“അമ്മ ഫ്രിഡ്ജിൽ വെച്ച മീൻ കറണ്ട് പോയി കേടായി. അമ്മ ഇപ്പോൾ സണ്ണി ജോസഫിനെ ശപിക്കുകയാണ്.” സമൂഹ മാധ്യമങ്ങളിലെ വിശ്വസാഹിത്യകാരൻമാർ ചമയ്ക്കുന്ന കഥാ പരമ്പരകളിൽ നല്ല ഓട്ടമുള്ള ഒരു കഥയാണ്. എന്നാൽ നാട്ടിലെ പെണ്ണുങ്ങൾ സണ്ണി ജോസഫ് എന്ന പേര് പഠിച്ചു വരുന്നേയുള്ളൂ എന്നതാണ് വസ്തുത. പ്രാക്കു മുഴുവൻ പോകുന്നത് വിഡി സതീശനിലേക്കാണ്.

കറണ്ടാപ്പിസ് ജീവനക്കാർ ഇപ്പോൾ ആപ്പീസിലെത്തിയാൽ ആദ്യം ചെയ്യുന്ന പണി കറണ്ട് കട്ടാക്കുക എന്നതാണ്. അതു കഴിഞ്ഞാണ് അറ്റൻഡൻസ് ഗ്രന്ഥത്തിൽ ഒപ്പിടുന്നതു പോലും. പിന്നെ നാട്ടാർക്ക് സുഖമാണ്. ഹൈ ടെൻഷൻ എക്ട്രാഹൈ ടെൻഷൻ തുടങ്ങിയ സാങ്കേതികപദങ്ങൾ ചേർത്ത് കാരണം പറയുന്ന സന്ദേശങ്ങൾ നമ്മുടെ മൊബൈലിലേക്ക് കെ എസ് ഇ ബി ഇപ്പോഴും ദിവസം നാലു നേരം അയക്കുന്നുണ്ട്. പോയ കറണ്ട് ഉടനേ തിരിച്ചു വരുമെന്ന് ബേജാറില്ലാത്തതു കൊണ്ട് നമുക്ക് ടെൻഷനേയില്ല.

ഉമ്മൻ ചാണ്ടി സർക്കാർ ഉണ്ടാക്കിയ ദീർഘകാല വൈദ്യുതിക്കരാർ കഴിഞ്ഞ സർക്കാർ റദ്ദാക്കിയതാണ് ഇപ്പോഴത്തെ പ്രതിസന്ധിക്ക് കാരണമെന്ന് പറഞ്ഞാൽ അത് ജനം തൊണ്ട തൊടാതെ വിഴുങ്ങിക്കൊള്ളുമെന്നാണ് സണ്ണി ജോസഫ് കരുതുന്നത്. ചൂട് കൂടി ഉപഭോഗം കൂടി. മഴ കുറഞ്ഞു.വൈദ്യുതിയുൽപ്പാദനവും ലഭ്യതയും കുറഞ്ഞു. പിന്നെന്തു ചെയ്യാനാണ് എന്നാണ് ചോദ്യം. ഇതേ സാഹചര്യങ്ങൾ കഴിഞ്ഞ പത്തു വർഷവുമുണ്ടായിരുന്നല്ലോ. അന്ന് എങ്ങിനെ പരിഹരിച്ചുവെന്ന് പിണറായിയോടു ചോദിക്കാൻ മടിയാണെങ്കിൽ കൃഷ്ണൻ കുട്ടിയോടെങ്കിലും ചോദിച്ചു കൂടേ? ഉപഭോഗം കൂടുമ്പോൾ ഉയർന്ന നിരക്കിൽ വൈദ്യുതി വാങ്ങി പ്രതിസന്ധി പരിഹരിക്കാമെന്ന പ്രാഥമിക ബോധമെങ്കിലുമുണ്ടാവണ്ടേ? വൈദ്യുതി വില്ക്കുന്ന കർണ്ണാടകം ഭരിക്കുന്നത് ബി ജെ പി യോ സിപിഎം ഓ അല്ലല്ലോ സണ്ണിക്കുട്ടാ .

സോഷ്യൽ മീഡിയ യൂണിവേഴ്സിറ്റിയിലെ സാമ്പത്തിക വിദഗ്ധർ പറയും — കേരളത്തിലാണ് ഏറ്റവും കൂടിയ വൈദ്യുതി നിരക്ക്. എന്നാൽ സത്യം KSEB പറയുന്നു: രാജസ്ഥാൻ, മഹാരാഷ്ട്ര, ഗുജറാത്ത്, ബംഗാൾ ഒക്കെ നമ്മളേക്കാൾ പിഴിയുന്നുണ്ട്. നമ്മൾ ദക്ഷിണേന്ത്യയിൽ ഏറ്റവും ചീപ്പാണ്. 100 യൂണിറ്റിന് 4.67 രൂപ. അതായത് വാസ്തവത്തിൽ കേരളത്തിൽ കറണ്ട് ചീപ്പാണ്, പക്ഷേ കിട്ടില്ല. ബീവറേജസിൽ മദ്യം ചീപ്പാണ്, പക്ഷേ ക്യൂവിൽ നിന്നാൽ കിട്ടില്ല എന്ന് പറയുന്നത് പോലെ.