സ്വന്തം ഹോം ലോണിന്റെ തിരിച്ചടവ് മുടക്കി, ആ തുക കൊണ്ട് ‘സൂര്യ’യുടെ വാർഷിക മെമ്പർഷിപ്പ് പുതുക്കിയ കഥ പറഞ്ഞ എന്റെ സുഹൃത്തിനെപ്പോലെ എത്രയോ പേരുണ്ടാകും നമ്മുടെ നാട്ടിൽ! എന്തൊക്കെ പറഞ്ഞാണ്, എന്തു നൽകിയാണ് കൃഷ്ണമൂർത്തിക്ക് നന്ദി പറയേണ്ടത് എന്നറിയാതെ വിങ്ങിപ്പൊട്ടിയാകും ആയിരക്കണക്കിന് മനസ്സുകൾ അദ്ദേഹത്തിന്റെ വിടവാങ്ങൽ വാർത്ത കേട്ടിട്ടുണ്ടാവുക.

വർഷങ്ങൾക്കു മുൻപ് തിരുവനന്തപുരത്ത് വിത്തുപാകി, ലോകത്തിലെ തന്നെ ഏറ്റവും വലിയ സാംസ്കാരിക കൂട്ടായ്മകളിലൊന്നായി വളർന്ന 'സൂര്യ സ്റ്റേജ് ആൻഡ് ഫിലിം സൊസൈറ്റി'യുടെ ബാനറിൽ, വിഭവസമൃദ്ധമായ കലാസദ്യകൾ മുന്നിലെത്തുമ്പോൾ കല കലയ്ക്കു വേണ്ടിയോ അതോ ജീവിതത്തിനു വേണ്ടിയോ എന്ന താത്വികമായ ചോദ്യങ്ങളൊന്നും ആസ്വാദനത്തിന്റെ പരകോടിയിൽ നിൽക്കുന്ന സൂര്യ പ്രേക്ഷകരുടെ മനസ്സിനെ അലട്ടിയിട്ടുണ്ടാകില്ല. മറിച്ച്, 'തൽക്കാലം ഈ കല എനിക്കു വേണ്ടിയാണ് എനിക്ക് വേണ്ടി മാത്രമാണ് ' എന്ന മട്ടിലെ എത്രയോ മുഖമനസ്സുകൾ പലപ്പോഴും ഞാൻ നേരിട്ടു കണ്ടിട്ടുണ്ട്. വിടരാൻ കൊതിക്കുന്ന മൊട്ടുകൾക്കും, വിടർന്നു നിൽക്കുന്ന പ്രതിഭകൾക്കും, ആയുസ്സിന്റെ അളവുകോലിൽ കൊഴിയാറായ പൂക്കൾക്കും ഒരുപോലെ പരവതാനി വിരിച്ച പവിത്രമായ വേദിയായിരുന്നു സൂര്യയുടേത്.