മണ്ണെണ്ണ കപ്പല് വന്നിറങ്ങി... റോഡിലെല്ലാം വെളിച്ചം തട്ടി.... വൺ ടു ത്രീ...

വിഴിഞ്ഞത്തുകാർ ഇപ്പോൾ അണ്ടി കളഞ്ഞ അണ്ണാൻമാരായി വായ പൊളിച്ചു നിൽപ്പാണ്.മൂടിക്കെട്ടിയ കാർഗോ ലോറികൾ നിരത്തിൽ ചീറിപ്പായുന്നു. നിറയെ വികസനവുമായി..

ഉമ്മൻചാണ്ടിയുടെ കരാറിലെ സർവ്വ അപരാധങ്ങളും അരിച്ചു നീക്കി അതിൽ ജനകീയത ആവാഹിച്ച് കുടിയിരുത്തിയതാണ് പുതിയ കരാർ എന്നായിരുന്നു അന്നത്തെ തള്ളൽ. ഉമ്മൻ ചാണ്ടിയുടെ കരാർ പബ്ലിക് ഡോകുമെന്റാണ്. ആർക്കും വായിക്കാൻ പാകത്തിന് നൂറ് പേജുകൾ വെബ് സൈറ്റിലുണ്ട്. ഇതുവരെ പുറത്തു വരാത്ത പിണറായിയുടെ പൊളപ്പൻ കരാർ പുറത്തു വിടണം. അപ്പോൾ അറിയാം തനിനിറം. എവിടെയും ചായാൻ തയ്യാറായി നിൽക്കുന്ന മാപ്രകളെ വശീകരിച്ച് വൻ വാർത്തയും ഹൈപ്പും നൽകിയ ശേഷമാണ് ജൂലൈ ഒന്നിന് പോർട്ട് സെക്രട്ടറിക്ക് അദാനി ലൗ ലെറ്റർ നൽകിയത്. അതു മതി. ഇന്ദു മതി.അതാണ് വിശാരം ! ഓഹരിക്കൈമാറ്റം അന്തിമമായി തീരുമാനിക്കുന്ന സെബിയുടെ അനുമതിക്ക് ശരവേഗം. കേന്ദ്രസർക്കാർ അനുമതിയും സെക്യൂരിറ്റി ക്ലിയറൻസും വീട്ടു പടിക്കലെത്തും. എത്തിക്കും. കൈയ്യിൽ നിന്നും 3000 കോടി എറിഞ്ഞ് വർഷം തികയും മുമ്പ് 13200 കോടി പിടിച്ചു . അതാ..ണ് അദാനി. .കടിക്കുന്ന പട്ടിക്കെന്തിനു വായ.6000 കോടി മുടക്കിയ കേരള സർക്കാരിനു കഷ്ടി പിഷ്ടി ചായക്കാശു കിട്ടി.. വയബിലിറ്റിയുടെ ഗ്യാപ്പിൽ കടന്നു പിടിച്ചപ്പോൾ കിട്ടാൻ കൊതിച്ചത് കേന്ദ്രത്തിനും കിട്ടി. നാട്ടുകാർക്ക് മിച്ചം വന്നത് നടുവിരൽ നമസ്കാരം മാത്രം.

ഈ തുറമുഖത്തിന്റെ നിലവിലെ അവസ്ഥ അങ്ങനെയൊക്കെയാണ്.അപ്പോഴാണ് കേരളത്തെ മുഴുവനായിത്തന്നെ തുറമുഖനഗരമാക്കുമെന്ന പുതിയ പൂഴിക്കടകനുമായി മേനോൻ മാഷിന്റെ വരവ്. കേരളമേ..നിന്റെ കാര്യം പോക്കാ... വിഴിഞ്ഞത്തിന്റെ കാര്യത്തിൽ പ്രവചനം വളരെ സിമ്പിളാണ്. ജനങ്ങൾ തോറ്റമ്പുന്ന ഈ സന്നാഹ മൽസരത്തിൽ രാഷ്ട്രീയക്കാരും അദാനിയും എംഎസ് സിയുമൊക്കെയാകും അന്തിമ ജേതാക്കൾ.