ഘടാഘടിയന്മാരായ നൂറോളം എം പി മാരുള്ള കോൺഗ്രസ്സ്. ജെൻസി ഉൾപ്പെടുന്ന യുവതയുടെ തള്ളിച്ച കൊണ്ട് വീർത്ത കോൺഗ്രസിന്റെ വിദ്യാർത്ഥി സംഘടനയായ എൻ എസ് യു. തീയിൽ കുരുത്ത യുവതകൾ ഉള്ള എസ് എഫ് ഐ. ഇവറ്റകൾക്ക് സാധിക്കാത്ത പണിയാണ് പാറ്റ പയ്യന്മാർ പറിച്ചെടുത്തത്. യുവരക്തം തിളക്കുന്നതിന്റെ ഒച്ചകൾ തെറിവിളിയായും ലൈംഗിക ചേഷ്ടകളായും രാജ്യവിരുദ്ധ മുദ്രാവാക്യങ്ങളായും ഉയർന്ന ജന്തർ മന്തർ കോരിത്തരിച്ചു. വണ്ടിയും വള്ളവും പിടിച്ച് ഒഴുകിയെത്തിയവർ. ആസാദിക്കു വേണ്ടി അലമുറയിടുന്ന ടുക്കഡേ ടുക്കഡേ ഗാങ്ങുകൾ. പ്രധാനമന്ത്രിയുടെ പ്രായം പോലും പരിഗണിക്കാതെയുള്ള അശ്ലീല പരാമർശങ്ങൾ. മാധ്യമപ്രവർത്തകർക്കും പോലീസിനും നേരെ രാജ്യ തലസ്ഥാനത്ത് അക്രമം അരങ്ങേറുമ്പോൾ സ്വയരക്ഷക്കായി ആയോധനമുറ പുറത്തെടുത്ത് പോലീസ്. തരംതാണ പ്രവർത്തികളും മുദ്രാവാക്യങ്ങളും പുറത്തെടുത്തവർ ഞങ്ങളുടെ കൂട്ടരല്ല എന്ന് പിറുപിറുക്കുക പോലും ചെയ്യാതെ പട്ടിണി സമരവുമായി പാറ്റകൾ. പാറ്റകളോട് പറയാതെ പറ്റിക്കിടന്ന് പട്ടിണി സമരത്തിന്റെ പങ്ക് പറ്റാൻ ശ്രമിക്കുന്ന തൽപര കക്ഷികൾ. പിടിപ്പുകേടുകളുടെ പര്യായമായ പ്രതിപക്ഷ പാർട്ടികൾ പാറ്റകൾക്ക് പിന്നാലെ പായുന്ന പരിതാപരമായ കാഴ്ച.

മത്സര പരീക്ഷകളുടെ അനിവാര്യമായ സുതാര്യത മാത്രമായിരുന്നു ലക്ഷ്യം എന്ന് തുറന്ന മനസ്സോടെ സമ്മതിക്കാത്തവരും വിദ്യാർത്ഥികളെ ഭരണ മാറ്റത്തിനായുള്ള രാഷ്ട്രീയ ആയുധമായി ഉപയോഗിച്ച സമരമുറയാണ് രാജ്യ തലസ്ഥാനത്ത് നടന്നത് എന്ന വാദം ഉയർത്തുന്നവരും തമ്മിലുള്ള അങ്കമാണ് വരാനിരിക്കുന്നത്. കർഷക സമരം , പൗരത്വ നിയമം, ജമ്മു കാശ്മീരിന്റെ പ്രത്യേക പദവി എടുത്തു കളഞ്ഞത് , എസ് ഐ ആർ , ദേശീയപാഠ്യ പദ്ധതി എന്നിവയിലെ കേന്ദ്രസർക്കാർ സമീപനത്തിൽ നിയമപരമായി ഒന്നും ചെയ്യാനാകാത്ത അതൃപ്ത മനസ്സുകളുടെ ഒത്തുചേരലും അരങ്ങേറിയപ്പോൾ സംഭവിച്ച കാര്യങ്ങൾ ആർക്ക് നഷ്ടമാകും ആർക്ക് മുതൽക്കൂട്ടാവും എന്നത് കണ്ടറിയണം. മൂന്നാം വട്ട മോദി സർക്കാർ കാലത്തും അടിസ്ഥാനപരമായ ആവശ്യങ്ങൾക്ക് വേണ്ടി ജനം തെരുവിൽ ഇറങ്ങേണ്ടി വരുന്നത് ന്യായീകരിക്കാൻ ആവില്ല. ആത്മഹത്യ ചെയ്യുന്നവർക്ക് നഷ്ടപരിഹാരം കൊടുക്കേണ്ടതിന്റെ ന്യായാ ന്യായങ്ങളും ധാർമിക ഉത്തരവാദിത്വത്തിന്റെ പേരിലുള്ള രാജിയെക്കുറിച്ചും എൻട്രൻസ് മാഫിയകളെ നിലക്ക് നിർത്തുന്നതിനെപ്പറ്റിയും സമരത്തിനിടയൽ നുഴഞ്ഞു കയറി അക്രമം കാട്ടുന്നവരെ എപ്രകാരം കൈകാര്യം ചെയ്യണം എന്നതിന്മേലും പാർലമെന്റ് ചർച്ചകൾ ഉണ്ടാവട്ടെ .

‘ഇറ്റ് മസ്റ്റ് കൺടിന്യൂ’ എന്നാഗ്രഹിക്കുന്ന പ്രതിപക്ഷ നേതാവിനോട് ഒന്നു മാത്രമേ പറയാനുള്ളൂ. കോൺഗ്രസ് പിരിച്ചുവിടാൻ പറ്റിയ ഏറ്റവും നല്ല സമയമാണിത്.