'ഇന്ത്യ,ഇന്ത്യയുടേതെന്നും ചൈന, ചൈനയുടേതെന്നും പറയുന്ന കാശ്മീർ' എന്നത് പഴയൊരു കമ്മ്യൂണിസ്‌റ്റ്‌ പ്രയോഗമാണ്. 'പിണറായി ഇല്ലെന്നും ഇഡി ഉണ്ടെന്നും പറയുന്ന റെഡ്ബുക്ക്' എന്നതാണ് വിപുലീകൃത നിദ്രാ സമ്മേളന കാലയളവിലെ പുത്തൻ കമ്മ്യൂണിസ്റ്റ് പ്രയോഗം.

എങ്കിലും പിണറായി ചോദിച്ചു 'എന്ത് റെഡ്ബുക്ക്, ഏത് ബ്ലാക് ബോക്സ്'? വെറുതേ ഇഡിയെ എരി കയറ്റി. പിറ്റേന്നു തന്നെ ഇഡി ആ രക്ത പുസ്തകത്തിന്റെ താളുകൾ മുതലാളിത്ത ബൂർഷ്വാ മാധ്യമങ്ങളിലൂടെ പുറത്തുവിട്ടു. വല്ല കാര്യവുമുണ്ടായിരുന്നോ ഈ കാർന്നോർക്ക്!

ഗ്രഹണം വരുമ്പോൾ സ്വപ്നയും തലപൊക്കും എന്നാണല്ലോ. അത് അച്ചെട്ടാണെന്നുറപ്പിച്ച് ബിരിയാണിച്ചെമ്പും, സ്വർണ്ണവും, നയതന്ത്ര ബാഗേജുമൊക്കെ പൊക്കിപ്പിടിച്ച് സ്വപ്നയെത്തിയിട്ടുണ്ട്. ഒരു വിപുലീകൃത പത്രസമ്മേളനം വിളിച്ചാണ് സ്വപ്ന,മാനം മര്യാദക്ക് ജീവിക്കുന്ന ഒരു പാർട്ടി കുടുംബത്തിനു നേരേ കുഴിബോംബാക്രമണം നടത്തിയത്. അതുകൊണ്ടു തീരുമെന്ന് കരുതിയവർക്ക് തെറ്റി. ജനത്തിൽ നിന്ന് പടിയിറങ്ങിയെന്ന് പോസ്റ്റിട്ട് പുതിയ പ്രസ്ഥാനത്തിലേക്ക് പോയ അനിൽ നമ്പ്യാർ ഗണപതിയ്ക്കടിച്ച് തുടക്കം കുറിച്ചതും പത്രസമ്മേളനത്തിൽ സ്വപ്ന പറഞ്ഞ കാര്യങ്ങളുടെ ഇന്റർനാഷണൽ എക്സ്ക്ലൂസീവുമായിത്തന്നെ. ചേരേണ്ടവർ ചേർന്നാൽ ഇനി എന്തു സംഭവിക്കുമെന്ന് കണ്ടുതന്നെ അറിയാൻ ഒരുങ്ങിക്കോളൂ....