആരോപണങ്ങളിൽ പെട്ടു കൊണ്ടിരിക്കുന്നത് എന്നതാണ് അതിശയപ്പെടുത്തുന്നത്. വ്യക്തികൾ എന്നത് പോലും ചുരുങ്ങി വ്യക്തി എന്നതിലേക്ക് ആണ് ആരോപണങ്ങളുടെ മുന ചെന്നെത്തുന്നത് . ഒരു മഹാ പ്രസ്ഥാനത്തിൽ ഒരൊറ്റ അഭിപ്രായം മാത്രമേ ഉള്ളൂ എന്നത് ചൂണ്ടിക്കാട്ടുന്നത് ഗുരുതരമായ അപകടത്തിലേക്കാണ്. അപകടകരമായ മൗനം പിന്തുടരുന്ന ഒരുപറ്റം ബുദ്ധിജീവികൾ ഉൾപ്പെടുന്ന പ്രസ്ഥാനത്തിന് ഒരഭിപ്രായം മാത്രം ഉണ്ടാകുക എന്നത് സാമാന്യ ചിന്തയ്ക്ക് വഴങ്ങുന്നതല്ല. അത്തരക്കാരുടെ മൗനം പാർട്ടിയെ സംബന്ധിച്ചിടത്തോളം കുറ്റകരമായ അനാസ്ഥയാണ്. ഒക്കെ തെളിയുമ്പോഴേക്കും എല്ലും തോലും ആയി പാർട്ടി നിർജീവമായി കഴിഞ്ഞിരിക്കും. .

നയിക്കുന്നവൻ സംശയത്തിന് അതീതനാകണമെന്നും കറപുരളാത്തവൻ ആയിരിക്കണമെന്നും പാർട്ടി പ്രവർത്തകരും ജനങ്ങളും ആഗ്രഹിക്കുന്നതിൽ എന്താണ് തെറ്റ്? നിലനിൽക്കേണ്ടത് പാർട്ടിയല്ലേ പദവി അല്ലല്ലോ.