"എൽഡിഎഫ് അല്ലാതെ മറ്റാരുണ്ട്?" എന്ന അഹങ്കാര ചോദ്യത്തിന് ജനങ്ങൾ കൃത്യമായ മറുപടി നൽകിയതിന് പകരം നൽകാൻ, പത്തു വർഷത്തെ സുഖനിദ്രയ്ക്ക് ശേഷം ഇടതുപക്ഷം വീണ്ടും പഴയ 'തെരുവ് യുദ്ധ' മോഡിലേക്ക്. നീണ്ട 10 വർഷങ്ങളുടെ ഇടവേളക്കുശേഷം കേരളത്തിലെ വിപ്ലവ മണ്ണിൽ ഇപ്പോൾ വിയർപ്പും ചോരയും ഒഴുക്കാനുള്ള ശ്രമങ്ങൾക്ക് സിപിഎം നേതൃത്വത്തിൽ വെള്ളവും വളവും പകരുന്ന പരിതാപകരമായ കാഴ്ച. ജനങ്ങൾ തോൽപ്പിച്ചതിന്റെ സങ്കടം തീർക്കാൻ ജനങ്ങളെത്തന്നെ തെരുവിൽ നേരിടുന്ന ഈ അപൂർവ്വ ജനാധിപത്യ ബോധത്തിന് മുന്നിൽ സാഷ്ടാംഗം പ്രണമിക്കുകയല്ലാതെ മറ്റ് വഴികളൊന്നുമില്ലാതെ പൊതുജനം.

കൃത്യമായി നികുതി അടയ്ക്കുന്ന പാവം പൊതുജനത്തിന് വഴിനടക്കാനുള്ള സ്വാതന്ത്ര്യവും ജീവിക്കാനുള്ള അവകാശവും പൂർണ്ണമായും തടസ്സപ്പെടുത്തിക്കൊണ്ട് തെരുവിൽ അരങ്ങേറുന്ന രാഷ്ട്രീയ നാടകങ്ങളെ 'ജനകീയ സമരം' എന്ന് വിശേഷിപ്പിക്കുന്നതിലും വലിയ മറ്റെന്ത് തമാശയാണ് ഉള്ളത്.

കഴിഞ്ഞ ലോക്സഭാ തിരഞ്ഞെടുപ്പിൽ ജനങ്ങൾ നൽകിയ ശക്തമായ രാഷ്ട്രീയ തിരിച്ചടിയെ 'തിരുത്തൽ' ആയി കാണാൻ ഇടതു നേതൃത്വം ഭയപ്പെടുകയാണ്. ഭരണതലപ്പത്തിരുന്ന മുൻ മുഖ്യമന്ത്രി പിണറായി വിജയന്റെ കടുത്ത ധാർഷ്ട്യവും 'താൻപോരിമ'യുമാണ് ഇടതുപക്ഷ സർക്കാരിന്റെ കനത്ത അധ:പതനത്തിന് ആക്കം കൂട്ടിയത്.

"ജനം അടങ്ങിയിരിക്കില്ല, രാഷ്ട്രീയമായി നേരിടും, തെരുവിൽ യുദ്ധം ചെയ്യും" എന്നൊക്കെയുള്ള ഭരണകക്ഷി നേതാക്കളുടെ വെല്ലുവിളികൾ സമരപ്രേരണ മാത്രമല്ല ജനാധിപത്യ സമൂഹത്തോടുള്ള തുറന്ന യുദ്ധപ്രഖ്യാപനവും കെട്ടിയാണ്. കഴിഞ്ഞ പത്തു വർഷക്കാലം ഭരണത്തിന്റെ തണലിൽ ഒളിപ്പിച്ചു വെച്ചിരുന്ന അക്രമവാസനയാണ് ഇപ്പോൾ അധികാര നഷ്ട ഭീതിയിൽ തെരുവിലേക്ക് പടരുന്നത്. നിത്യജീവിതത്തെ ബാധിക്കുന്ന ഇത്തരം സമരങ്ങളെ നേരിടാൻ പൊതുതാൽപര്യവുമായി ഏതെങ്കിലും ഒരു പൗരൻ മുന്നോട്ട് വന്നാൽ അവന്റെ ജീവിതം നരകതുല്യമാക്കുന്ന രാഷ്ട്രീയ അസഹിഷ്ണുതയാണ് കേരളത്തിലുള്ളത്. പൗരാവകാശങ്ങളെ ബാധിക്കുന്ന നിയമലംഘനങ്ങൾക്കെതിരെ സ്വമേധയാ കേസെടുക്കാൻ പോലും വിമുഖത കാട്ടുന്ന നീതിന്യായ സംവിധാനങ്ങൾ എനിക്ക് വേറെ വഴിയില്ല കൂടിയാവുമ്പോൾ ജനങ്ങൾ കൂടുതൽ നിസ്സഹായരാകുന്നു.