തിരസ്കാരത്തിന്റെ പനിനീർപ്പൂവ്

തിരസ്കാരത്തിന്റെ പനിനീർപ്പൂവ്

മോഹനകൃഷ്ണൻ

9 November 2026, 6:40 pm

മമ്മൂട്ടി,ബി ജെ പി നേതാവ് ഗോപാല കൃഷ്ണന്റെ മകൾക്ക് വിവാഹ മംഗളങ്ങൾ നേരാൻ പോയത് പുലിവാലായിരിക്കുയാണ്. ഇതിനെതിരെ സമൂഹ മാധ്യമങ്ങളിൽ ആയിരത്തൊന്നു കലം പൊങ്കാലയും ആക്ഷേപാർച്ചനയും തുടരുകയാണ്. ഇതിനിടെ അധികമൊന്നും ഓർമ്മിക്കപ്പെടാതെ ഒരു നൂറാം പിറന്നാൾ കടന്നുപോവുകയാണ്. ബി ജെ പിയുടെ സമുന്നത നേതാവ് ലാൽ കൃഷ്ണ അദ്വാനിയുടെ നൂറാം ജന്മദിനമായിരുന്നു ഈ കഴിഞ്ഞ നവംബർ 8. ജന്മനാട്ടിനേക്കാൾ പ്രായമുള്ള ജനനേതാവിന്റെ പിറന്നാൾ....

ഇഎം ശങ്കരൻ നമ്പൂതിരിപ്പാടിന്റെ ചരമോപചാരച്ചടങ്ങിൽ തിരുവനന്തപുരത്ത് പങ്കെടുത്തത് ബിജെപിയിലെ അന്നത്തെ രണ്ടാമനായ എൽ കെ അദ്വാനിയായിരുന്നു.

1 9 9 0 ലെ സോമനാഥ് അയോധ്യ രഥയാത്ര. രാജ്യത്തെ കലുഷിതമാക്കിയ ആ യാത്രയിൽ രാഷ്ട്രീയം മാത്രമല്ല ഇതര കക്ഷികളിലെ ചേരിപ്പോരും നിറഞ്ഞാടി. യുപിയിൽ കടക്കുമ്പോൾ അദ്വാനിയെ അറസ്റ്റു ചെയ്യാൻ നിർദ്ദേശിച്ചു വിപി സിംഗ്. എന്നാൽ ബീഹാറിൽ വച്ചു തന്നെ അറസ്റ്റു നടത്താൻ ലാലു പ്രസാദ് യാദവിന് നിർദ്ദേശം നൽകിയതും അതേ വിപി സിംഗ്!.. അറസ്റ്റിന്റെ ക്രെഡിറ്റ് മുലയത്തിന് നിഷേധിച്ചായിരുന്നു തിടുക്കത്തിലുള്ള അറസ്റ്റ്.

ഇന്ന് ഒരു നൂറ്റാണ്ടിന്റെ ചരിത്ര സാക്ഷിയാണ് ലാൽ കൃഷ്ണ അദ്വാനി.പത്ര പ്രവർത്തകൻ, വക്കീൽ, തൊഴിലാളി സംഘടനാ പ്രവർത്തകൻ, രാഷ്ട്രീയ നേതാവ് എന്നീ നിലകളിൽ ജീവിതം.

1 9 4 7 ലെ വിഭജനത്തിന്റെ നേർ സാക്ഷിയും, ഇരയും. കറാച്ചിയിൽ നിന്നും ദില്ലിയിൽ നിർബ്ബന്ധിതമായ പുതുജീവിതം.

ആർഎസ്എസ് പ്രചാരകനും ജനസംഘം നേതാവുമായി. 1 9 6 7ൽ ദില്ലി മെട്രോപൊലിറ്റൻ കൗൺസിൽ ചെയർമാൻ. എമർജസിയിൽ രണ്ടു വർഷം തടവിലായിരുന്നു. ബിജെപിയുടെ സഹസ്ഥാപകനും അധ്യക്ഷനുമായി.

1999-2004 കാലത്ത് കേന്ദ്ര ആഭ്യന്തരമന്ത്രിയും ഉപപ്രധാനമന്ത്രിയും..വാർത്താ വിതരണ വകുപ്പും കൈകാര്യം ചെയ്തിട്ടുണ്ട്.

ഒരു പ്രസ്ഥാനത്തിന്റെ എളിയ തുടക്കവും പടർന്നു പന്തലിക്കലും അധികാര ലബ്ദ്ധിയും അദ്ദേഹത്തിനു കാണാനായി.

2004 ൽ മുഹമ്മദലി ജിന്നയുടെ ശവകുടീരം സന്ദർശിച്ച ശേഷം അദ്വാനി കുറിച്ചത് ഹിന്ദു മുസ്ലിം ഐക്യത്തിന്റെ വക്താവായിരുന്നു ജിന്ന എന്നായിരുന്നു.ആ കുറിപ്പ് പാർട്ടിയിൽ വിവാദമായി. അദ്ദേഹത്തിനു തന്റെ നിലപാടിൽ നിന്നും മാറേണ്ടിയും വന്നു.

