ജനങ്ങൾ നിയമസഭയിൽ നിന്നും പുറത്താക്കിയ മാന്യദേഹങ്ങളിലൊരാളാണ് പി.രാജീവ് എന്ന ദാർശനികൻ. ടാറ്റ അവരുടെ സംരംഭത്തിനു നോ പറഞ്ഞത് നാണക്കേടായി എന്ന ദർശനമാണ് പുതുതായി ഇദ്യം പുറപ്പെടുവിച്ചത്. മന്ത്രിയായിരിക്കേ ഇയാളു പണ്ടു കാണാപ്പാഠം പറഞ്ഞ നിക്ഷേപ പട്ടിക എവിടെയെന്ന് നാട്ടാര് ചോദിക്കുന്നത് നാണക്കേടാവില്ലേ സ്നേഹിതാ? കണക്ക് കൊണ്ട് വ്യവസായ യൂണിറ്റുകളിൽ മഹാരാഷ്ട്രയെ പിന്നിലും കേരളത്തെ മുന്നിലുമാക്കിയ ഒടിയനാണ് പുള്ളി.

എല്ലാവർക്കും തൊഴിലും വിദ്യാഭ്യാസവും ഭൂമിയും ഉണ്ടാകുന്നത് മുതലാളിത്ത മുദ്രാവാക്യമാണെന്നു ഉഭയജീവിയുടെ ശബ്ദ വീചിയിൽ ഉരച്ചതും ഇദ്ദ്യം തന്നെ. മുന്തിയ സൂളിൽ പഠിപ്പിച്ചു മൂശേട്ടകളായ തൊഴിലാളികളുടെ മക്കളുമായി കലർത്താതെ മകളെ മുതലാളിത്ത കൂടാരത്തിൽ പറഞ്ഞു വിട്ടിട്ട് പൊതു വിദ്യാഭ്യാസത്തെ വല്ലാതങ്ങു പൊലിപ്പിച്ചതും ഇതിയാൻ തന്നെ .ഇനി ഈനാശുവിന്റെ പറച്ചിൽ ശരിക്കും സതീശനുള്ളതാണോ,അതോ തന്റെ പ്രധാന്യം വിളിച്ചോതുന്ന പാർട്ടിക്കുള്ള ശബ്ദ സന്ദേശമോ?

ഇടതു രാഷ്ട്രീയം തകർന്നു പോയില്ലെന്നു നിരന്തരം ഒപ്പാരിടുന്നത് സംസ്ഥാന സെക്രട്ടറി മുതൽ ബ്രാഞ്ച് സെക്രട്ടറി വരെയുള്ളവരാണ് .ആരാനും അങ്ങനെ മൊഴിഞ്ഞോ സഖീ? എല്ലാം വേവലാതികൾ! എല്ലാം തേവാംഗുകൾ!

അഖിലേന്ത്യാ കമ്മിറ്റി മുതൽ മണ്ഡലം വരെയുള്ള തടസ്സങ്ങൾ നീക്കിയാണ് സതീശൻ വന്നത്. കടലു കടന്നവന് എന്ത് കൈത്തോട്.. തമ്മിൽ അറിയാത്ത,ചുമതലകൾ യാതൊന്നുമില്ലാത്ത അസംഖ്യം ജനറൽ സെക്രട്ടറിമാരും പോഷകക്കാരും പുര നിറഞ്ഞു നിൽക്കുന്ന കോൺഗ്രസ്സിൽ പരാതിക്കാരും പരിഭവക്കാരും സ്വന്തം വിലാസം രജിസ്റ്റർ ചെയ്യാൻ ഉദ്യമിക്കുന്നത് സ്ഥിരം കലാപരിപാടിയാണ്..