സർക്കാരിന് ഇനി പുതിയ സാംസ്കാരിക മുഖം

സർക്കാരിന് ഇനി പുതിയ സാംസ്കാരിക മുഖം

അനിൽ ബാലകൃഷ്ണൻ

27 September 2026, 5:05 am

നാല് മാസമായി സതീശൻസർക്കാർ അധികാരത്തിൽ വന്നിട്ട്. സർക്കാരിന്റെ സാംസ്കാരികസ്ഥാപനങ്ങൾ പക്ഷേ മേധാവികളാകാതെ തൃശങ്കുവിലായിരുന്നു ഇത്രയും നാൾ. സർക്കാർ വന്ന ശേഷം സെക്രട്ടറിയേറ്റിനു ചുറ്റും പ്രതിദിനമെത്തുന്ന പുരുഷാരത്തിൽ ബഹുഭൂരിപക്ഷവും സാംസ്കാരിക സ്ഥാപനങ്ങളിലേക്ക് ഉടുപ്പു തുന്നിയ തീർത്ഥാടകരായിരുന്നുവെന്നത് പരസ്യമായ രഹസ്യമാണ്. പത്തു വർഷവും ഇടതരായിരുന്ന ചിലരും ചെങ്കുപ്പായങ്ങൾ മാറ്റി സതീശ സ്തുതികളുമായി ചുറ്റിനടക്കുന്നുണ്ടായിരുന്നു. നിയമനം നീളുന്ന ഓരോ നിമിഷവുംചങ്കിടിപ്പിന്റെ ശബ്ദം തലസ്ഥാനത്തുനിന്ന് തുടങ്ങി കാസർഗോഡു വരെയും ചില സന്ദർഭങ്ങളിൽ ദില്ലിയിലും പ്രതിധ്വനിച്ചു നിന്നു. ഇപ്പോൾ സ്ഥിതി ശാന്തം. പ്രധാന സാംസ്കാരികസ്ഥാപനങ്ങൾക്ക് അധ്യക്ഷൻമാരെ തീരുമാനിച്ച് സർക്കാർ നടുനിവർത്തിയിരിക്കുന്നു. കാര്യമായ ആക്ഷേപങ്ങൾക്ക് അവസരമൊരുക്കാതെയാണ് തീരുമാനമെന്നത് എടുത്തു പറയേണ്ടതാണ്.

ഉമ്മൻ ചാണ്ടി മുഖ്യമന്ത്രിയായിരുന്ന കാലത്താണ് സൂര്യാ കൃഷ്ണമൂർത്തി സംഗീത നാടക അക്കാദമിയുടെ അധ്യക്ഷസ്ഥാനത്തേക്ക് വരുന്നത് രാജ്യത്തെ തന്നെ ഏറ്റവും വിപുലവും അർത്ഥപൂർണ്ണവുമായ കലാ സാംസ്കാരിക പ്രസ്ഥാനത്തിന്റെ സംഘാടകൻ എന്ന നിലയിൽ സമാർജ്ജിച്ച ഊർജ്ജവും കലാരംഗത്തുള്ളവരോടുള്ള ആത്മാർത്ഥമായ ആഭിമുഖ്യവുമായിരുന്നു കൃഷ്ണമൂർത്തിയുടെ കൈമുതൽ.

കേരളത്തിലെ സംഗീത - നാടക മേഖലയിലെ മുഴുവൻ പേരെയും ചേർത്തുപിടിക്കുകയും അവരുടെ ജീവിതവ്യഥകൾക്ക് പരിഹാരം തേടുകയും ചെയ്തകാലമായിരുന്നു അത്. മാതൃകാപരമായിരുന്നു കൃഷ്ണ മൂർത്തിയുടെ പ്രവർത്തനങ്ങൾ. ഇപ്പോൾ സംസ്ഥാനത്തെ സാംസ്കാരിക സ്ഥാപനങ്ങൾക്ക് പുതിയ നേതൃത്വം വരുമ്പോൾ ഈയാഴ്ച അന്തരിച്ച കൃഷ്ണമൂർത്തിയെ ഓർക്കാതിരിക്കാനാവുന്നില്ല.

