ഡപ്യൂട്ടി തഹസിൽദാർ പദവിയിൽ ഇരിക്കുന്ന ഒരു ഉദ്യോഗസ്ഥൻ അപകടത്തിൽ മരിച്ച യുവതിയെ അശ്ലീലമായും ജാതീയമായും സമൂഹ മാധ്യമത്തിൽ അധിക്ഷേപിച്ചത് കടുത്ത അച്ചടക്ക ലംഘനവും സർവീസ് ചട്ടങ്ങൾക്ക് വിരുദ്ധവും ആയതിനാൽ പവിത്രനെ സർക്കാർ സർവീസിൽ നിന്ന് പിരിച്ച് വിടണമെന്ന് ആവശ്യപ്പെട്ട് ബി ജെ പി കാസർഗോഡ് ജില്ല കമ്മിറ്റി പ്രതിഷേധ പ്രകടനം നടത്തി.

സ്ത്രീകളെ ലൈംഗികമായി അധിക്ഷേപിക്കുന്നതും അവരോട് അശ്ലീലമായി പെരുമാറുന്നതും പവിത്രൻ്റെ സ്ഥിരം പരിപാടിയാണെന്ന് ജോയിൻ്റ് കൗൺസിൽ ആരോപിച്ചു. ഇയാൾ ഡപ്യൂട്ടി തഹസിൽദാർ കസേരയിൽ ഇരിക്കാൻ യോഗ്യനല്ലെന്നും ഉടൻ പിരിച്ചു വിടണമെന്നും ആവശ്യപ്പെട്ട് റവന്യൂ മന്ത്രിക്ക് സംഘടന പരാതി നൽകി. സംഭവത്തിൽ പ്രാഥമിക അന്വേഷണം നടത്തിയ ജില്ലാ കളക്ടറുടെ റിപ്പോർട്ടിലും പവിത്രനെ പിരിച്ചു വിടാൻ ശുപാർശ ചെയ്തിട്ടുണ്ട്.