കേരളത്തിലെ മാധ്യമങ്ങൾക്കും മാധ്യമ പ്രവർത്തകർക്കും പി എസ് സിയുടെ കെടുകാര്യസ്ഥതയും സ്വജനപക്ഷപാതവും തിരിച്ചറിയാനുള്ള ഉൾവിളി ഉണ്ടായത് ഉദ്യോഗാർത്ഥികൾ ഒന്നു പൊട്ടിത്തെറിച്ചപ്പോഴാണ്.

മാധ്യമ ജാഗ്രതക്കു മേലെ പരസ്യ വരുമാനവും മൈനാകവും പറന്നുയരുന്ന കാലമാണല്ലോ.

കനത്ത ശമ്പളവും ടിഎ,ഡിഎ,കൺവയൻസ് അലവൻസ്,ഉപജീവന ബത്ത, വാഹനം പകിട്ടും പത്രാസും പിടിപ്പണം എന്നു വേണ്ട സർവ്വ വരദാനങ്ങളും പരന്നൊഴുകുന്ന പിഎസ് സി അംഗത്വം പാർട്ടിയിലെ വേണ്ടപ്പെട്ട ജന്മിമാർക്ക് സംവരണം ചെയ്തിട്ടുള്ളതാണ്. ഇടതു പക്ഷീയതയും ജനാധിപത്യവും അമിതമായതു കാരണം ചെറുതായ ചെറുകക്ഷികളുടെ നോമിനികളെ പൊതു ലേലത്തിലൂടെയാണ് തീരുമാനിക്കുക.

പിഎസ് സിയുടെ കാമ്പസിൽ കയറാൻ യോഗ്യത ഇല്ലാത്തവരും ഒരു പിഎസ് സി ചോദ്യപേപ്പർ പോലും കാണാത്തവരും നിയമന സംവിധാനവും അതിന്റെ അടിസ്ഥാന ധാരണകളും രീതി ശാസ്ത്രവുമായി പുലബന്ധമില്ലാത്തവരും, ഒപ്പിച്ചെടുത്ത നിയമ ബിരുദത്തിന്റെ തണലിൽ കമീഷനിൽ അംഗമായി തീരുന്നു. ഇത്തരം എരണം കെട്ടവരുടെ മുന്നിലേക്കാണ് ഗവേഷണ ബിരുദവും ബിരുദാനന്തര ബിരുദവമുളള നമ്മുടെ മക്കളും സഹോദരങ്ങളും അഭിമുഖത്തിനായി ചെന്നു കയറി കൊടുക്കേണ്ടത്..