മുൻപേ നടന്നു പോയവരുടെ നല്ല പ്രവർത്തനമാതൃകകളാവണം പുതുതായെത്തുന്നവരുടെ മൂലധനം.

സാഹിത്യം, സംഗീതം, നാടകം, ലളിതകല, നാടോടിക്കല, സിനിമ തുടങ്ങിയ മേഖലകളെ പ്രതിനിധീകരിക്കുന്ന സ്ഥാപനങ്ങളുടെ തലപ്പത്തേക്ക് വിവിധ മേഖലകളിൽ വ്യക്തിമുദ്ര പതിപ്പിച്ചവരാണ് ഇക്കുറി എത്തുന്നത് എന്നത് ആശ്വാസകരമാണ്. രാഷ്ട്രീയം നോക്കിത്തന്നെയാണ് നിയമനം. പക്ഷേ കക്ഷിരാഷ്ട്രീയത്തിനതീതമായ കാഴ്ചപ്പാടുകൾ ഉള്ളവരാണ് ഇവരെന്നത് ആശ്വാസകരമാണ്. കേരള സാഹിത്യ അക്കാദമിയുടെ അധ്യക്ഷനായി കൽപറ്റ നാരായണൻ, സംഗീത നാടക അക്കാദമിയിൽ ജി. വേണുഗോപാൽ, കേരള സംസ്ഥാന ചലച്ചിത്ര വികസന കോർപ്പറേഷന്റെ ചെയർമാനായി പ്രേംകുമാർ,ലളിതകലാ അക്കാദമിയിൽ പ്രഫ. പ്രകാശ് മൂർത്തി, ഫോക്‌ലോർ അക്കാദമിയിലേക്ക് സുരേഷ് ബാബു എളയാവൂർ, ചലച്ചിത്ര അക്കാദമിയിൽ രവീന്ദ്രൻ, സാംസ്കാരിക പ്രവർത്തക ക്ഷേമനിധി ബോർഡിൽ എം. രഞ്ജിത് എന്നിവരാണ് പുതിയ നേതൃത്വത്തിലേക്ക് എത്തുന്നത്.

നിയമനം സ്വാഭാവികമായും ആ ദിവസത്തെ വാർത്തയാണ്. എന്നാൽ പദവി ഏറ്റെടുക്കുന്നതോടെ വാർത്ത അവസാനിക്കുകയും യഥാർഥ ഉത്തരവാദിത്തം ആരംഭിക്കുകയും ചെയ്യുന്നു.

സാംസ്കാരിക സ്ഥാപനങ്ങളുടെ അധ്യക്ഷപദവി സർക്കാർ സംവിധാനത്തിലെ മറ്റൊരു ഭരണപദവിയായി മാത്രം കാണാനാവില്ല. ഒരു സമൂഹത്തിന്റെ സർഗാത്മകതയുടെയും സാംസ്കാരികസ്മരണയുടെയും പൈതൃകത്തിന്റെയും ഭാവിയുടെയും സംരക്ഷണച്ചുമതലയാണ് ഓരോ അധ്യക്ഷന്റെയും മുന്നിലുള്ളത്.

സ്ഥാപനങ്ങളെ എത്രത്തോളം കൂടുതൽ ജനാധിപത്യപരവും സുതാര്യവും സർഗാത്മകവുമാക്കാൻ കഴിയുന്നു എന്നതാണ് വിലയിരുത്തപ്പെടുക.

കവി, എഴുത്തുകാരൻ, പ്രഭാഷകൻ എന്നീ നിലകളിൽ അറിയപ്പെടുന്ന കൽപറ്റ നാരായണന്റെ നേതൃത്വമാണ് കേരള സാഹിത്യ അക്കാദമിക്ക് ലഭിക്കുന്നത്. എം.പി. സുരേന്ദ്രനാണ് പുതിയ സെക്രട്ടറി.

അക്കാദമിക്ക് മുന്നിലെ പ്രധാന ദൗത്യം സാഹിത്യത്തെ പുരസ്കാരങ്ങളുടെയും സമ്മേളനങ്ങളുടെയും പരിധിയിൽനിന്ന് കൂടുതൽ വിശാലമായ ജനസമൂഹത്തിലേക്ക് എത്തിക്കുകയാണ്.

