പിണറായിയിൽ തുടങ്ങി പിണറായിയിൽ ഒടുങ്ങുന്ന ചരിത്രത്തിലെ ഒരു അസംബന്ധ നിർമിതിയുടെ തിരോധാനത്തിന് കേളി കെട്ടുണരുന്ന ഒരു മഹാസമ്മേളനമാണ് കോഴിക്കോട് കടാപ്പുറത്ത് കെട്ടഴിഞ്ഞു വീണത്. ഉച്ചിയിൽ വച്ച കൈ കൊണ്ടു തന്നെ ആവണോ ഉദകക്രിയ? പക്ഷേ ആയതിനും.ആ നാട്ടുകാരൻ തന്നെ നിയോഗമാകുന്നു എന്നത് കാലം കാത്തുവച്ച മഹാ തിരുത്തലാണെന്ന് മാർക്സിസ്റ്റ് വിരുദ്ധ മൂരാച്ചികൾ പറയും.അല്ലേ സഖെ ?

ഉൽസവം കൊടിയിറങ്ങിയ രാവിൽ കണ്ണൂരിലെ തെരുവുകളിൽ പടർന്നുകയറിയത് പൂക്കുറ്റികളും മാലപ്പടക്കങ്ങളും ഹർഷാരവം മുഴങ്ങന്ന സ്വീകരണങ്ങളും..കണ്ണേ കരളേ ജയരാജാ.. ചെന്താരകമേ ചെമ്പൊട്ടേ.. ജയരാജാ..ജയരാജാ... ഒതുക്കപ്പെട്ടവൻ ഉയിർക്കുന്നു.പാച്ചുവും കോവാലനൂം ഞെട്ടി തിരിച്ചറിയുന്നു;കണ്ണൂർ കടക്കാനുള്ള പാലം ഇനി പി ജെ ആർമിയാണെന്ന്....

സോഷ്യലിസത്തെ ഭൂമുഖത്തു നിന്നു തന്നെ ചുട്ടി തോർത്തു കൊണ്ടു തുടച്ചു മാറ്റിയ ധീരനാണ് മഹാനായ വിപ്ളവ സിങ്കമാണ് യഥാർത്ഥ ഗോർബ്ബച്ചേവ് .അല്പത്തവും അഹങ്കാരവും അറിവുകേടും അരക്ഷിതത്വവും ആളു ചമയലും കൊണ്ട് പാർട്ടിയുടെ അവസാനത്തിനു ആരംഭം കുറിച്ച കേരള ഗോർബ്ബച്ചോവ് കുറ്റവിമുക്തനായി. ഇതിയാനെ സമ്മേളനം വല്ലാതങ്ങു വെളുപ്പിക്കുക വഴി ഈ കൂട്ടായ്മയുടെ ഉദ്ദേശ്യ ലക്ഷ്യങ്ങൾ തന്നെ റദ്ദാവുന്നു . അശ്ലീലമാവുന്നു. ബിസിനസ് പ്രമോഷനും ടാർഗറ്റു നിർണയിക്കുന്നതിനുമുള്ള ഒരു കോർപ്പറേറ്റ് കോൺഫറൻസിന്റെ ഗരിമയിലേക്ക് വിപ്ലവം തലതല്ലി ഒടുങ്ങുകയാണോ എന്റെ മുത്തപ്പാ...

സംസ്കൃത ശ്ലോകങ്ങൾ സ്ഥാനത്തും അസ്ഥാനത്തും തട്ടിവിടുന്ന പഴയ നമ്പൂരിച്ചനെയാണ് ഗോവിന്ദൻ ഓർമിപ്പിക്കുന്നത്.വ്യത്യാസം പഴയ യാന്ത്രിക മലയാള വിവർത്തന ഉദ്ധരണികൾ എന്നുമാത്രം. പുതിയ കാല വിനിമയത്തിനു ട്യൂഷൻ അദ്ദേഹത്തിനു വേണ്ടതുണ്ട്.എന്നാൽ പുറത്തു പറയില്ല എന്ന ഉറപ്പിൽ ചന്തിയിൽ പീലി കൊണ്ടുള്ള ഒരു ശാസനത്തിൽ പാർട്ടി മാഷിന് മോക്ഷം നൽകി.