ബങ്കിം ചന്ദ്ര ചതോപാധ്യായ രചിച്ച വന്ദേമാതര ഗാനം ഔദ്യോഗിക പരിപാടികളിൽ പൂർണ്ണമായും പാടണമെന്ന് നിർദേശിച്ച് കേന്ദ്ര സർക്കാർ ഉത്തരവിറക്കിയപ്പോൾ തന്നെ അരി, ഗോതമ്പ്, പച്ചക്കറികൾ,ബീഫ്, മറ്റു മാസങ്ങൾ തുടങ്ങിയവ ആഹരിക്കുന്ന കോൺഗ്രസ്സാദി പ്രതിപക്ഷകക്ഷികൾക്ക് അപകടം മനസ്സിലായതാണ്. ആദ്യത്തെ രണ്ടു സ്റ്റാൻസ തന്നെ തെറ്റാതെ പാടാനുള്ള പൊല്ലാപ്പ് അത് പാടി നോക്കിയിട്ടുള്ളവർക്കേ അറിയൂ. ജനഗണമന പിന്നെ മറ്റുള്ളവർ പാടുമ്പോൾ ഒരുഅഡ്ജസ്റ്റുമെന്റിൽ ലിപ് സിങ്ക് ചെയ്ത് ഒപ്പിക്കുന്നുവെന്നേയുള്ളൂ.

പാർലമെന്റിൽ ഇക്കാര്യം ചർച്ച ചെയ്തപ്പോൾ തന്നെ പ്രതിപക്ഷം നഖശിഖാന്തം എതിർത്തതിന് കാരണമിതാണ്. പ്രിയങ്കാ വാധ്ര ഇതിനെതിരേ പല ചരണങ്ങളുള്ള ഒരു പ്രസംഗവും പാസാക്കി. 'നമ്മൾ ദേശസ്നേഹികളാണ് സംഘികളല്ല 'എന്ന ഈണത്തിൽ സി പി എം ഉൾപ്പെടെയുള്ള മറ്റു കക്ഷികളും പാടിത്തകർത്തു. എന്നാൽ കാര്യത്തോടടുത്തപ്പോൾ എല്ലാം തകിടം മറിഞ്ഞു.

വാസ്തവത്തിൽ ഇ പി ജയരാജൻ സി പി എമ്മിനും മേജർ രവി മോഹൻലാലിനുമെന്ന പോലെ കോൺഗ്രസ്സിന്റെ ആപൽ ബാന്ധവനാണ് ജയറാം രമേശ് ജി. നമ്മൾ കണ്ണുകൾ കൊണ്ടു കാണുകയും കാതു കൊണ്ട് കേൾക്കുകയും ചെയ്താലും സത്യമെന്തെന്ന് മനസ്സിലാവണമെങ്കിൽ ഇവരുടെ പരിഭാഷ വേണമെന്നതാണ് മൂവരുടെയും ഗുണം. കേന്ദ്രമിടപെട്ട് അടിയന്തിരമായി ഒരു കാപ്സ്യൂൾ സർവ്വകലാശാല തുടങ്ങി ജയറാം രമേശിനെ വൈസ് ചാൻസലറും മേജർ രവിയെ ഡീനും ഇപി സഖാവിനെ രജിസ്ട്രാറുമാക്കണം.അമാന്തം വേണ്ട.വൈകുന്ന ഓരോ നിമിഷത്തെയുമോർത്ത് പിന്നെ നമുക്കു തന്നെ ദുഃഖിക്കേണ്ടിവരും.

നമ്മൾ പാടി ശീലിച്ച വന്ദേ മാതരം വരികൾ ഹൃദ്യമാണ്. ഇന്നത്തെ രീതിയിൽ പറഞ്ഞാൽ പൊളിറ്റിക്കലി കറക്ടുമാണ്. ഭാരതത്തെ അമ്മയായി സങ്കല്പിക്കുന്ന അതിന്റെ ആദ്യ ചരണത്തിന്റെ മലയാള വിവർത്തനം ഇങ്ങനെ: : "അമ്മേ, മാതാവേ, നിന്നെ ഞാൻ വണങ്ങുന്നു. സമൃദ്ധമായ ജലസമ്പത്തുള്ളവളേ, ഫലസമൃദ്ധയായവളേ, മലയിൽനിന്നുള്ള കുളിർക്കാറ്റിനാൽ ശീതളയായവളേ, പച്ചപ്പാർന്ന വിളകളാൽ ശോഭിക്കുന്ന മാതാവേ. വെൺനിലാവിൽ ആഹ്ലാദിക്കുന്ന രാത്രികളുള്ളവളേ, വിരിഞ്ഞ പൂക്കളും ഇലകളും നിറഞ്ഞ വൃക്ഷങ്ങളാൽ ശോഭിക്കുന്നവളേ, പുഞ്ചിരിക്കുന്നവളേ, മധുരമായി സംസാരിക്കുന്നവളേ, സുഖം നൽകുന്നവളേ, അനുഗ്രഹം നൽകുന്നവളേ— മാതാവേ, നിന്നെ ഞാൻ വണങ്ങുന്നു...