പുതിയ എഴുത്തുകാർക്ക് അവസരം, യുവസാഹിത്യകാരന്മാർക്ക് സ്ഥിരമായ വേദി, മലയാളത്തിലെ പ്രാദേശിക സാഹിത്യപാരമ്പര്യങ്ങളുടെ രേഖപ്പെടുത്തൽ, അപൂർവ ഗ്രന്ഥങ്ങളുടെ ഡിജിറ്റൽ സംരക്ഷണം, മലയാള സാഹിത്യത്തിന്റെ വിവർത്തനവും അന്താരാഷ്ട്ര പ്രചാരണവും എന്നിവയ്ക്ക് ഊന്നൽ നൽകാവുന്നതാണ്.

വായന കുറയുന്നു എന്ന വിലാപത്തേക്കാൾ പ്രധാനമാണ് പുതിയ തലമുറ എന്താണ് വായിക്കാൻ ആഗ്രഹിക്കുന്നത് എന്ന തിരിച്ചറിവ്..

നടനും സാംസ്കാരിക പ്രവർത്തകനുമായ പ്രേംകുമാറാണ് കേരള സംസ്ഥാന ചലച്ചിത്ര വികസന കോർപ്പറേഷന്റെ പുതിയ ചെയർമാൻ. കഴിഞ്ഞ സർക്കാരിന്റെ കാലത്ത് ചലച്ചിത്ര അക്കാദമി വൈസ് ചെയർമാനായി പ്രവർത്തിച്ചിരുന്നു.. ചെർമാനായിരുന്ന രഞ്ജിത് വിവാദത്തിൽ കുരുങ്ങിയപ്പോൾ പ്രേംകുമാറിന് ആ ചുമതല കിട്ടി. ആശാ സമരത്തിലെ സർക്കാർ നിലപാടിനെ വിമർശനസ്വഭാവത്തോടെ ഒരു ഇൻഹൗസ് യോഗത്തിൽ അവതരിപ്പിച്ചതിന്റെ പേരിൽ ഒരു നോട്ടീസ് പോലും നൽകാതെ പുറത്താക്കപ്പെട്ട പ്രേംകുമാറിന് ഇത് ഇരട്ടിമധുരമുള്ള ഒരു അംഗീകാരമായി. അദ്ദേഹത്തിന്റെ കഴിവും ചലച്ചിത്ര അക്കാദമിയിലെ മുൻപരിചയവും കോർപറേഷന് ഗുണകരമാകുമെന്നതിൽ തർക്കമില്ല. സംവിധായകനും നിർമാതാവുമായ ആലപ്പി അഷറഫാണ് വൈസ് ചെയർമാൻ. കെഎസ്എഫ്ഡിസിയുടെ ഉത്തരവാദിത്തം സിനിമ നിർമ്മാണത്തിന് സഹായം നൽകുന്നതിൽ മാത്രം ഒതുങ്ങുന്നില്ല. പുതിയ ചലച്ചിത്രപ്രതിഭകൾക്ക് അവസരം, തിയേറ്റർ ശൃംഖലയുടെ നവീകരണം, ആധുനിക പ്രദർശനസൗകര്യങ്ങൾ, പ്രാദേശിക സിനിമകൾക്ക് പിന്തുണ, സിനിമാ നിർമ്മാണത്തിന്റെ വികേന്ദ്രീകരണം എന്നിവ പ്രധാന വിഷയങ്ങളാണ്. സിനിമ ഒരു കലയും വ്യവസായവുമാണ്. ഈ രണ്ട് തലങ്ങളെയും പരസ്പരവിരുദ്ധമായി കാണാതെ മുന്നോട്ടുകൊണ്ടുപോകുകയെന്നത് കോർപ്പറേഷന്റെ വലിയ വെല്ലുവിളിയായിരിക്കും.

ഗായകൻ ജി. വേണുഗോപാലാണ് സംഗീത നാടക അക്കാദമിയുടെ പുതിയ അധ്യക്ഷൻ. ഹേമന്ത്കുമാർ വൈസ് ചെയർമാനും എൻ.വി. പ്രദീപ്കുമാർ സെക്രട്ടറിയുമാകും.

