പെരുന്നയിൽ നിന്ന് വരുന്ന വാർത്തകൾ കേട്ടാൽ ശരീരമാകെ പെരുത്ത് കയറും. പലപ്പോഴും എസ് എസ് ആസ്ഥാനമല്ല, വത്തിക്കാനോ വൈറ്റ് ഹൗസോ ആണ് അവിടമെന്ന് തോന്നുകയും ചെയ്യും. ഒരു പോപ്പ് ഉണ്ട് അവിടെ. ഡംഭ് മൂത്ത ഒരു ട്രമ്പ് .പേര് സുകുമാരൻ നായർ. അഖില ലോക നായർ സാമ്രാജ്യത്തിന്റെ മുടി ചൂടാ മന്നവൻ.

കേരളത്തിലെ രാഷ്ട്രീയകാലാവസ്ഥയിൽ സുനിശ്ചിതമായ രണ്ട് കാര്യങ്ങളേ ഉള്ളൂ. ഒന്ന്, മഴക്കാലത്ത് സർവ്വമാന സ്ഥലത്തും വെള്ളം ഇരച്ചു കയറും. രണ്ട്, എത്ര കൊടി കെട്ടിയവരായാലും പെരുന്നയുടെ ഗേറ്റ് നായൻമാരിൽ ചിലർക്കു മുന്നിൽ അടയും.

എൻ എസ് എസിന്റെ എഴുതപ്പെടാത്ത നിയമാവലി ഇങ്ങനെയാണ്. നായർ ഐക്യത്തിനാണ് പ്രസ്ഥാനം. ഐക്യം വിട്ടൊരു കളിയില്ല. നായർ ( അതായത് നായൻമാർ ) ഒറ്റക്കെട്ടാണ്. നേതാവ് പറയും മറ്റുള്ളർ ഒറ്റക്കെട്ടായി നിന്ന് വള്ളിപുള്ളി മാറാതെ അനുസരിക്കും.സമുദായത്തിന് വേണ്ടി എല്ലാവരും ഒന്നിച്ചുനില്ക്കുകയും,ഇരിക്കുകയും ആവശ്യമെങ്കിൽ മന്ദം മന്ദം നടന്ന് പെരുന്ന വരെ എത്തുകയും വേണം, പക്ഷെ ആസ്ഥാനത്ത് കയറി മന്നത്തെ കാണണമെങ്കിൽ നേതാവിന്റെ പ്രത്യേക അനുമതി കിട്ടിയേ പറ്റൂ.

ചരിത്രം ഇത്രയും മനോഹരമായി റിവേഴ്സ് അടിച്ചത് സുരേഷ് ഗോപിയുടെ പഞ്ച് ഡയലോഗിന് ശേഷം ഇതാദ്യമായാണ്. പെരുന്നയിൽ നിന്ന് മടക്കത്തപാലിൽ പ്രസ്താവന വന്നു; സുകുമാരൻ നായർ പ്രകോപിതനാണെന്ന്. വർഷത്തിൽ 364 ദിവസവും പ്രകോപിതനായിരിക്കുന്ന ഒരാൾ വീണ്ടും പ്രകോപിതനായി എന്നത് എന്തായാലും ബ്രേക്കിംഗ് ന്യൂസ് ആയില്ല. നായര് വിചാരിക്കുന്നത് ഭൂലോകത്തിന്റെ അച്ചുതണ്ടിരിക്കുന്നത് പെരുന്നയിലാണെന്നാണ്; വെള്ളാപ്പള്ളി അത് കണിച്ചുകുളങ്ങരയ്ക്ക് അപ്പുറത്തേക്ക് വിട്ടു കൊടുക്കില്ലെങ്കിലും...