അർജന്റീനയുടെ വിശ്വപ്രസിദ്ധ ഫുട്ബോൾ ഇതിഹാസം ലയണൽ മെസ്സി കേരളത്തിന്, പ്രത്യേകിച്ചും ഫുട്ബോൾ പ്രിയത്തിൽ മുമ്പർമാരായ മലബാറുകാർക്ക് കേരളത്തിന്റെ തന്നെ പ്രിയപുത്രനാണ്. നമുക്ക് ലോകകപ്പ് ടിവിയിൽ കാണാനേ യോഗമുള്ളൂ. പക്ഷേ മത്സരം നടക്കുമ്പോൾ കേരളത്തിനു വേണ്ടി കളിക്കുന്നത് അർജന്റീനയാണെന്ന് തോന്നിപ്പോകും. അത്രയ്ക്കുണ്ട് അർജന്റീനയോടും മെസ്സിയോടുമുള്ള നമ്മുടെ പ്രണയം.

തുടക്കം മുതൽ തന്നെ സംശയ നിഴലിലായിരുന്നു സംഘാടനമെങ്കിലും ഫുട്ബോൾ പ്രേമികൾ കൊച്ചിയിൽ മെസ്സിയുടെ ഇടംകാലൻ ഗോളിനായി കാത്തിരുന്നു. അല്ലെങ്കിലും നമ്മൾ പാവം മലയാളികൾ അങ്ങിനെയാണ്. തട്ടിപ്പാണെന്നറിയാമെങ്കിലും നമ്മൾ അവിടെയൊക്കെപ്പോയി തല വയ്ക്കും. ഇവിടെയും സംഭവിച്ചത് അതു തന്നെ.

ടിക്കറ്റ് വിൽപ്പനയുടെ കണക്കാണ് ഏറ്റവും രസകരം. മെസ്സി വരുന്നതിന് മുൻപ് തന്നെ വിഐപി ടിക്കറ്റുകൾ വിറ്റഴിഞ്ഞു. ആര് വാങ്ങി, എത്രരൂപയ്ക്ക് വാങ്ങി, പണം എവിടെപ്പോയി എന്നൊക്കെ ചോദിച്ചാൽ ഉത്തരമില്ല. കാണികൾക്ക് മുന്നിൽ നടക്കേണ്ട കളി, കാണികൾ അറിയാതെ പിന്നിൽ നടന്നുവെന്ന് സാരം.

ശരിയാണ്. കേരളത്തിൽ റോഡിൽ കുഴിയുണ്ട്, ആശുപത്രിയിൽ മരുന്നില്ല, യുവാക്കൾക്ക് ജോലിയില്ല. പക്ഷെ നമുക്കുള്ളത് മാനംമുട്ടെ ആഗ്രഹങ്ങളാണ്, മെസ്സി വരണം എന്നത് അവയിലൊന്നു മാത്രം. ആ ആഗ്രഹത്തിന് കൊടുക്കേണ്ടി വന്ന വലിയ വില ജനങ്ങൾ തന്നെ ഒടുക്കണം. ഒടുക്കലത്തെ വില!