“എല്ലാവരെയും കൂടെ നിർത്തണം” എന്നതാണ് അക്കാദമിയുടെ വിശാല സ്വഭാവത്തെക്കുറിച്ച് പുതിയ അധ്യക്ഷൻ തന്നെ മുന്നോട്ടുവച്ച സമീപനം.

ശാസ്ത്രീയ സംഗീതം, നാടൻ സംഗീതം, നാടകം, സംഗീതനാടകം, പരീക്ഷണ നാടകവേദി തുടങ്ങി വൈവിധ്യമാർന്ന മേഖലകളെ ഒരേ കുടക്കീഴിൽ കൊണ്ടുവരേണ്ട സ്ഥാപനമാണിത്.

പുതിയ തലമുറയിലെ കലാകാരന്മാരെ കണ്ടെത്തുന്നതിനും പരിശീലിപ്പിക്കുന്നതിനും അവതരണവേദികൾ ഒരുക്കുന്നതിനും അക്കാദമിക്ക് ദീർഘകാല പദ്ധതി ആവശ്യമാണ്. വേദി കിട്ടാതെ പോകുന്ന പ്രതിഭകളെയും പ്രേക്ഷകരിലേക്ക് എത്തിക്കാനുള്ള സംവിധാനവും ഉണ്ടാകണം.

പ്രഫ. പ്രകാശ് മൂർത്തിയാണ് ലളിതകലാ അക്കാദമിയുടെ പുതിയ അധ്യക്ഷൻ. ടി.ആർ. ഉദയകുമാർ വൈസ് ചെയർമാനും വൈക്കം എം.കെ. ഷിബു സെക്രട്ടറിയുമാകും. ചിത്രകലയും ശിൽപകലയും ആനിമേഷനും ഫോട്ടോഗ്രഫിയും ഉൾപ്പെടെ ദൃശ്യകലയുടെ മാറുന്ന ലോകത്തോട് അക്കാദമി കൂടുതൽ അടുത്തുനിൽക്കേണ്ട കാലമാണിത്. കലാകാരന്മാർക്ക് പ്രദർശനവേദികൾ ഒരുക്കുന്നതിനു പുറമേ അവരുടെ സൃഷ്ടികളുടെ സംരക്ഷണം, ഡിജിറ്റൽ ആർക്കൈവ്, യുവകലാകാരന്മാർക്കുള്ള ഫെലോഷിപ്പുകൾ, സ്കൂൾ-കോളജ് തലത്തിലുള്ള കലാപരിശീലനം എന്നിവയിൽ ശ്രദ്ധ വേണം. കലാഗ്യാലറിയുടെ ചുവരുകൾക്കപ്പുറത്തേക്ക് കല എത്തിക്കുക എന്നതാകണം വലിയ ലക്ഷ്യം. സുരേഷ് ബാബു എളയാവൂരാണ് കേരള ഫോക്‌ലോർ അക്കാദമിയുടെ അധ്യക്ഷൻ. ശ്രീരാമൻ കൊയ്യോൻ വൈസ് ചെയർമാനും പ്രദീപ്കുമാർ എം. പയ്യന്നൂർ മെമ്പർ സെക്രട്ടറിയുമാകും. കേരളത്തിന്റെ നാടോടി പാരമ്പര്യം വെറും ഉത്സവവേദികളിലെ കലാപ്രകടനമല്ല. ഓരോ കലാരൂപത്തിനും പിന്നിൽ ഒരു ജനതയുടെ ചരിത്രവും വിശ്വാസവും ജീവിതരീതിയും സാമൂഹിക ഓർമയും ഉണ്ട്. തെയ്യം, പടയണി, പൂരക്കളി, വിവിധ നാടൻ കലകൾ, ആദിവാസി കലാപാരമ്പര്യങ്ങൾ തുടങ്ങിയവയെ ശാസ്ത്രീയമായി രേഖപ്പെടുത്തുകയും ഡിജിറ്റൽ രൂപത്തിൽ സംരക്ഷിക്കുകയും വേണം. പാരമ്പര്യത്തിന്റെ യഥാർഥ അവകാശികളായ സമൂഹങ്ങളെ സംരക്ഷണപ്രവർത്തനത്തിൽ പങ്കാളികളാക്കുക എന്നത് പ്രധാനമാണ്.

