“താടകാഭയങ്കരി വാണിടും ദേശമല്ലോ അവളെ പേടിച്ചാരും നേർവഴി നടപ്പീല”

അടുത്തഘട്ടം ലേപന വിദ്യയാണ്. ദേശീയതയും വികസനവും സമാസമം ചേർത്തരച്ച പ്രത്യേകതരം ലേപനം പുരട്ടി ദേഹമാസകലം ഉഴിയും. പശ്ചാത്തലത്തിൽ വീര ഭാരത പുത്രന്മാരുടെ കഥകൾ കൂടി കേൾക്കുമ്പോൾ കുളിര് കോരും. തുടർന്ന് കാവി തുണികൊണ്ട് ശരീരം നന്നായി തുടച്ചെടുക്കും. പഴയ ദുർമേദസ്സും ഇടത് വലത് പ്രാദേശിക ചിന്തകളും പമ്പകടക്കും. നാരായം കൊണ്ട് നാക്കിൽ മോദി സ്തുതി കൂടി കുറിച്ചു കഴിഞ്ഞാൽ ചികിത്സ ഏതാണ്ട് പൂർത്തിയാകും. ഒരൊറ്റചോദ്യമാണ് പിന്നെ. അധികാരത്തിന്റെ അഹങ്കാരത്തിൽ അക്രമവും അഴിഞ്ഞാട്ടവും നടത്തിയിരുന്ന കോൺഗ്രസ് കാലഘട്ടം ഏൽപ്പിച്ച മുറിവുകൾ മാറ്റിയെടുത്ത് ഭാരതത്തെ ലോക നെറുകയിലേക്ക് എത്തിക്കണ്ടേ. വരാനിരിക്കുന്ന സൗഭാഗ്യങ്ങൾ ഓർത്ത് സുഖിച്ചു കിടന്നു കൊടുത്തിട്ട് വേണ്ടെന്നു പറയാൻ പറ്റുമോ!

2026 ഏപ്രിൽ 17ന് പാർലമെന്റിൽ അവതരിപ്പിച്ച വനിത സംവരണ ബില്ലിനും മണ്ഡല പുനർനിർണയ ബില്ലിനും 298 പേരുടെ പിന്തുണ മാത്രമാണ് ലഭിച്ചത്. മൂന്നിൽ രണ്ട് ഭൂരിപക്ഷത്തിന് 54 വോട്ടുകൾ കുറവ് . മൂന്ന് എംപിമാരുടെ ഒഴിവ് ഉള്ള നിലവിലെ സാഹചര്യത്തിൽ ഭൂരിപക്ഷത്തിന് 69 എംപിമാരുടെ കുറവാണ് ഉള്ളത്. ആ കുറവ് മറികടന്ന് മൂന്നിൽ രണ്ടു ഭൂരിപക്ഷത്തിലേക്കുള്ള ലക്ഷ്യത്തിൽ ലൈഫ് ജാക്കറ്റ് ധരിച്ച് പങ്കാളികളാവുകയാണ് മറ്റ് പാർട്ടികൾ പിളർന്നെത്തിയവർ. ഒരു രാജ്യം ഒരു തെരഞ്ഞെടുപ്പ്. ഒക്കെ കൊള്ളാം. ഒരു പാർട്ടി മാത്രം എന്ന് പറയാതിരുന്നാൽ മതി.

സർവൈവൽ ഓഫ് ദ ഫിറ്റസ്റ്റ് എന്നതിന്റെ അതിമാരക രാഷ്ട്രീയ വേർഷന്റെയും കൂടി ഭാഗമാണ് മറ്റ് പാർട്ടികളിലെ എംഎൽഎ, എംപിമാർ അടക്കമുള്ളവരുടെ ബിജെപിയിലേക്കുള്ള ഒഴുക്ക്. പ്രതാപകാലത്ത് കോൺഗ്രസ്സിനും കമ്മ്യൂണിസ്റ്റുകൾക്കും മറ്റു പ്രാദേശിക പാർട്ടികൾക്കും ഉണ്ടായിരുന്ന അതിജീവനശേഷിയെ രാഷ്ട്രീയ ദുർനടത്തം കൊണ്ട് സ്വയം അവർ നശിപ്പിച്ചു. സംഘപരിവാറുകാരുടെ രാഷ്ട്രീയ രൂപമായ ബിജെപിയോട് കാട്ടിയതാകട്ടെ കടുത്ത അയിത്തവും. ഇപ്പോൾ എണ്ണി എണ്ണി മറുപടി കൊടുക്കുന്നു. രാഷ്ട്രീയ വിശപ്പ് ഏറെയുള്ള പാർട്ടിയാണ് ബിജെപി . ലക്ഷ്യങ്ങളുടെ അത്യഗ്നി പടരുമ്പോൾ ചെറു പാർട്ടികളെ ഭക്ഷിച്ച് അവർ രാഷ്ട്രീയ വിശപ്പടക്കും. ലക്ഷ്യം മാർഗ്ഗത്തെ സാധൂകരിക്കും എന്നല്ലേ. തിരിഞ്ഞു നോക്കേണ്ടതില്ലല്ലോ