ന്യൂട്ടന്റെ ചലന നിയമങ്ങൾ പോലെ സമൂഹത്തിന്റെ താത്പര്യങ്ങളാണ് സംഘടനകളായി പിറക്കുന്നത്.. പലപ്പോഴും അതൊരു പ്രതിപ്രവർത്തനത്തിന്റ ഫലമാകാം.സംഘവും ജനസംഘവും ബിജെപിയും സംഘപരിവാർ സംഘടനകളും എല്ലാം ആ ജനുസിലാണ് ഉയിർ കൊണ്ടത്.

ശൂരൻമാരെയും നിപുണന്മാരെയുമല്ല ഭാഗ്യവാൻമാരെ പെറ്റിടാനാണ് കുന്തി പാഞ്ചാലിയോട് ആവശ്യപ്പെടുന്നത്. നിപുണരെ പ്രസവിച്ച് കാട്ടിലലഞ്ഞ അനുഭവമാണ് കുന്തീദേവിക്ക്.വിജയകരമായി പടനയിച്ചു വന്നിട്ടും അദ്വാനി നായകനായില്ല. അഭിഷേകവും നടന്നില്ല വിധി വൈപരീത്യം!

പ്രധാനമന്ത്രി നരേന്ദ്ര മോദിയെ ആശംസിക്കുന്ന ഒരു ചടങ്ങിലെ നിരയിൽ പനിനീർപ്പൂവുമായി നിന്ന അദ്വാനിയെ മൈൻഡു ചെയ്യാതെ മോദി കടന്നു പോയ രംഗവും ഈ സ്മരണികയിൽ ഓർക്കാതെ വയ്യ. മതവൈരത്തിന്റെയും വർഗീയതയുടെയും മുഴുവൻ പഴികളും പ്രസ്ഥാനത്തിനായി സ്വയം മൗനമായി ഏറ്റുവാങ്ങിയ, പരാജയപ്പെട്ടു പോയ ഒരു പടനായകനായും കാലം അദ്ദേഹത്തെ അടയാളപ്പെടുത്തും.ആ ചെലവിൽ പാർട്ടിയിലും പുറത്തുമുള്ള ആയിരക്കണക്കിനു നേതാക്കൾക്ക് മിതവാദികളും മതേതരരും ന്യൂനപക്ഷ സ്നേഹികളുമാകാനും കഴിഞ്ഞത് ആയതിന്റെ ഒരു പ്രയോജക മൂല്യവുമായി..

അദ്വാനിക്ക് മുന്നിൽ രാജയോഗം കുതറി വീണു.

ഭാഗ്യമെന്നത് ഒരു മാജിക്കാണ്. .

താങ്ങിപ്പിടിച്ച് പരസഹായത്താൽ വീട്ടിൽ വിശ്രമ ജീവിതത്തിനു പോയ നരസിംഹറാവു ചുറുചുറുക്കോടെ പ്രധാനമന്ത്രി പദവുമായാണ് ദില്ലിയിൽ തിരിച്ചു വന്നത്.. ഗജകേസരിയോഗം.!

തന്റെ തന്നെ ആത്മാംശം തുടിക്കുന്ന നോവലും അദ്ദേഹം രചിച്ചു.

ഇൻസൈഡർ..

പരാതിക്കാരോട് 13 ഭാഷകളിൽ ആദ്ധ്യാത്മിക സമാധാനം വിളമ്പിയപ്പോൾ തന്നെയാണ് സരയൂ തീരത്ത് മത മൈത്രിയും തകർന്നു വീണത്.

വിദേശ പൗരത്വം പറഞ്ഞ് സോണിയയുടെ അവസരം തെറിപ്പിച്ച പവാർ ഇന്നു ക്ഷീണിതനാണ്. അദ്ദേഹവും ലക്ഷ്യം കണ്ടില്ല.ഇനി മകളുടെ രാഷ്ട്രീയ ഭാവിമാത്രം ലക്ഷ്യമിടുന്നു.ബിജെപിയുടെ നാവ് പണ്ട് കടം കൊണ്ട പവാർ ഇന്നു തിരയുന്നതും ബിജെപിയെയാണ്...;

മകൾക്കു വേണ്ടി.

കടലാഴങ്ങളും ചുഴികളും താണ്ടിയ ഒരു സ്ഥൈര്യം ധന്യമായ നൂറിലേക്കു കടക്കുമ്പോൾ ഭാരതം മാറിമറിയുകയാണ്.

പുതിയപെരുമകളും സുകൃതങ്ങളും ഘോഷിച്ചു കൊണ്ട്. .

Keywords:

Recent in National

Must Read