നടനും മേളകളുടെ സംഘാടകനുമായ രവീന്ദ്രനാണ് കേരള സംസ്ഥാന ചലച്ചിത്ര അക്കാദമിയുടെ പുതിയ അധ്യക്ഷൻ. പ്രിയങ്ക നായർ വൈസ് ചെയർപേഴ്സണായി ചുമതലയേൽക്കും.

ചലച്ചിത്ര അക്കാദമിക്ക് മുന്നിലുള്ള ദൗത്യം ചലച്ചിത്രമേളകളിൽ മാത്രം ഒതുങ്ങുന്നതല്ല.

പുതിയ സംവിധായകർ, തിരക്കഥാകൃത്തുക്കൾ, അഭിനേതാക്കൾ, എഡിറ്റർമാർ, ഛായാഗ്രാഹകർ, മറ്റ് സാങ്കേതിക പ്രവർത്തകർ എന്നിവർക്കായി പരിശീലനവും മെന്ററിങ് സംവിധാനങ്ങളും ശക്തിപ്പെടുത്തണം.

മലയാള സിനിമയുടെ ചരിത്രം സമഗ്രമായി ഡിജിറ്റൽ രൂപത്തിൽ രേഖപ്പെടുത്തുന്നതിനും പഴയ സിനിമകളുടെ സംരക്ഷണത്തിനും പ്രാധാന്യം വേണം.

സിനിമ കാണുന്ന രീതിയും നിർമ്മിക്കുന്ന രീതിയും മാറിക്കൊണ്ടിരിക്കുന്ന കാലത്ത് അക്കാദമിയുടെ കാഴ്ചപ്പാടും അതിനനുസരിച്ച് മാറേണ്ടതുണ്ട്.

ചലച്ചിത്ര നിർമാതാവ് എം. രഞ്ജിത്തിനാണ് കേരള സാംസ്കാരിക പ്രവർത്തക ക്ഷേമനിധി ബോർഡിന്റെ അധ്യക്ഷപദവി.

കലാകാരന്മാരുടെയും സാംസ്കാരിക പ്രവർത്തകരുടെയും ക്ഷേമം എന്നത് ഒരു ആനുകൂല്യപദ്ധതിയുടെ മാത്രം വിഷയമല്ല. സ്ഥിരവരുമാനമില്ലാത്ത കലാകാരന്മാരുടെ ജീവിതസുരക്ഷയുമായി ബന്ധപ്പെട്ടതാണ്.

പെൻഷൻ, ചികിത്സാസഹായം, അടിയന്തര ധനസഹായം, അർഹരായവരെ കണ്ടെത്തുന്നതിനുള്ള കാര്യക്ഷമമായ സംവിധാനം തുടങ്ങിയവ കൂടുതൽ വേഗത്തിലും സുതാര്യമായും നടപ്പാക്കേണ്ടതുണ്ട്.

വേദിയിൽ കൈയടി ലഭിക്കുന്ന കലാകാരന്റെ ജീവിതത്തിൽ വെളിച്ചം അണഞ്ഞുപോകാതിരിക്കാനുള്ള സംവിധാനമാണ് ക്ഷേമനിധി.

