ഒന്ന് ആഞ്ഞു പിടിച്ചാൽ സുഭാഷിതങ്ങളിൽ മണിയാശാനെ തോൽപിക്കാനുള്ള ചിന്താ ശേഷിയുണ്ട് നമ്മുടെ പുതിയ യുവജന നേതാവിന്. അബദ്ധങ്ങൾ എത്ര വേണേലുമാകാം. പിന്നെ തിരുത്താനൊന്നും നില്ക്കരുതെന്നതാണ് നമ്മുടെ യുവജനനയമെന്ന് സ്വജീവിതം കൊണ്ടു കാട്ടിത്തന്നയാളാണല്ലോ ദേശീയാടിസ്ഥാനത്തിൽ നമ്മെ നയിക്കുന്നത്.

പാണന്മാർ പെയ്ഡ് പബ്ളിസിറ്റിയായി പാടി നടന്ന ഗാഥകളെല്ലാം സാമൂഹിക വിരുദ്ധതകളിൽ ചാലിച്ച , നൈതികതക്കും മാനുഷികതക്കും എതിരായ അട്ടിമറികളായിരുന്നുവല്ലോ തീനും കുടിയും തരമാക്കിയ കൗണ്ഡിനന്മാരുടെ സംഭാവനകളാണ് ധീരോദാത്ത സമരങ്ങളെല്ലാം.അവർ വിപ്ലവ പൈങ്കളിയെ പാറിച്ചു മുട്ടത്തു വർക്കിയെ തോൽപ്പിച്ചു. അങ്ങനെ ചക്കാത്തിനു നായകരായ വായാടികളാണ് ഇന്നത്തെ ദീപസ്തംഭങ്ങൾ.മഹാശ്ചര്യങ്ങൾ!. പക്ഷേ നമുക്കും കിട്ടണം പണം എന്നതിൽ അപ്പടി പിപ്പിടി തവളാച്ചി തന്നെ.. അതു കട്ടായം.!

അമ്മായി ചുട്ട അപ്പമെല്ലാം വിഴുങ്ങിയും ജാമാതാവിന്റെ ഒഫീഷിയേറ്റിംഗ് കപ്പാസിറ്റിയിലും പുതിയാപ്ല മന്ത്രിയായി. മരുമക്കത്തായം അനുസരിച്ച് രായാവ് ആവാനായിരുന്നു പൂതി. വരട്ടുവാദികളായ ജനം സമ്മതിച്ചില്ല. കുണ്ഠിതം മീതി. കണ്ടിപ്പായും പാർക്കാലാം; അടുത്ത തേർതലിൽ!

കഥയുടെ പിന്നത്തെ ഷിഫ്റ്റ് വാഴക്കൊലയായി. അത് വൈലോപ്പിള്ളിയുടെ കുലയാണോ ചങ്ങമ്പുഴയുടെതോ എന്നതിൽ തട്ടി നിന്നു ചിന്ത.ശേഷം ചിന്ത്യം ! ഗതികെട്ട ഗവേഷണമേഖലയെ യാരും പാർത്തതില്ലൈ. മഹാഭാഗ്യം !