സസ്പെൻഷനിലായിരുന്ന ഐ എ എസ് ഉദ്യോഗസ്ഥർ ഡോ ബി അശോകിനെയും പ്രശാന്തിനെയും സർവ്വീസിൽ തിരിച്ചെടുത്തു. നല്ലത്. വളരെ നല്ലത്... കൊടുംപാതകങ്ങൾ എന്തെങ്കിലും ചെയ്തതിന്റെ പേരിലായിരുന്നില്ലല്ലോ ഇരുവരുടെയും സസ്പെൻഷൻ. പിണറായി സർക്കാരിന്റെയും സർക്കാരിന് വേണ്ടപ്പെട്ട ഉദ്യോഗസ്ഥരുടെയും നിയമവിരുദ്ധ പ്രവൃത്തികൾ പരസ്യമായി ചോദ്യം ചെയ്തുവെന്നതാണ് ഇരുവരുടെയും പേരിലുയർത്തിയ കുറ്റങ്ങളുടെ ചുരുക്കെഴുത്ത്.

നിയമസഭയിലേക്ക് വോട്ടുചെയ്ത ശേഷം വാർത്തകളിൽ വേണ്ടത്ര മസാലയില്ലാതെ ജനം ബോറടിച്ചിരിക്കുമ്പോഴാണ് അശോകിന്റെ സർജിക്കൽ സ്ട്രൈക്ക്. മറുനാടൻ മലയാളി തുടങ്ങി ഏതാനും ആന്റി പിണറായി മാധ്യമങ്ങളിൽ അശോകൻ സാർ താണ്ഡവമാടി. മസാലയോട് മസാല! ജനം ഹാപ്പി. വോട്ടിടും മുമ്പായിരുന്നെങ്കിൽ യു.ഡി എഫ് ന് നൂറ് മേനി വിളവെടുക്കാൻ പാകത്തിനുള്ളതായിരുന്നു പിണറായിയുടെ നേർക്കുള്ള അശോകിന്റെ വെടിക്കെട്ട്.

സെക്രട്ടറിയേറ്റിനുമുന്നിൽ ആശകൾ നടത്തിയ സമരത്തോട് മനസ്സുകൊണ്ടെങ്കിലും അനുഭാവം പുലർത്താത്ത ഒരാളും കേരളത്തിലുണ്ടയിരുന്നില്ല; ഇടത് സർക്കാരും തൊഴിലാളി പ്രേമത്താൽ ആകെയുലഞ്ഞ അവരുടെ തൊഴിലാളി സംഘടനകളുമൊഴികെ... തെരഞ്ഞെടുപ്പ് മുന്നിൽക്കണ്ട് കൊച്ചിയിൽ സാംസ്കാരിക വകുപ്പിന്റെ നേതൃത്വത്തിൽ സംഘടിപ്പിക്കാനൊരുങ്ങിയ മാമാങ്കം ചർച്ചചെയ്യാൻ മന്ത്രി സജി ചെറിയാൻ വിളിച്ച ഇൻഹൗസ് യോഗത്തിൽ പ്രേംകുമാർ സ്വയം വിമർശനപരമായി ആശാ സമരത്തെ എടുത്തു കാട്ടിയതാണ് കമ്മികളെ ചൊടിപ്പിച്ചത്. ആഗോള കമ്മ്യൂണിസ്റ്റായ ബേബി സഖാവും പങ്കെടുത്ത പരിപാടിയായിരുന്നു. ആശമാർ ചില്ലറക്കാശിനു വേണ്ടി സമരം ചെയ്യുമ്പോൾ കാശ് വാരിക്കോരി ചെലവഴിച്ച് സാംസ്കാരികോത്സവം സംഘടിപ്പിക്കുന്നതിന്റെ ഔചിത്യം ജനം ചോദ്യം ചെയ്തേക്കുമെന്ന ന്യായമായ ആശങ്കയാണ് പ്രേംകുമാർ ബേബിക്കു മുന്നിൽ വച്ചത്. മടക്കത്തപാലിൽ തന്നെ ഇണ്ടാസ് വന്നു. അക്കാദമിയിൽ നിന്ന് 'പ്രേംകുമാർ കടക്ക് പുറത്ത്...'

തിരുവനന്തപുരം ജില്ലയിൽ തെരഞ്ഞെടുപ്പിൽ സ്വാധീന ശക്തിയുള്ള പ്രബലമായ ഒരു സമുദായത്തിൽപ്പെട്ടയാളാണ് പ്രേംകുമാർ. സത്യനുശേഷം ആ സമുദായത്തിൽ നിന്നു വന്ന് മലയാള സിനിമയിൽ പേരെടുത്ത ഒരേയൊരാൾ .തെരഞ്ഞെടുപ്പിൽ യു ഡി എഫ് സ്ഥാനാർത്ഥിയായി പ്രേംകുമാർ വരുമെന്ന് വാർത്തയുണ്ടായിരുന്നെങ്കിലും ചുരുക്കം പ്രചാരണ പരിപാടികൾക്കപ്പുറം അദ്ദേഹത്തെ കണ്ടില്ല.