അക്കാദമികൾ തമ്മിൽ മതിലുകളുണ്ടാകരുത് സാഹിത്യവും സിനിമയും സംഗീതവും നാടകവും ചിത്രകലയും നാടോടിക്കലയും വേറിട്ട തുരുത്തുകളല്ല. പരസ്പരം ബന്ധപ്പെട്ടു കിടക്കുന്ന സാംസ്കാരിക ലോകത്തിന്റെ വിവിധ മുഖങ്ങളാണ് അവ. അതുകൊണ്ട് അക്കാദമികൾ തമ്മിലുള്ള സഹകരണം ശക്തിപ്പെടുത്തണം. ഒരു സംസ്ഥാനതല സാംസ്കാരിക ഡിജിറ്റൽ ആർക്കൈവ്, യുവകലാകാരന്മാർക്കുള്ള സംയുക്ത ഫെലോഷിപ്പ്, സ്കൂൾ-കോളജ് തലത്തിലുള്ള സാംസ്കാരിക പരിശീലനപദ്ധതികൾ, ജില്ലാതല സാംസ്കാരിക കേന്ദ്രങ്ങളുടെ ശൃംഖല എന്നിവ പോലുള്ള സംയുക്ത പദ്ധതികൾക്ക് വലിയ സാധ്യതയുണ്ട്. സാംസ്കാരിക സ്ഥാപനങ്ങളുടെ അധ്യക്ഷന്മാർക്ക് വ്യക്തിപരമായ രാഷ്ട്രീയാഭിപ്രായങ്ങൾ ഉണ്ടാകുന്നത് സ്വാഭാവികമാണ്. എന്നാൽ സ്ഥാപനത്തിന്റെ വാതിൽ എല്ലാ ആശയങ്ങൾക്കും കലാകാരന്മാർക്കും തുറന്നിരിക്കണം. സർക്കാർ നയങ്ങളുമായി സഹകരിക്കേണ്ടത് ഭരണഘടനാപരമായ സംവിധാനത്തിന്റെ ഭാഗമാണ്. അതേസമയം കലാസ്വാതന്ത്ര്യവും സ്ഥാപനങ്ങളുടെ അക്കാദമിക സ്വാതന്ത്ര്യവും സംരക്ഷിക്കേണ്ടതും അത്രതന്നെ പ്രധാനമാണ്. ആരെയാണ് ക്ഷണിച്ചത് എന്നതിലുപരി ആരെയും അനാവശ്യമായി ഒഴിവാക്കാതിരിക്കുകയാണ് ഒരു സാംസ്കാരിക സ്ഥാപനത്തിന്റെ ജനാധിപത്യപരമായ മുഖം.

പുതിയ അധ്യക്ഷന്മാരുടെ പ്രവർത്തനത്തെ വിലയിരുത്തേണ്ടത് അവരുടെ കാലാവധി അവസാനിക്കുമ്പോഴാണ്.

എത്ര പുതിയ പ്രതിഭകൾക്ക് അവസരം ലഭിച്ചു?

എത്ര പൈതൃകങ്ങൾ രേഖപ്പെടുത്തി?

എത്ര കലാകാരന്മാരുടെ ജീവിതത്തിൽ സ്ഥാപനത്തിന്റെ ഇടപെടൽ പ്രയോജനപ്പെട്ടു?

എത്ര പുതിയ സാംസ്കാരിക പദ്ധതികൾ സ്ഥിരം സംവിധാനങ്ങളായി?

കേരളത്തിന്റെ സാംസ്കാരിക സമ്പത്ത് ലോകത്തിനു മുന്നിൽ എത്രത്തോളം എത്തിക്കാനായി?

ഈ ചോദ്യങ്ങൾക്ക് വ്യക്തമായ കണക്കുകളോടെയും രേഖകളോടെയും മറുപടി നൽകാൻ കഴിയുന്നുവെങ്കിൽ മാത്രമേ നേതൃത്വത്തിന് വിജയകരമായി തങ്ങളുടെ ദൗത്യം നിർവഹിച്ചു എന്നു പറയാനാകൂ.

അധ്യക്ഷന്മാർ മാറും. സർക്കാരുകൾ മാറിവരും. പക്ഷേ അക്കാദമികൾ നിലനിൽക്കും.

അതുകൊണ്ടുതന്നെ പുതിയ സാരഥികൾക്ക് മുന്നിലുള്ള ഏറ്റവും വലിയ ദൗത്യം തങ്ങളുടെ കാലാവധിയുടെ അടയാളങ്ങൾ മാത്രം അവശേഷിപ്പിക്കുക എന്നതല്ല; തങ്ങൾക്ക് ശേഷവും കൂടുതൽ ശക്തമായി നിലനിൽക്കുന്ന സ്ഥാപനങ്ങളെ സൃഷ്ടിക്കുക എന്നതാണ്.

കേരളത്തിന്റെ സാംസ്കാരിക സ്ഥാപനങ്ങൾക്ക് ഇപ്പോൾ വേണ്ടത് പദവിയുടെ പ്രൗഢിയല്ല.

പ്രവർത്തനത്തിന്റെ അടയാളമാണ്

Keywords:

Recent in Kerala

Must Read