2016 മേയ് 25. തിരുവനന്തപുരം സെൻട്രൽ സ്റ്റേഡിയം നിറഞ്ഞു കവിഞ്ഞ ജനസഞ്ചയത്തിനും ആകാശം പിളർന്ന ചുവപ്പൻ മുദ്രാവാക്യങ്ങളും സാക്ഷി നിറുത്തി പിണറായി വിജയൻ സർക്കാർ അധികാരമേറ്റു. ഉമ്മൻ ചാണ്ടി സർക്കാരിനെ വിവാദങ്ങളുടെ ആഴക്കടലിൽ മുക്കി തിരിച്ചു വന്ന ഇടതു വിജയത്തിന്റെ ശില്പി ജനകീയ സഖാവ് വി എസ് അച്യുതാനന്ദനായിരുന്നു.

എന്തൊരു ആവേശമായിരുന്നു അന്ന് പാർട്ടി സഖാക്കൾക്കും ബന്ധുക്കൾക്കും. പിണറായിയെപ്പോലെ കാർക്കശ്യക്കാരനായ ഒരു നേതാവ് മുഖ്യമന്ത്രിയാകുമ്പോൾ ഉദ്യോഗസ്ഥരുടെ അപ്രമാദിത്തവും ബ്യൂറോക്രസിയുടെ അഴിമതിയും അവസാനിക്കുകയും നാട് പുതിയൊരു ജനാധിപത്യസംസ്കാരത്തിലേക്ക് പ്രവേശിക്കുകയും ചെയ്യുമെന്ന് കമ്മ്യൂണിസ്റ്റ് വിരുദ്ധർ പോലും കിനാവുകണ്ടു. മന്ത്രി സഭയിലൊപ്പമുണ്ടായിരുന്നവരുടെ പ്രൊഫൈലും ജനങ്ങളിൽ മതിപ്പുളവാക്കി.

അവസരം പാർത്തിരുന്ന ജനം തെരഞ്ഞെടുപ്പിൽ ജാഗരൂകരായി. ഇടത് ഭരണം അടപടലം മാറണമെന്ന വിധി തദ്ദേശ തെരഞ്ഞെടുപ്പിൽ മുന്നറിയിപ്പായി നൽകിയെങ്കിലും മനസ്സിലാകാത്തത്ര അന്ധത ബാധിച്ചവരെ നിയമസഭയിൽ നിന്നു കൂടി തൂത്തെറിഞ്ഞേ ജനം വിശ്രമിച്ചുള്ളൂ.

ഈ സർക്കാരിനെ നയിക്കുന്ന വി ഡി സതീശനിൽ ജനങ്ങൾക്ക് വിശ്വാസമുണ്ട്. ഭാവി കേരളത്തെക്കിച്ച് വ്യക്തമായ കാഴ്ചപ്പാടുള്ളയാളാണ് പുതിയ മുഖ്യമന്ത്രി. പ്രതികരിക്കേണ്ടിടത്ത് മുഖം നോക്കാതെ കർക്കശമായി പ്രതികരിക്കാൻ സതീശനറിയാം. ഒപ്പമുള്ളവരെ ഒരു ടീമായി കൊണ്ടുപോകാനും വിഡിക്ക് കഴിയും. സദ്ഭരണമാവണം സ്വപ്നമെന്നു മാത്രം. പരിചയ സമ്പന്നരായവരും യുവരക്തമുള്ള പുതുമുഖങ്ങളുമുണ്ട് സതീശൻ മന്ത്രിസഭയിൽ. അവരുടെ കരുത്ത് പുറത്തെടുക്കാനും പ്രയോജനപ്പെടുത്താനും മുഖ്യമന്ത്രിക്ക് കഴിയണം. ഒപ്പം, പണ്ട് പിണറായി പറഞ്ഞതു പോലെ മുഖ്യമന്ത്രിയുടെയും മന്ത്രിസഭാംഗങ്ങളുടെയും പേരുപറഞ്ഞ് സെക്രട്ടേറിയറ്റിന്റെ ഇടനാഴി നിരങ്ങുന്നവർക്കതിരേ ജാഗ്രത പുലർത്താനുമാവണം. പി ആർ വർക്കുകൾ കൊണ്ട് നാട്ടാരെ എല്ലായ്പ്പോഴും പറ്റിക്കാമെന്നത് എട്ടു നിലയിൽപ്പൊട്ടാവുന്ന ഒരു വ്യാമോഹം മാത്രമാണ്.