അതിസാധാരണക്കാരായ സ്ത്രീകൾക്ക് പ്രയോജനകരമാവുന്ന പ്രിയദർശിനി സൗജന്യ യാത്രാ പദ്ധതിക്കെതിരേ ആക്ഷേപവുമായി ഇടതുപക്ഷം മുന്നോട്ടു പോവുകയാണ്. ഈ പശ്ചാത്തലത്തിൽ പ്രശസ്ത മാധ്യമ പ്രവർത്തകൻ ബി.വി. പവനൻ എഴുതിയ കുറിപ്പ്.

അത് ഇപ്പോഴല്ല. എന്നും അങ്ങനെയായിരുന്നു. ഏത് നല്ല കാര്യത്തേയും കഠിനമായി എതിർക്കുക എന്നതായിരുന്നു നയം. പറഞ്ഞു പഴകിയ കാര്യങ്ങളാണ്. എങ്കിലും പറയാതിരിക്കുന്നതെങ്ങനെ ? കംപ്യൂട്ടറുകൾ തല്ലിപ്പൊട്ടിച്ചതിൽ തുടങ്ങുന്നു ആ കഥകൾ. നെടുമ്പാശ്ശേരി വിമാനത്താവളത്തിൽ നിന്ന് വിമാനം പറന്നുയരണമെങ്കിൽ എൻ്റെ നെഞ്ചത്ത് കൂടി കയറി ഇറക്കൂ എന്ന് പറഞ്ഞ് റൺവേയിൽ കയറി കിടന്നു ഒരു നേതാവ്. അദ്ദേഹം പിന്നിട് അതിൻ്റെ ചെയർമാനായത് ചരിത്രം കാത്തു വച്ച തമാശ. ഇത് പോലെ പലത്.

സമയം കിട്ടുമ്പോൾ കഴിഞ്ഞ പത്ത് വർഷത്തെ ബഡ്ജറ്റുകൾ എടുത്ത് വായിച്ചു നോക്കണം. നല്ല തമാശയായിരിക്കും. നടപ്പക്കാതെ പോയ വാഗ്‌ദാനങ്ങളുടെ ഘോഷയാത്ര.

അപ്പോഴാണ് ഒരു പുതിയ സർക്കാർ തിരഞ്ഞെടുപ്പ് വാഗ്ദാനം ഭാഗീകമായെങ്കിലും നടപ്പാക്കിയത്. വിമർശിക്കുക തന്നെ വേണം.