മാർകേസിന്റെ കഥാപാത്രമായ കേണലിനെന്ന പോൽ മലയാളികൾക്കും ഇപ്പോൾ ആരും എഴുതുന്നില്ല. കത്തിലൂടെയുള്ള സാംസ്കാരിക വിനിമയം നിലച്ചു പോയി. ഇപ്പോഴുള്ള കടിതങ്ങൾ സർക്കാരിന്റെ ഇണ്ടാസുകൾ മാത്രം. അതിനായി കുറെ ഗുമസ്തൻമാർ മാത്രമാണ് ബാക്കിയുള്ളത്.ഈശ്വരോ..രക്ഷതു !

സൊമാറ്റയുടെയും സ്വിഗ്ഗിയുടെയും നാമം പേറുന്ന ചതുര വടിവുള്ള തുകൽ പെട്ടകങ്ങൾ ബൈക്കിന്റെ പിന്നിൽ വച്ച് നമ്മുടെ നാട്ടുവഴികളിൽ പാഞ്ഞു പോകുന്ന ജെൻസികൾ ഇന്ന് നിത്യകാഴ്ചയാണ്. നമ്മുടെ വാതിൽപ്പടിയിൽ സാധനങ്ങളും സേവനങ്ങളും എത്തിക്കുന്ന അവരാണ് ഗിഗ് വർക്കേഴ്സ് .

ഗിഗ് പണ്ടേക്കു പണ്ടേയുണ്ട് . പക്ഷേ അതെല്ലാം ഓഫ് ലൈൻ മോഡിലായിരുന്നു എന്നു മാത്രം ചരക്കു നീക്കവും ഫുഡ് ഡെലിവറിയും കാറ്ററിംഗുമായിരുന്നു അവയിൽ ചിലത്.. പക്ഷേ ഇന്നത്തെ ഗിഗ് തൊഴിലാളികൾ ഫുഡ് ഡെലിവറിയും വിപണനവും മാത്രമല്ല ഡിജിറ്റൽ മാർക്കറ്റിംഗും ഫ്രീലാൻസ് ജോലികളും ട്ട്യൂട്ടോറിയലും ഉൾപ്പെടെയുള്ള എല്ലാ പ്രൊഫഷണൽ ഓൺലൈൻ ആക്ടിവിറ്റികളും വിജയകരമായി നിർവഹിക്കുന്നവരാണ്.

ഊണിലും ഉടുപ്പിലും ഉടലഴകിലും വേണ്ട കോപ്പുകളും തീൻപണ്ടങ്ങളും എത്തിക്കുന്ന അയ്യായിരം വരുന്ന ഗിഗ്ഗുമാർ കേരളത്തിലെ നമ്മുടെ പരിസരങ്ങളിൽ പണിയെടുക്കുന്നു. . പരമ്പരാഗത നടപ്പു രീതികളെ ഗിഗ് ഇക്കണോമി അസ്ഥിരപ്പെടുത്തുന്നു. തൊഴിലാളിയാണ് ഇവിടെ നിബന്ധനകൾ തീരുമാനിക്കുക. അതാവാം ജൻസികളെ ഇതിലേക്ക് സ്വാധിനിക്കുന്നത്. ഈ രംഗത്ത് വനിതകൾ കുറവും കുടിയേറ്റക്കാർ കൂടുതലുമാണ്. എങ്കിലും അനൗപചാരിക തൊഴിൽ മേഖലയുടെ എല്ലാ അസ്കിതകളും ഇവിടെയും കാണാം.