ചില പുസ്തകങ്ങൾ പുറത്തിറങ്ങുന്നത് ഒരു സാധാരണ പ്രസിദ്ധീകരണച്ചടങ്ങായല്ല. കാലം മറവിയിലേക്ക് തള്ളിക്കളഞ്ഞ ചില മുഖങ്ങളെയും ഓർമ്മകളെയും വീണ്ടും നമ്മിലേക്ക് കൊണ്ടുവരുന്ന ചരിത്രനിമിഷങ്ങളായാണ്. അത്തരമൊരു പുസ്തകമാണ് സ്പോട്ട് സുരേഷ് എന്ന ഡി. സുരേഷ്‌കുമാർ എഴുതിയ ‘നാദം ഇന്ദ്രജാലം’.

അന്നത്തെ പരസ്യങ്ങളിലെ വാചകങ്ങൾ അതേ നാദപൂർണ്ണതയിൽ ഇന്നും ഓർമ്മയിൽ സൂക്ഷിക്കുന്നവരുണ്ട്. പക്ഷേ അവയ്ക്ക് ശബ്ദം നൽകിയവർ ആരായിരുന്നു? ആ ശബ്ദങ്ങൾക്കു പിന്നിലെ സർഗാത്മകത എന്തായിരുന്നു? മലയാള റേഡിയോ പരസ്യങ്ങളുടെ വളർച്ചയ്ക്കൊപ്പം നടന്ന ആ മനുഷ്യരുടെ യാത്ര എവിടെയാണ് രേഖപ്പെടുത്തിയിരിക്കുന്നത്? അവിടെയാണ് ‘നാദം ഇന്ദ്രജാലം’ ഒരു പുസ്തകത്തിനപ്പുറം ഒരു ചരിത്രരേഖയായി മാറുന്നത്.

27 ശീർഷകങ്ങളിലായി 28 പ്രതിഭകളെ വായനക്കാരുടെ മുന്നിലെത്തിക്കുന്ന പുസ്തകം, മലയാള റേഡിയോ പരസ്യരംഗത്തെ ഒരു തലമുറയുടെ സ്മൃതിചിത്രം കൂടിയാണ്. ഒരിക്കൽ കേട്ടാൽ മറക്കാനാകാത്ത പരസ്യവാചകങ്ങൾക്ക് ശബ്ദവും ജീവനും നൽകിയവർ. അവരുടെ ശബ്ദാനുഭവങ്ങളിലൂടെ ഒരു കാലഘട്ടത്തിന്റെ ജീവിതവും സംസ്കാരവും ഉപഭോക്തൃലോകവും മലയാളിയുടെ ദൈനംദിന ശ്രവണാനുഭവവും പുനർജനിക്കുന്നു. ‘ശബ്ദത്തിലെ ചരിത്രരേഖകൾ’ എന്ന വിഭാഗത്തിൽ പത്തോളം ലേഖനങ്ങളുമുണ്ട്. അനുഭവങ്ങൾ, കേട്ടറിവുകൾ, ലഭ്യമായ ആധികാരിക വിവരങ്ങൾ എന്നിവ കൂട്ടിച്ചേർത്ത് റേഡിയോ പരസ്യലോകത്തിന്റെ മറ്റൊരു വാതിൽ കൂടി ഈ പുസ്തകം തുറക്കുന്നു

സെപ്റ്റംബർ 9-ന് വൈകുന്നേരം 5 45 ന് ബ്രിട്ടീഷ് കൗൺസിൽ ഹാളിൽ പുസ്തകം പ്രകാശനം ചെയ്യപ്പെടുമ്പോൾ, ആലേഖനം ചെയ്യപ്പെടാതെ പോയ ഒരു അധ്യായം കൂടി ചരിത്രത്തിന്റെ മൈക്രോ ഫോണിനു മുന്നിലേക്ക് വന്ന് ശിരസ്സുയർത്തി സംസാരിച്ചു തുടങ്ങും സ്പോട്ട് സുരേഷിന്റെ ഖനഗംഭീരമായ ശബ്ദത്തിൽ... ഹലോ.... മൈക്ക് ടെസ്റ്റിംഗ്....