NewsAd1
ചെലവു ചുരുക്കാൻ ചില മേനോൻ മാർഗങ്ങൾ
അനിൽ ബാലകൃഷ്ണൻ
21 November 2026, 2:35 am
main image of news

പത്തു വർഷത്തിലേറെ നീണ്ട ധ്യാനത്തിൽ നിന്നുണർന്ന മുനി കണ്ണു തുറക്കുമ്പോൾ കാണുന്നത് നീണ്ടു വളർന്ന താടി രോമത്തിന്റെ തുഞ്ചത്ത് വഴിതെറ്റി നില്ക്കുന്ന ഒരു കട്ടുറുമ്പിനെ . മുനിയിൽ കാരുണ്യം സ്ഖലിച്ചു. അതിനെ അവിടെ തന്നെ നില്ക്കാനനുവദിച്ച് മുന്നോട്ടു നടന്ന് ഏറെനേരം തിരഞ്ഞ മുനി ഒടുവിൽ ഉറുമ്പിൻ കൂട് കണ്ടെത്തി, താടി അതിലേക്ക് നീട്ടി കട്ടുറുമ്പിനെ ഇറങ്ങിപ്പോകാനനുവദിച്ച് കണ്ണടച്ച് നിറഞ്ഞ നിർവൃതിയോടെ മുനി നിന്നു. സംഭവിച്ചത് മറ്റൊന്നാണ്. കൂട്ടിലെ കട്ടുറുമ്പുകൾ കൂട്ടത്തോടെ താടിയിലേക്ക് ഇരച്ചുകയറി. രണ്ടാമതൊന്ന് ആലോചിക്കാൻ സമയവും ബുദ്ധിയും കളയാതെ ഇരു കൈകൾ കൊണ്ടും താടിയിൽ ഒരു കൂട്ടപ്പൊരിച്ചിലായിരുന്നു പിന്നെ.നൂറുകണക്കിന് കട്ടുറുമ്പുകൾ ആ സാഹസത്തിൽ ഞെരിഞ്ഞു ചത്തു !

മേൽപ്പറഞ്ഞ കഥയിലെ മുനിക്ക് ജീവിച്ചിരിക്കുന്നതോ മരിച്ചതോ ആയ ആരോടെങ്കിലും സാദൃശ്യം തോന്നുന്നുവെങ്കിൽ അത് യാദൃശ്ചികം മാത്രമെന്ന് ഓർമ്മിപ്പിക്കുന്നു.
പത്തുവർഷം നീണ്ട പിണറായിസത്തിന് അറുതി വരുത്തി അധികാരത്തിലെത്തിയ സതീശൻ മേനോൻ ആദ്യം നോക്കിയത്   ഖജനാവിലേക്കാണ്. പരിഭ്രമിക്കാൻ പോലുമുള്ള ഒന്നും അവിടെയുണ്ടായിരുന്നില്ലെന്നത് ആശ്വാസമായി. പിന്നെ രണ്ടും കല്പിച്ച് ധവളപത്രമിറക്കി സ്ഥിതിഗതികൾ നാട്ടാരെ ബോധിപ്പിച്ചു.ചെലവുകൾ പരമാവധി കുറച്ച് മുണ്ടു മുറുക്കിയുടുത്ത് മുന്നോട്ടു പോകുമെന്ന് ഉറപ്പിച്ചു.. മുഖ്യമന്ത്രിയെന്നനിലയിൽ താൻ പുതിയ ഔദ്യോഗികവാഹനം വാങ്ങില്ലെന്നും നിലവിലുള്ള ഒരു വാഹനം ഉപയോഗിച്ച് മാതൃക കാട്ടുമെന്നും പ്രഖ്യാപിച്ചു.
എന്തു കരുതൽ !എത്ര കാരുണ്യം!

 image 2 of news

എന്നാൽ ഭരണം ആറാം മാസത്തിലെത്തുമ്പോൾ തലപെരുപ്പിക്കുന്ന ആയിരക്കണക്കിന് വ്യവഹാരങ്ങൾക്കിടയിൽ ചെലവു ചുരുക്കലും മുണ്ടു മുറുക്കലുമെല്ലാം വിസ്മൃതിയിലായി. മന്ത്രിമാർക്കെല്ലാം പുത്തൻ കാറുകൾ വാങ്ങാൻ തീരുമാനമായി. എം എൽ എ മാരുടെയും മന്ത്രിമാരുടെയും വേതനമുയർത്തി. പേഴ്സണൽ സ്റ്റാഫ് നിയമനം പഴയ സർക്കാരിനെയും കടത്തി വെട്ടി, സർക്കാരിന്റെ പ്രചാരണ പരിപാടികൾക്ക് സംസ്ഥാനത്തിനു പുറത്തും കോടികൾ ആവിയാക്കി, ഉപ്പുതൊട്ട് ഉള്ളി വരെയുള്ള നിത്യോപയോഗ സാധനങ്ങളുടെ വില ബഹിരാകാശം തൊട്ടു..

