സ്വന്തം കൊച്ചിന്റെ പേര് അറിയില്ലെങ്കിലെന്ത് മെസ്സിയുടെ കൊച്ചിന്റെയും കോച്ചിന്റെയും കൊച്ചച്ചന്റെയും പോരെങ്കിൽ കുഞ്ഞമ്മയുടെ പേരുപോലും നമുക്ക് കാണാപ്പാഠം. പെറ്റ തള്ളക്ക് മരുന്നു വാങ്ങാൻ വച്ചിരുന്ന കാശ് കട്ട് കവലയിൽ പ്രിയ താരങ്ങളുടെ കട്ടൗട്ട് വച്ചും അടിച്ചുമാറ്റിയ പൈസ കൊണ്ട് അർച്ചന നടത്തിയും ലോകത്തിനുമുന്നിൽ നമ്മുടെ ഫുട്ബോൾ പ്രേമം പലവട്ടം തെളിയിച്ചവരാണ് കേരളീയർ.

ലോകകപ്പ് ഫുട്ബോൾ മത്സരം ഒരിക്കലെങ്കിലും നേരിൽക്കാണണം എന്ന് ആഗ്രഹിക്കാത്തവരായി ആരുമുണ്ടാവില്ല. അതിനുള്ള മൂലധനം ഇല്ലാത്ത നമ്മെപ്പോലുള്ളവർ മുക്കുകളിലെ വലിയ സ്ക്രീനുകളിൽ കളി കണ്ട് കലിപ്പ് തീർത്തു. കാബോ വെർദ, ക്യൂറസാവോ തുടങ്ങിയ കുഞ്ഞൻ രാജ്യങ്ങൾ കാട്ടിയ പോരാട്ട വീര്യം കണ്ട് പകച്ച് പണ്ടാരമടങ്ങി.

ചെറിയ രാജ്യങ്ങളോടുള്ള ചിറ്റമ്മ നയം , പൊക്കത്തിന്റെയും വലിപ്പത്തിന്റെയും കുറവുകൊണ്ട് പിടിച്ചുനിൽക്കാൻ പാടുപെടുന്ന ജപ്പാൻ, കൊറിയ പോലുള്ള രാജ്യങ്ങളോടുള്ള ചില റഫറിമാരുടെ സമീപനം ഇങ്ങനെ പക്ഷപാത പരമായിരുന്ന പലതും ചേർന്നുള്ളതായിരുന്നു ഇത്തവണത്തെ ലോക കപ്പ് മത്സരങ്ങൾ എന്നു പറഞ്ഞാൽ അത് കുത്തിത്തിരിപ്പാവില്ല. കണ്ണീര് , കൗതുകം, ആകാംക്ഷ, അടിയറവ്, കുതിര കയറ്റം, എന്നിങ്ങനെ കളിയിലെ പല ചേരുവകളും ചേർന്ന് കാണികളിൽ ചെലുത്തിയ സ്വാധീനം കുറച്ചൊന്നുമായിരുന്നില്ല എന്നതും സത്യം. മാനം ഇടിഞ്ഞാലും ചോരാത്ത ഗെയിം പ്ലാനുകളുടെ വിവരങ്ങൾ ചോർത്തിയ മട്ടിൽ റിപ്പോർട്ടിംഗ് കളർഫുൾ ആക്കി കത്തി ക്കയറുകയായിരുന്നു നാട്ടിലെ അച്ചടി ദൃശ്യ മാധ്യമങ്ങൾ. നാം ടിക്കറ്റ് എടുത്ത് സിനിമ കണ്ടത് വഴി ലഭിച്ച പൈസയിൽ ലോകകപ്പ് വേദിയിലെത്തിയ മോഹൻലാൽ, ആന്റണി പെരുമ്പാവൂർ എന്നിവർക്ക് നമോവാകം. ഞങ്ങൾക്ക് ഇല്ലാത്ത ഭാഗ്യം നിങ്ങൾക്കെങ്കിലും ഉണ്ടായല്ലോ.

കളി ജയിക്കാൻ കഴിവ് മാത്രം മതിയാവില്ല എന്ന സംശയം ബാക്കിയാക്കി കൂടുതൽ ടീമുകളെ പങ്കെടുപ്പിച്ചുകൊണ്ടുള്ള അടുത്ത ലോകകപ്പ് ഇതിലേറെ മാറ്റങ്ങളോടെയാവും എത്തുക. മൂന്നു മിനിറ്റ് ദൈർഘ്യമുള്ള ഹൈഡ്രേഷൻ ബ്രേക്ക് എന്ന വെള്ളം കുടി വേള,വീറും വാശിയും വിവാദങ്ങളും ഒഴിവാക്കാൻ സഹായിയായി മാറിയ വാർ എന്ന വീഡിയോ അസിസ്റ്റന്റ് റഫറി, ചിപ്പ് ഘടിപ്പിച്ച ട്രയോണ്ട പന്തുകൾ തുടങ്ങിയ ലോകകപ്പിലെ പുതിയ വിഭവങ്ങളെ കുറിച്ചുള്ള ചർച്ചകൾ തീരാൻ ഇനിയും സമയം ഏറെ എടുക്കും.