മദ്യം, മദിരാക്ഷി,ലോട്ടറി. ഈ വാക് ത്രയത്തിലാണ് മലയാളിയുടെ പുതിയകാല രാഷ്ട്രീയം ഉരുണ്ടു പോകുന്നത്. കേരളത്തിലെ പ്രശസ്തമായ മദ്യ കഥയിലെ പാത്രങ്ങളായിരുന്നല്ലോ സുധീരൻ എന്ന ധീരനും ഉമ്മൻ ചാണ്ടി എന്ന ജനകീയനും. കഥാന്ത്യം വാളുവയ്ക്കാൻ കഴിയാതെ പരസഹസ്രം പേർ കുഴങ്ങി. ബാറുകൾ വെറും മുപ്പതായി ചുരുങ്ങി. നേരത്തെ തന്നെ വിധു പോയ മലയാളി ജീവിതത്തിൽനിന്ന് മധുവും മാഞ്ഞ കാലം.!

തോക്കിലൂടെ മാത്രമല്ല പെണ്ണുടലും കമ്പിക്കഥയും ഭാരതധ്വനിയും എക്സ്ഹാംസ്റ്ററും മാർഗമാക്കിയും അധികാര മർമം തൊടാം എന്ന പുതു പാഠം അവർ അവതരിപ്പിച്ചു.

മലയാളിക്ക് ദാഹം അല്ലേലും ഇച്ചിരി കൂടുതലാ. സ്വാഭാവികമല്ലാതെ വളർത്തുന്ന തമിഴകത്തെ ഇളനീരാണ് നാം കുടിച്ചു വറ്റിക്കുന്നത്. തെങ്ങില്ലാത്ത കാരണത്താൽ ഇവിടെ മോന്താൻ കള്ളുമില്ല. അതിനാൽ കള്ളക്കള്ളു കലക്കി എടുക്കണം. എന്തൊരു തൊന്തരവാ..

എന്നാൽ കേരളത്തിന്റെ ഹെറിറ്റേജ് ഫ്രൂട്ട് മാങ്ങേം തേങ്ങേം ഒന്നുമല്ല.അതു ചക്കയാണ്. നാട്ടിലെവിടെയും ചറപറാ വീണ് മുയലുകളെ കൊല്ലുന്ന ലക്ഷണയുക്തമായ ചക്ക. അതിനെയാണ് നാം 'ദേശീയപക്ഷി'ആക്കേണ്ടത്. മുഴുപ്പു കൊണ്ട് പോണോഗ്രഫിയിലെ അർത്ഥ വ്യാഖ്യാനം ഇവിടെ അനുചിതമാണ്. തമിഴൻ കേരളത്തിൽ നിന്ന് നിസ്സാര വിലയ്ക്ക് വാങ്ങിക്കൂട്ടുന്ന ഉല്പന്നം എന്ന നിലയിൽ സുലഭമായ ചക്കയിൽ നിന്നും ഹെറിറ്റേജ് ബിവേറെജ് വൻ തോതിൽ നിർമ്മിക്കാൻ കഴിയണം. ആരാലും പരിചരിക്കപ്പെടാതെയും ആരുടെയും അനുമതി കാക്കാതെയും വളരുന്ന ഓർഗാനിക് വിള.അതു ചക്ക മാത്രമാണ്. അരക്കുള്ളതു കൊണ്ട് കൈ ലാവണ്യം പോകുമെന്ന പേടിയിൽ ചക്കക്കൊതിയുള്ളപ്പോഴും അംഗനമാർ അത് തൊടില്ല.