Thiruvananthapuram : സർക്കാർ സർവീസിൽ പ്രവേശിക്കാൻ ഡോക്ടർമാർ ഉൾപ്പടെയുള്ളവരുടെ പ്രായപരിധി നാല്പത് വയസ്സായി തുടരവേ കോളേജ്- യൂണിവേഴ്സിറ്റി അധ്യാപകരുടെ നിയമന പ്രായപരിധി അൻപതായി ഉയർത്തിയത് സിപിഎം നേതാക്കന്മാരുടെ ഭാര്യമാരെ സഹായിക്കാനാണെന്ന ആരോപണം ശരി വയ്ക്കുന്നതിന്റെ  തെളിവുകൾ പുറത്ത്.

സ്പീക്കർ  എ.എൻ.ഷംസീറിൻ്റെ ഭാര്യക്ക് അസിസ്റ്റൻറ് പ്രൊഫസറായി   തുടരുന്നതിന് ചട്ടങ്ങളിൽ ഭേദഗതി വരുത്തി വിവാദത്തിൽ കുടുങ്ങിയ കണ്ണൂർ സർവ്വകലാശാലയാണ് ഒരു ലക്ഷം രൂപ പിഴയടച്ചാൽ നിശ്ചിത ഗവേഷണ കാലാവധി കഴിഞ്ഞ ആർക്കും പി.എച്ച്.ഡി നൽകാമെന്ന പുതിയ ഒരു വിവാദത്തിനു കൂടി തുടക്കം കുറിച്ചിരിക്കുന്നത്.ഈ ആനുകൂല്യം താൽക്കാലികമാണെന്ന് മാത്രം. അതായത് വേണ്ടപ്പെട്ടവരെ സഹായിച്ച് കഴിഞ്ഞാൽ ഈ പരിപാടി അവസാനിപ്പിക്കും.

2008 ൽ, പി.എച്ച്.ഡി ബിരുദം നേടുന്നതിന് കണ്ണൂർ സർവ്വകലാശാലയിൽ ഗവേഷണത്തിന് രജിസ്റ്റർ ചെയ്ത സിപിഎം നേതാവ് എം. സ്വരാജിന്റെ ഭാര്യ സരിതമേനോൻ, നിശ്ചിത പിഴ അടച്ച് തിരക്കിട്ട് തയ്യാറാക്കിയ പ്രബന്ധം മൂല്യനിർണ്ണയം നടത്തിച്ച് അഞ്ച് മാസത്തിനുള്ളിൽ പി എച്ച് ഡി ബിരുദവും നേടി.

കോളേജ് അധ്യാപക നിയമനത്തിന് നെറ്റ് യോഗ്യതയോ പി എച്ച് ഡി ബിരുദമോ ആണ് മിനിമം യോഗ്യത. സ്വരാജിന്റെ ഭാര്യ സരിത മേനോൻ നെറ്റ് യോഗ്യത നേടിയിട്ടില്ല.2001 ൽ കേരള സർവ്വകലാശാലയിൽ നിന്ന് നേടിയ MBA ബിരുദം മാത്രമാണ് അവർക്കുള്ളത്.അതുകൊണ്ട് അധ്യാപക നിയമനത്തിന് PhD അനിവാര്യമാണ്.

ബിഎ, ബിടെക്,എൽ.എൽ.ബി പരീക്ഷകൾ വർഷങ്ങളായി പാസാകാത്തവർക്ക് വേണ്ടി സർവകലാശാലകൾ മെഴ്സി ചാൻസ് പരീക്ഷകൾ നടത്തുന്ന പതിവുണ്ട്. എന്നാൽ ഒരു ഗവേഷണ ബിരുദത്തിന് ലക്ഷം രൂപ പിഴ ഈടാക്കി സർവ്വകലാശാലയുടെ ഏറ്റവും ഉന്നതമായ Ph.D ബിരുദം നേടുന്നതിന് ഒരു സർവ്വകലാശാല മെഴ്സി ചാൻസ് അനുവദിക്കുന്നത്

സർവ്വകലാശാലകളുടെ ചരിത്രത്തിൽ ഇതാദ്യമായാണ്.