കേരളത്തിലെ അതിപ്രതാപിയും ഒന്നിന്റെ സ്ഥാനത്ത് രണ്ട് ചങ്ക് എന്ന അപൂർവ്വതയുമുള്ള പിണറായി വിജയനെതിരേ ഒരു ഒറ്റയാൾ പോരാട്ടം. വി.എസിന്റെ പ്രതാപകാലത്തിനു ശേഷം അങ്ങിനെയൊരാൾ മലയാള നാട്ടിലുണ്ടായിരുന്നില്ല. പാർട്ടിയിലും സർക്കാരിലും മാത്രമല്ല സാധാജനങ്ങളുടെ സാമാന്യ ബോധത്തിനു മേൽ പോലും പിണറായി സമഗ്രാധിപത്യം സ്ഥാപിച്ചപ്പോൾ അതു ശരിയല്ലെന്നു പറയാൻ ഉയർന്നുവന്ന ഒരു ചെറു ശബ്ദം ഇന്ന് കേരളം തിരിച്ചറിയുന്ന ഒരു യുവശബ്ദമായി മാറിയിരിക്കുകയാണ്. ഷോൺ ജോർജ് എന്ന ചെറുപ്പക്കാരനാണ് പലപ്പോഴും തീർത്തും തനിയെ എന്നു തോന്നിപ്പിക്കുന്ന പോരാട്ട ഭൂമിയിൽ ഉയർന്നു നില്ക്കുന്നത്.

കോടതി മുറികളിലും പൊതുവേദികളിലും തികഞ്ഞ ഉത്തരവാദത്തോടെ ജനകീയ വിഷയങ്ങൾ ഉയർത്തുന്ന ഷോൺ ജോർജ്ജ് ഭരണകൂടത്തിന്റെ അക്കൗണ്ടബിലിറ്റിയെ സംബന്ധിച്ച ചർച്ചകൾക്കാണ് എന്നും തിരികൊളുത്തുന്നത്. കേരള രാഷ്ട്രീയത്തിൽ അഴിമതിക്കെതിരെ നിരന്തരം ശബ്ദമുയർത്തുന്ന ചുരുക്കം ചില യുവനേതാക്കളിൽ ഒരാളാണ് ഷോൺ ജോർജ്.

മുഖ്യമന്ത്രിയായിരിക്കേ പിണറായിയുടെ മകൾ വീണ വിജയനും എക്സാലോജിക് കമ്പനിക്കും എതിരെ ഉയർന്ന ‘മാസപ്പടി’ ആരോപണത്തിൽ ആദ്യം ഹൈക്കോടതിയെയും പിന്നീട് വിജിലൻസ് കോടതിയെയും സമീപിച്ചത് ഷോൺ ജോർജായിരുന്നു. ഭരണസ്വാധീനം ഉപയോഗിച്ച് നടത്തിയ സാമ്പത്തിക ഇടപാട് അന്വേഷിക്കണം എന്നായിരുന്നു അദ്ദേഹത്തിന്റെ പ്രധാന ആവശ്യം. ഈ കേസിന്റെ അനുരണനങ്ങളാണ് കേരളം ഇപ്പോഴും കണ്ടു കൊണ്ടിരിക്കുന്നത്

അഴിമതി ആരോപണങ്ങൾ ഉന്നയിക്കുക മാത്രമല്ല, അതിന് രേഖകളും തെളിവുകളും നിരത്തി നിയമപരമായി മുന്നോട്ട് പോകുന്ന രീതിയാണ് ഷോൺ ജോർജിനെ വ്യത്യസ്തനാക്കുന്നത്. പ്രതിപക്ഷത്തിന് പോലും എത്തിപ്പെടാൻ കഴിയാത്ത ഫയലുകളും വിവരാവകാശ രേഖകളും ഉപയോഗിച്ച് അദ്ദേഹം നടത്തിയ പോരാട്ടങ്ങൾ പലപ്പോഴും സർക്കാരിനെ പ്രതിസന്ധിയിലാക്കി...മറുപടി പറയാൻ നിർബന്ധിതമാക്കി.