പണ്ട് വിജയൻ മാഷ് പറഞ്ഞതാണ്.. അമ്പിളി നമ്മുടെ പറമ്പിലാണ് ഉദിച്ചതെന്ന് എഴുതാൻ ഒരാൾക്ക് എല്ലാ അവകാശവുമുണ്ട്. ഏതുവരെ? അപ്പുറത്തെ പറമ്പിൽ ചെന്നു നോക്കുന്നതു വരെ. അപ്പുറത്തെ പറമ്പിൽ ചെന്നു നോക്കിയാൽ അവിടെയും ഇത് ഉദിച്ചിട്ടുണ്ടാകും. പക്ഷേ നോക്കില്ലെന്നു വാശിയുള്ളതു കൊണ്ട് ഈ പഞ്ചായത്തിലാണ് ചന്ദ്രൻ ഉദിച്ചതെന്ന് മരിക്കും വരെ അയാൾക്ക് തീരുമാനിക്കാം.

കാൻസർ മരുന്നുകൾ ആശുപത്രികൾ 2700 രൂപക്കു വാങ്ങി 27000 രൂപക്ക് വിൽക്കുന്നതിനെ കൂട്ടക്കുരുതി എന്നാണ് സുപ്രീം കോടതി പറയുന്നത്. കോർപ്പറേറ്റ്, സ്വകാര്യ ആശുപത്രികൾ ആരെയും വെറുതേ വിടുന്നില്ല .ശവശരീരത്തിലും അവർ വിലപേശുന്നു. മരുന്നുല്പാദകർ ഒന്നും ചിന്തിക്കുന്നില്ല . ഈ കൊള്ളയ്ക്കെതിരെ സർക്കാർ ഇടപെടണം. ലാഭം പതിനാറു ശതമാനത്തിൽ കവിയരുത്. ഇവയാണ് പരമോന്നത കോടതി നിർദ്ദേശിക്കുന്നത്. ജനാധിപത്യം തുള്ളിത്തുളുമ്പാൻ പണി എടുക്കുന്ന രാഷ്ട്രീയ കക്ഷികൾക്ക് ഉരുൾ നേർച്ചകൾക്കും ഊന്നിപ്പറയാനും മാത്രമേ സമയമുള്ളു.

അടുത്ത പരിപാടി കടമ്മനിട്ടയുടെ ചാക്കാലയുടെ പുനരവതരണമാണ്. റൊമാൻസിന്റെ അസ്കിതകളും സാഹിത്യത്തിന്റെ വിര ശല്യവു മുള്ളവർക്കും സ്പിരിറ്റിലെ വിജയ് യേശുദാസിന്റെ പാട്ടും കടല പോൽ കൊറിക്കാം..

പുതിയ കാലത്തു മരുന്നുകളാൽ ചത്തു ചത്തു ജീവിക്കുകയും മരുന്നു കാരണം കൊണ്ട് ആസന്ന മരണം ഉറപ്പാകുകയും ചെയ്യമ്പോൾ ശാസ്ത്രം ജയിക്കും മനുഷ്യൻ തോൽക്കും.. മാനസികവും ശാരീരകവും സാമ്പത്തികവുമായ സുസ്ഥിതിയാണ് ആരോഗ്യമെന്ന് ലോകാരോഗ്യ സംഘടന. ഈ കോപ്പാണ് ജനാധിപത്യത്തിന്റെ എക്കാലത്തെയും കാതലാവേണ്ടത്. പൊരിച്ചിലുകൾ മതിയാക്കി കാര്യത്തിലേക്ക് വരികയാണ് അടിയൻ ലച്ചിപ്പോം എന്നു കരയുന്ന രാഷ്ട്രീയ കോൽക്കാർ ഇനിയെങ്കിലും ചെയ്യേണ്ടത്.