ഔഷധത്തിന്റെ ഗുണമേന്മയറിയാൻ ആരിലെങ്കിലും പരീക്ഷിച്ചല്ലേ പറ്റൂ. കുപ്പികളിലാക്കി സർക്കാരാശുപത്രികളിൽ 'ഫോർ ക്ലിനിക്കൽ ട്രയൽ' എന്ന ലേബലിൽ അയക്കാമെന്നാണ് ആദ്യം വിചാരിച്ചത്. പക്ഷേ പെട്ടെന്ന് നേർബുദ്ധിയുദിച്ചു. ഇല്ലെങ്കിൽ അനുവാദമില്ലാതെ  മനുഷ്യരിൽ മരുന്നു പരീക്ഷണം നടത്തി എന്ന പേരിൽ ഇപ്പോൾ മുരളിയേട്ടനെപ്പോലെ വിവാദങ്ങളെ നേരിടേണ്ടി വന്നേനേ.

തൃശൂർ പൂങ്കുന്നത്ത് ഔഷധി ബോർഡ് അംഗങ്ങൾക്കായി വാടകയ്ക്കെടുത്ത ഗെസ്റ്റ് ഹൗസിൽ 2022 മുതൽ 2026 വരെ 372 ദിവസം ചെയർപേഴ്സൺ താമസിച്ചെന്നുള്ളതാണ് മറ്റൊരു ആക്ഷേപം. വാടക, ഫർണിച്ചർ, വൈദ്യുതിച്ചെലവ്  എന്നിവയുൾപ്പെടെ കാൽക്കോടിയോളം രൂപ ഔഷധിയിൽ നിന്ന് ചെലവാക്കിയത്രേ. താമസക്കാർ നിശ്ചിത നിരക്ക് നൽകണമെന്ന വ്യവസ്ഥയുണ്ടായിട്ടും സൗജന്യമായാണ് താമസിച്ചതെന്നും ആരോഗ്യ വകുപ്പ് പറയുന്നു. ഇതിനാണ് ദുഷ്ട ബുദ്ധിയെന്ന് പറയുന്നത്.  മുരളിയേട്ടാ, ലീഡർ, തനിക്ക് പിറക്കാതെ പോയ സ്വന്തം മകളായാണ് തന്നെ കണ്ടിരുന്നതെന്ന കാര്യം പോലും മറന്നാണല്ലോ അങ്ങ് ഇത്തരം നിസ്സാര കാര്യങ്ങളൊക്കെ കുത്തി പുറത്തെടുക്കുന്നത്. ഒന്നുമില്ലെങ്കിലും കുടുംബത്തിൽ നിന്ന് മറ്റൊരു പാർട്ടിയിലേക്ക് ചേക്കേറിയ ആദ്യവനിതയെന്ന പരിഗണനയെങ്കിലും ഉണ്ടാവേണ്ടതല്ലേ?

നിയമസഭയിൽ വി.പി. സജീന്ദ്രൻ എംഎൽഎ ഉന്നയിച്ച ആരോപണങ്ങൾ മേൽ സാഹചര്യങ്ങളിൽ ശക്തിയായി നിഷേധിക്കുന്നു. ഔഷധിയിൽ  ഒരു ചികിത്സയും നടത്തിയിട്ടില്ല. നടത്തിയത് പരീക്ഷണം മാത്രമാണ്.