ചരിത്രത്തെ വക്രീകരിച്ച് വികലമാക്കുന്ന മലയാള സിനിമാ പ്രവർത്തകർ കണ്ടുപഠിക്കേണ്ട ഒരു ചലച്ചിത്രം കഴിഞ്ഞ ദിവസം ഇന്ത്യയിൽ റിലീസ് ചെയ്തു. പ്രശസ്ത നടൻ അക്ഷയ് കുമാർ നായകനാകുന്ന ഹിന്ദി സിനിമ; പേര്, കേസരി ചാപ്റ്റർ-2. ഭാരതത്തിൻ്റെ ശരിയായ ( തമസ്ക്കരിക്കപ്പെട്ട) ചരിത്രത്തെ അനാവരണം ചെയ്യുന്ന കേസരി, മലയാളികൾ മറന്ന; ചരിത്രകാരന്മാർ തമസ്ക്കരിച്ച ധീര ദേശാഭിമാനി ചേറ്റൂർ ശങ്കരൻ നായർക്കുള്ള ആദരവ് കൂടിയാണ്. സിനിമയുടെ പ്രതിപാദ്യ വിഷയം സ്വാതന്ത്ര്യ സമര കാലഘട്ടത്തിലെ ജാലിയൻവാലാബാഗ് കൂട്ടക്കൊല ആണെങ്കിലും, അതിനെ തുടർന്ന് ബ്രിട്ടീഷ് കോളനി ഭരണത്തെ പിടിച്ചുലച്ച; ചരിത്രം മറച്ച് വച്ച സംഭവങ്ങളെ വെളിവാക്കുന്ന ഒരു ബയോപിക് എന്ന് വേണമെങ്കിൽ വിശേഷിപ്പിക്കാം. സിനിമയിൽ ചേറ്റൂർ ശങ്കരൻ നായരുടെ റോൾ അഭിനയിക്കുന്നത് പ്രശസ്ത നടൻ അക്ഷയ് കുമാറാണ്.

1922-ൽ നായർ 'ഗാന്ധി ആൻഡ് അനാർക്കി' എന്ന പുസ്തകം പ്രസിദ്ധീകരിച്ചു. ബ്രിട്ടീഷ് കൊളോണിയൽ ഭരണത്തെ വിമർശിക്കുകയും ജാലിയൻവാലാബാഗിലെ അതിക്രമങ്ങൾക്ക് പഞ്ചാബിലെ അന്നത്തെ ലെഫ്റ്റനന്റ് ഗവർണറായിരുന്ന മൈക്കൽ ഒ'ഡ്വയറിനെ കുറ്റപ്പെടുത്തുകയും ചെയ്തു. ഇതിൽ പ്രകോപിതനായ ഒ'ഡ്വയർ നായർക്കെതിരെ ഒരു ഇംഗ്ലീഷ് കോടതിയിൽ മാനനഷ്ടക്കേസ് ഫയൽ ചെയ്തു. തുടർന്ന് ലണ്ടനിലെ കിംഗ്സ് ബെഞ്ചിൽ ചരിത്രപരമായ ഒരു വിചാരണ നടന്നു. അഞ്ചര ആഴ്ച നീണ്ടുനിന്ന, അക്കാലത്തെ ഏറ്റവും ദൈർഘ്യമേറിയ സിവിൽ വിചാരണയിൽ, ശങ്കരൻ നായർക്കെതിരെ പക്ഷപാതപരമായി പെരുമാറിയ ജസ്റ്റിസ് ഹെൻറി മക്കാർഡി അധ്യക്ഷനായ ഒരു ഇംഗ്ലീഷ് ജൂറിയുടെ മുമ്പാകെ വിചാരണ ചെയ്യപ്പെട്ടു. പക്ഷേ, നായർ തന്റെ നിലപാടിൽ ഉറച്ചുനിന്നു.

ഭാരതത്തിൽ അധിനിവേശം നടത്തി, അതിക്രൂരമായി ജനങ്ങളെ ഉപദ്രവിക്കുകയും കൊലപ്പെടുത്തുകയും ചെയ്ത് പുരാതന ഭാരതത്തിലെ സർവ്വകലാശാലകളും,സംസ്ക്കാരവും തകർത്ത കയ്യേറ്റക്കാരുടെ ചരിത്രമല്ല; മറിച്ച് ചേറ്റൂർ ശങ്കരൻ നായരെ പോലുള്ള, പുതു തലമുറകൾക്ക് അഭിമാനത്തോടെ തലയുയർത്തി പറയാൻ കഴിയുന്ന ഉജ്ജ്വല വ്യക്തിത്വങ്ങളുടെ തിളക്കമാർന്ന ചരിത്രമാണ് പറഞ്ഞു കൊടുക്കേണ്ടത്. കേസരി ചാപ്റ്റർ-2 എന്ന സിനിമ ആ നിലയിൽ ചിന്തിപ്പിക്കാൻ കേരളത്തെ സഹായിക്കട്ടെ.