50 സീറ്റോടെ 45 വർഷത്തെ ഇടത് ഭരണം അവസാനിപ്പിച്ച് ബിജെപി അധികാരത്തിൽ വന്ന കോർപ്പറേഷനാണ്. ഇപ്പോൾ അവിടെ നടക്കുന്നത് ‘ഭരണ മാറ്റം’ അല്ല, ‘ഭരണഘടനാ മാറ്റം’ ആണെന്ന് ജനം. ഹാജർ ബുക്കാണ് ഭരണഘടന. അത് കീറാതെ നോക്കേണ്ടത് എല്ലാവരുടെയും ‘മൗലിക കടമ’ ആയിരിക്കുന്നു.

ഇനം: അറ്റൻഡൻസ് രജിസ്റ്റർ 4x100 മീറ്റർ റിലേ. തർക്കത്തിന്റെ തുടക്കം : KAAPA കേസിൽ അറസ്റ്റിലായ ബിജെപി കൗൺസിലർ ആർ. സുഗതൻ ജയിലിൽ കിടന്ന് ഒപ്പിടാൻ പാകത്തിന് രജിസ്റ്റർ ‘സുരക്ഷിതമായി’ മാറ്റിവെച്ചുവത്രേ. ഇത് കണ്ട കോൺഗ്രസ് കൗൺസിലർമാർ “ഇത് ജയിൽ റൂളല്ല, കൗൺസിൽ റൂളാണ്” എന്ന് പറഞ്ഞ് രജിസ്റ്റർ പിടിച്ചുവാങ്ങി.

കഴിഞ്ഞ വ്യാഴാഴ്ച മേയറുടെ ചേമ്പറിന് മുന്നിലും സമാന ‘കബഡി മത്സരം’ നടന്നിരുന്നു. അന്ന് മേയർ വി.വി. രാജേഷ്, ഡെപ്യൂട്ടി മേയർ ആശാ നാഥ് അടക്കം പരിക്കേറ്റ് ആശുപത്രിയിൽ. പോലീസ് രണ്ടു കൂട്ടർക്കും എതിരെ കേസെടുത്തു — വകുപ്പുകൾ: അന്യായമായി സംഘം ചേരൽ, കലാപം, മുറിവേൽപ്പിക്കൽ.

അടുത്ത എപ്പിസോഡ്: “അജണ്ട vs അജണ്ട: കടലാസ് യുദ്ധം”. ടിക്കറ്റ്: നികുതിദായകരുടെ പണം. പോപ്‌കോൺ: കൊണ്ടുവരേണ്ടത് അവരവർ തന്നെ.!