മുഖ്യമന്ത്രിയുടെ ലാളിത്യം പുത്തനച്ചിയുടെ പുരപ്പുറം തൂക്ക ലാണെന്ന് ഉന്നതോദ്യോഗസ്ഥ വൃന്ദം നേരത്തേ മനസ്സിലാക്കിയിരുന്നു. അതുകൊണ്ടു തന്നെ ആഡംബര വാഹനങ്ങളോ ആനുകൂല്യങ്ങളോ വേണ്ടെന്നു വയ്ക്കാനുള്ള മഹാമനസ്കതയൊന്നും അവർ കാട്ടിയതേയില്ല. എല്ലാം ശരിയാകും എന്ന അവരുടെ പ്രതീക്ഷയിലേക്കാണ് ഇപ്പോൾ സതീശൻസർക്കാർ അതിവേഗം മുന്നേറുന്നത്.
HomeAd1
 image 3 of news

രാജ്യത്ത് ഏതാണ്ട് പൂർണ്ണമായും അന്യംനിന്നു പോയ ഫോർവേർഡ് ബ്ലോക്ക് യുഡി എഫിലെത്തിയത് ഈ തെരഞ്ഞടുപ്പിന് തൊട്ടു മുൻപാണ്. മത്സരിക്കാൻ സീറ്റൊന്നും നൽകിയില്ലെങ്കിലും അതിന്റെ അഖിലേന്ത്യാനേതാവ് ദേവരാജന് കാബിനറ്റ് പദവി നൽകി ദില്ലിയിൽ കുട്ടിയിരുത്താൻ സതീശൻ മഹാമനസ്കത കാട്ടി. പിണറായിയുടെ ചാർച്ചക്കാരനാവാൻ ഇത്തരം മാതൃക പിൻതുടർന്നേ മതിയാവൂ. മുന്നണി ഘടക കക്ഷിയിലെ എം കെ മുനീറിനും അപു ജോസഫിനും നൽകി കാബിനറ്റ് പദവിയോടെയുള്ള നിയമനങ്ങൾ. ഇപ്പോൾ പിജെ ജോസഫിന് കാബിനറ്റ് റാങ്ക് നൽകാനും തീരുമാനമായി. ആദ്യം റാങ്ക് ...തസ്തികയൊക്കെ പിന്നെ .

പി എസ് സി അംഗങ്ങളുടെ ഒഴിവിൽ ഒരു ദിവസം പോലും വൈകാതെ നിയമനം നടത്തിയും സതീശൻ മാതൃകയായി. ചെയർമാനുൾപ്പെടെ 21 അംഗങ്ങളാണ് കേരള പി എസ് സിയിലുള്ളത്. ഇത് അനാവശ്യമാണെന്ന് കഴിഞ്ഞ സർക്കാരിന്റെ കാലം മുതൽ മുഴങ്ങിക്കേട്ട വായ്ത്താളങ്ങൾ മറവിയുടെ ഗാഢ സൽഫ്യൂറിക് ആസിഡിൽ ലയിക്കട്ടെ.

 image 4 of news

പി എസ് സി യിലെ ഒരു അംഗത്തിന് മാത്രമുണ്ട്  മാസം ശരാശരി മൂന്നര ലക്ഷത്തിലേറെ രൂപ ശമ്പളവും അലവൻസുകളും. ചെയർമാന്റെ പ്രതിഫലവും ചേർത്താൽ മാസം ഏകദേശം 77 ലക്ഷം രൂപ. മറ്റു സൗകര്യങ്ങളും സ്ഥാപനച്ചെലവുകളും കൂടി കണക്കാക്കിയാൽ ഒരു കോടി രൂപ ! വിരമിച്ചവരുടെ ഭീമമായ പെൻഷനും മറ്റ് ആനുകൂല്യങ്ങളും കൂടി ചേർത്തു വായിച്ചാൽ ചെലവ്  കോടാനുകോടിയാകും.

കാബിനറ്റ് റാങ്ക്, ദാനമായി ലഭിക്കുന്നവർക്ക് ശമ്പളവും അലവൻസും മാത്രമല്ല, ഡ്രൈവറും  പേഴ്സണൽ സ്റ്റാഫുമൊക്കെയുണ്ട്.
ഇവരുടെ ശമ്പളം, വാഹനം, ഇന്ധനം, വസതി, ഓഫീസ്, യാത്രാച്ചെലവ് എന്നിവ കൂടി ചേർത്താൽ പ്രതിമാസ ബാധ്യതഎത്രയോ അധികമാകും.
ഹൂ കെയേഴ്സ്?

ബോർഡ്, കോർപറേഷൻ തുടങ്ങിയവയിൽ പലതും അനാവശ്യമാവുകയോ കാലഹരണപ്പെടുകയോ ചെയ്തിരിക്കുയാണെന്നത് വർത്തമാന കാല യാഥാർത്ഥ്യം. എന്നാൽ ഒരെണ്ണവുമൊഴിവാക്കാതെ മുന്നണിയിലെ കക്ഷികൾക്കെല്ലാമായി ഇഷ്ടദാനം നൽകാനുള്ള തീവ്ര യജ്ഞം നടക്കുകയാണിപ്പോൾ. തികയാതെ വരുമെന്ന് ഉറപ്പുള്ളതിനാൽ പുതുതായി ചില കോർപറേഷനുകളും ബോർഡുകളും കൂടി വൈകാതെ പ്രഖ്യാപിച്ച് ചെലവു ചുരുക്കാനും സതീശൻ മുതിർന്നേക്കും എന്നു കേൾക്കുന്നു....

കഴിഞ്ഞ സർക്കാർ ചെയ്ത ദുഷ്ചെയ്തികളുടെ ഉല്പന്നമാണ് ഈ സർക്കാർ എന്നതെങ്കിലും ഇടയ്ക്കിടെ ഓർക്കാൻ കാരുണ്യവാനായ സതീശൻ മേനവൻ തയ്യാറാവുമോ? പത്രസമ്മേളനങ്ങളിലെ താർക്കിക വിജയമല്ല ഒരു സർക്കാരിന്റെ ജയാപജയങ്ങൾ അന്തിമമായി നിർണ്ണയിക്കുന്നതെന്നും ഓർമ്മയുണ്ടാവണം.

Keywords:

home ad2 16*9

Recent in Kerala

Must Read

Latest News

In News for a while now..

No headlines (or news bullets) found 😞