നിഷ്കളങ്കമായ കെട്ടിപ്പിടുത്തമാണ് ആലിംഗനം. കാമ മിശ്രിതമായാൽ അത് ആ‘ലിംഗ’നം. പേരുദോഷം കേൾപ്പിക്കുന്നതും അല്ലാത്തതുമായ മറ്റ് ചില ഇനം ആലിംഗനങ്ങളുമുണ്ട്. വോട്ടും അധികാരവും ലക്ഷ്യമിട്ടുള്ള രാഷ്ട്രീയ ആലിംഗനമാണ് മറ്റൊന്ന്. ഇന്ത്യൻ രാഷ്ട്രീയത്തിലെ ഏറ്റവും വലിയ ചർച്ചാ വിഷയമായി മാറി കൊണ്ടിരിക്കുന്ന അത്തരം ആലിംഗനങ്ങളുടെ ഒടുവിലത്തെ ഇരയാണ് കോൺഗ്രസ്സ് ഐക്കൺ ആയ 'യുവ'കോമളൻ രാഹുൽ .

കോൺഗ്രസിന്റെ തിരഞ്ഞെടുപ്പു വിജയത്തിന്റെ ആവേശത്തിൽ ഇന്ദിരാഭവനിലേക്ക് കയറി വന്നവരെ പരിസരം മറന്ന് വരിഞ്ഞു മുറുക്കി കെട്ടിപ്പിടിച്ച നിത്യസന്യാസിയായ ചെറിയാൻ ഫിലിപ്പ് പോലും പഴി കേൾക്കേണ്ടിവന്ന നാടാണിത്. ആ തറവാട്ടിൽ ഇപ്പോഴും കല്യാണം കഴിക്കാതെ നിൽക്കുന്ന രാഹുൽ ആലിംഗന ലീലകളിൽ മുഴുകണം എന്ന് പറയുന്നതിൽ എന്തർത്ഥം. കേരളത്തിലെ വോട്ടർമാരുടെ കൺമുന്നിൽ വച്ച് സിപിഎം കാരെ കെട്ടിപ്പിടിക്കാൻ രാഹുൽ തയ്യാറല്ല. നാറ്റക്കേസ് ആകും. എന്നാൽ ഇണ്ടി മുന്നണി എന്ന അടച്ചുപൂട്ടിയ മുറിക്കുള്ളിൽ വച്ച് രാഷ്ട്രീയമായി എന്തിനും ഏതിനും റെഡിയാണു താനും.

പ്രതിപക്ഷ നിരയിലെ നേതാക്കൾ ഈ കെട്ടിപ്പിടുത്ത നാടകം കളിക്കുമ്പോൾ ഡൽഹിയിലെ മെയിൻ സീറ്റിൽ ഇരുന്ന് ലോക നേതാക്കളെ ആലിംഗനത്തിൽ കുടുക്കിയ ആലിംഗന ഗുരു കണ്ണു ചിമ്മാതെ ഇതെല്ലാം ലൈവായി കണ്ട് ചിരിക്കുന്നുണ്ട് എന്ന് ഈ ‘പാവങ്ങൾ‘ തിരിച്ചറിയുന്നുണ്ടാകുമോ ആവോ