'സമ്പൽ സമൃദ്ധമായ ഒരു മാസം ആരംഭിക്കുകയായി. സോഷ്യലിസം മുടി വിടർത്തി ആടുന്ന ഒരു രാഷ്ട്രത്തിലെ പൗരനാണ് ഞാൻ എന്നോർത്തപ്പോൾ പയ്യന് രോമാഞ്ചമുണ്ടായി. തന്റെ രാജ്യസ്നേഹവും അഭിമാനവും വല്ലവരും കണ്ടോ എന്നറിയാൻ പയ്യൻ ചുറ്റും നോക്കി. ഇല്ല ആരും കണ്ടില്ല. സമാധാനമായി... '(വികെ എൻ)

ലോകം മുഴുവനും സമാധാനത്തിന്റെ വെള്ളരിപ്പറവകൾ പാറിപ്പറന്നു കാഷ്ഠിക്കുന്ന ഈ നാളുകളിൽ,മാനവീയതയാകെ കാൽപ്പന്തു കളിയിലെന്ന പോൽ അർമാദിക്കുന്ന ഈ വേളയിൽ  ഇന്ത്യയിലെ ട്രപ്പീസു കളിയിൽ യു എന്നിന്റെ കാക്കത്തൊള്ളായിരം ഏജൻസികളിലൊന്ന് ആകുലമാകുന്നു. ആ ഏജൻസിയെ കണ്ടെത്താനായി മഷിയിട്ടു നോക്കാൻ സെക്രട്ടറി ജനറൽ കല്പിച്ചു കഴിഞ്ഞു. അത്രയും നന്ന്. ലോകാ സമസ്ത സുഖിനോ ഭവന്തു !

"കുത്തകകളെ ,ഞാൻ അടുത്ത ഏപ്രിൽ വരെ എംപിയാണ്."എന്നു പറഞ്ഞവാറെ അവർ ചവിട്ടു നാടകം തുടങ്ങി എന്നാണ് കേൾവി.. ദില്ലീ ആപ്പീസു നടയിൽ ഒരു പൊലിസുകാരൻ അബദ്ധത്തിൽ മീശ പിരിച്ചാൽ അരുത് എന്നു മീശയോട് ഹിന്ദിയിൽ പറയാൻ ഒരാളെ ഇന്നുള്ളൂ.അതാ...ണ് ബിട്ടൂസ്. കഴിഞ്ഞ നാൾ അടി പേടിച്ച് ഓടിയ കറ മാറ്റണം. പുന്നപ്ര വയലാർ സമരത്തെ കവക്കുന്ന പോരാളിയാവണം. കേന്ദ്രകമ്മിറ്റിയിൽ ചാടിക്കയറണം. അടുത്ത തേർതലിൽ വിജയം ഉറപ്പാക്കണം. yes Britus is an honorable man.

രണ്ടു വയസായ ഒരു ബാലകനെ ഇരുകരങ്ങളിലും കരുതലോടെ മുറുകെ പിടിച്ച് ഉൽസവ പറമ്പിന്റെ വിസ്മയങ്ങളിലേക്ക് നയിക്കുന്ന കാഴ്ചക്കു സമാനമായീരുന്നു കാരണഭൂതത്തിന്റെ ദില്ലി പ്രകടനവും.  ബലൂൺ വാങ്ങി തരട്ടെ എന്നതിനു സമാനമായിരുന്നു ശരണം വിളിക്കട്ടെ എന്ന ബാലനായ ഗോപാലിന്റെ നിഷ്കളങ്കമായ അഭ്യർത്ഥന. നേരെ ചെന്നു കയറിയാൽ ചവിട്ടി കൂട്ടും എന്നതിനാൽ വയോധിക ആനുകൂല്യം സദയം അനുവദിച്ചാണ് കേരളത്തിലെ എല്ലോപ്പിയുടെ അറസ്റ്റു നടന്നത്. നഗര പ്രദക്ഷിണം സൗജന്യമായ സിറ്റി റൈഡായി  കണ്ടാൽ മതി. ഞങ്ങൾ ഇവിടുണ്ടെന്ന് മലയാളത്തിൽ വിളിച്ചത് അവർ കേട്ടു കാണും. യാത്ര ആനന്ദമാക്കാൻ  പെപ്സിയും കിറ്റ്ക്യാറ്റും കരുതാതെ  ഇറങ്ങിയതിൽ പരിചയക്കുറവുണ്ട്. തിരികെ തിരോന്തരത്ത്  വന്നപ്പോൾ ഉജ്ജ്വല വരവേല്പ്.വെടിക്കെട്ട്. ഏഷ്യാഡിന് സ്വർണവും വാരിക്കുട്ടി വന്ന കുട്ടിയെ സ്വീകരീക്കാൻ ഒരു പട്ടിക്കുഞ്ഞ് മില്ല.!