വിസ്മയങ്ങൾ എമ്പാടും നിറഞ്ഞ പാർട്ടിയാണ് കോൺഗ്രസ്സ്. സോണിയയും രാഹുലും പ്രിയങ്കയും നയിക്കുന്ന നല്ല തറവാടിത്തുള്ള കുടുംബപാർട്ടി. കണ്ണുതട്ടാതിരിക്കാൻ നമ്മുടെ കെ.സി വേണുഗോപാലും ഖാർഗേജിയും കൂടിയായാൽ ഹൈക്കമാൻഡ് എന്ന വിസ്മയമായി. .

കേരളത്തിൽ ഈ എക്ട്രാകൾ വീണ്ടുമെത്താൻ പോകുന്നതായി കേൾക്കുന്നു. ഇക്കുറി പാർട്ടിക്ക് ഭരണമുള്ളതു കൊണ്ട് ഭക്ഷണമെനുവിലും തർക്ക പരിഹാര ചർച്ചാ ദിനങ്ങളിലും വർധനവുണ്ടാവും. ചുരുക്കത്തിൽ ഇത്തവണത്തേത് എട്ടും കൂട്ടിയുള്ള നല്ല ഉശിരൻ ചർച്ച!

മന്ത്രിസഭയിലെ സാമുദായിക പ്രാതിനിധ്യം നോക്കി വേണം പാർട്ടി പദവികളിൽ ആളെടുക്കാനെന്ന് ആവശ്യമുയരുന്നുണ്ട്. അങ്ങനെ വരുമ്പോൾ കൃസ്ത്യാനിക്ക് നറുക്ക വീഴുമെന്ന വിശ്വാസത്തിൽ കെ.സി ജോസഫ്, ആന്റോ ആന്റണി, ബെന്നി ബഹന്നാൻ, ജോസഫ് വാഴയ്ക്കൻ, വിൻസെന്റ് തുടങ്ങിയവരുടെ നഗരപ്രദക്ഷിണം ഒരു വഴിക്ക് നടക്കുമ്പോൾ രണ്ടു തവണ താത്കാലിക പ്രസിഡന്റായി പാർട്ടിയെ കണ്ണിലെ കൃഷ്ണമണി പോലെ കാത്ത മുൻപരിചയത്തിന്റെ ബലത്തിൽ എം എം ഹസ്സനും ഒപ്പമുണ്ട്. ഉറപ്പായും ജയിക്കുമായിരുന്ന തനിക്ക് തോൽവി മണ്ഡലം തന്ന് തേയ്ച്ചതിന് പരിഹാരമായി പ്രസിഡന്റ് പദവി കിട്ടണമെന്ന ആവശ്യവുമായി വി എസ് ശിവകുമാർ, ദളിത് പിന്നാക്ക പ്രസിഡന്റ് കേരളത്തിൽ കോൺഗ്രസ്സിന് പുത്തൻമുഖം നൽകും എന്ന വാദമുയർത്തി കൊടിക്കുന്നിൽ സുരേഷ് തുടങ്ങിയവരും കളത്തിലുണ്ട്. എല്ലാർക്കും സമ്മതമെങ്കിൽ ഒരു വട്ടം കൂടി പ്രസിഡന്റാവാൻ താൻ തയ്യാർ എന്ന ഒരു ഭാവം വി എം സുധീരനുമുണ്ടെന്ന് കേൾക്കുന്നു.

ഇടതു സർക്കാരിൽ മന്ത്രിയായിരിക്കേ ഇ പി ജയരാജിന്റെ ബന്ധുവിന് നിയമനം നൽകിയത് വിവാദമാക്കുകയും ജയരാജനെ ചിറ്റപ്പൻ ജയരാജനെന്ന് പുനർനാമകരണം ചെയ്ത് നിരന്തരം ട്രോളുകയും ചെയ്ത കോൺഗ്രസ്സ് സണ്ണി ജോസഫ് മന്ത്രിയിലൂടെ സമനിലയിലെത്തിയിരിക്കുന്നു. സ്വന്തം അളിയന് മന്ത്രിയാപ്പീസിൽ സെക്രട്ടറിയായി നിയമനം നൽകിയാണ് കെപിസിസിയുടെ കാവൽ പ്രസിഡന്റ് കൂടിയായ സണ്ണി ജോസഫ് വിസ്മയം തീർത്തത്. നല്ലവനായ സണ്ണിച്ചായൻ ഇനി സണ്ണിയളിയൻ എന്നായിരിക്കും അറിയപ്പെടുക.